3 Juan 1
1
Gayo oy yajxón yajnigápxy yajnimu̶dya'agy
1U̶u̶ch, je̱'e̱ mu̶bu̶jkpu̶du̶jk nigu'ubajk'ajtpu̶, cham u̶u̶ch je̱'e̱ nmu̶gu'ug Gayo adaa naky nyajnijayu̶'u̶y, je̱'e̱ mu̶dyiibu̶ u̶u̶ch jaanch ndzojkypy nju̶wu̶u̶ybyu̶ñ.
2Mu̶gu'ug mu̶dyiibu̶ u̶u̶ch oy ndzojkypy nju̶wu̶u̶ybyu̶ñ, nmu̶bu̶jktzooybyu̶ch je̱'e̱ Dios mu̶u̶d miich kyu̶xpu̶, ko du'un neby je̱'e̱ Dios y'ayuuk tyu̶y'ajt myajmu̶jtu̶gu̶u̶yu̶ju̶ñ, wan du'un xy'oyu̶u̶yu̶ch ku̶xyu̶ tijaty naty mduumbyu̶ñ y m'oy'at mu̶k'ádu̶ch. 3Jootkugu̶u̶yu̶ch ko je̱'e̱ mu̶bu̶jkpu̶du̶jk ya nije̱' mye̱jtzku̶xy y xyajmu̶dmu̶dyaakku̶xyu̶ch ko je̱'e̱ tu̶y'ajt oy tu'uda'agy myajtu'uyo'oy y ka'p m'u̶xtu̶gu̶'u̶wa'agy. 4Janch jootkujku̶ch ko u̶u̶ch du'un nnejwu̶'u̶y ko u̶u̶ch je̱'e̱ nmu̶gu'ugtu̶jk du'un chu̶naay jyugy'ajtku̶xy kuydyuungu̶xy neby je̱'e̱ tu̶y'ajt myu̶na'añu̶ñ, je̱'e̱ mu̶dyiibu̶ u̶u̶ch du'un nju̶wu̶u̶by neby je̱'e̱ ung ana'ku̶ñ ajku̶xy.
5Mu̶gu'ug mu̶dyiibu̶ u̶u̶ch oy ndzojkypy nju̶wu̶u̶ybyu̶ñ, miich tu̶y tu'uda'agy miich mja'ay'áty ko je̱'e̱ mmu̶gu'ugtu̶jk mbubety mbudu̶gu̶'u̶y, je̱' ni'igyu̶ mu̶dyiibu̶ ka'p m'ixy'atyu̶ñ, mu̶dyiibu̶ wiing naax wiing kajpt tzóngu̶xpu̶ñ. 6Ko ya tu̶ mye̱jtzku̶xy tu̶ je̱'e̱ mu̶bu̶jkpu̶du̶jk nnu̶maaygyu̶xy ko miich je̱'e̱ mdzojkku̶xy mju̶wu̶u̶ygyu̶xy. Tun je̱'e̱ may'ajt, pube̱jt pudu̶gu̶u̶ygyu̶x y mooygyu̶x ñidu'uyo'oyu̶u̶k ku̶xyu̶ tijaty yajmayjyajtku̶xypyu̶ñ, du'un neby je̱'e̱ Dios ku'umáyu̶ñ. 7Je̱' tu̶ je̱'e̱ tyu'ubu̶jkku̶xy ko je̱'e̱ Jesucristo y'ayuuk tyu̶y'ajt yajwa'kxaanu̶ ajku̶xy, y ka'p je̱'e̱ ni tii pube̱jtu̶ñ ku'ubu̶jkku̶xy ma je̱'e̱ ja'ay ajku̶xy mu̶dyiibu̶ je̱'e̱ Dios y'ayuuk tyu̶y'ajt ka'p mu̶bu̶jkku̶xyu̶ñ. 8Paady je̱'e̱ du'umbu̶ mu̶bu̶jkpu̶du̶jk u̶u̶ch mu̶baad nbube̱jtu̶m ajku̶xy, wan du'un u̶u̶ch nandu'un nbube̱jtu̶mu̶ch ajku̶xy ma je̱'e̱ tu̶y'ajt kapxwa'kxku̶xyu̶ñ.
Je̱'e̱ Diótrefes jyu̶bu̶kja'ay'ajtu̶ñ y je̱'e̱ Demetrio y'oy'ijxpe̱jt
9U̶u̶ch je̱'e̱ mu̶bu̶jkpu̶du̶jk naky tu'ug nyajnijayu̶u̶ygyu̶x, peru̶ ka'p u̶u̶ch je̱'e̱ Diótrefes n'ane̱'e̱mu̶ñ xykyu'ubu̶jku̶ ajku̶xy, je'eyu̶ je̱'e̱ nigoo ku̶'u̶m y'ane̱'e̱ma'añ. 10Paady ko u̶u̶ch naty jim nnu̶kxy nyajnu̶ma'awu̶byu̶ch je̱' ku̶xyu̶ nebyjyaty u̶u̶ch xyñigapx xyñimu̶dyaakku̶xyu̶ñ y nebyjyaty je̱'e̱ anu̶u̶ mu̶wu̶dityu̶ñ. Y ko du'un kya'ajootkujk'áty ka'p je̱'e̱ myu̶gu'ug yajmiin yajja'tta'agy pu̶n je̱'e̱ ayuuk tu̶y'ajt mu̶wu̶dijtku̶xpu̶ñ, y ko je̱'e̱ myu̶gu'ug pu̶n ja'ayajja'ttaga'añ y'agapxtujkypy je̱'e̱ myu̶gu'ug ka'pu̶ yajja'tta'agu̶ch y u̶x'ojy ma ñayyo'oymyujku̶gu̶xyu̶ñ.
11Mu̶gu'ug mu̶dyiibu̶ u̶u̶ch oy ndzojkypy nju̶wu̶u̶ybyu̶ñ, ka'p je̱'e̱ ju̶bu̶k ijxpe̱jt mba'ixy, je̱'e̱ oybyu̶ ijxpe̱jt mba'íxu̶py. Pu̶n je̱'e̱ oybyu̶ tuumbu̶ñ Dios je̱'e̱ ja'ay'ajtu̶p, peru̶ pu̶n je̱'e̱ ju̶bu̶kpu̶ tuumbu̶ñ, ka'p je̱'e̱ Dios ixyñu̶ pu̶n je̱'e̱ju̶ñ.
12Ku̶xyu̶ je̱'e̱ Demetrio oy nimu̶dyaakku̶xy y je̱'e̱ tu̶y'ajt ku̶'u̶m yajni'igu̶xu̶'kp ko oy jya'ay'áty. Nan ngu'umaaybyu̶ch nandu'un ajku̶xy ko oy jya'ay'áty, y mnejwu̶u̶by miich ko u̶u̶ch tu̶y'ajt nmu̶dyaakku̶xy.
Je̱' ayuuk mu̶dyiibu̶ ku̶jxp maayñu̶byu̶ñ
13May u̶u̶ch najty je̱'e̱ ayuuk nmu̶u̶du̶ch mu̶dyiibu̶ najty nyajmu̶dmu̶dya'age̱e̱mbyu̶ñ, peru̶ ka'p naky'aam nyajnijayu̶'u̶wa'añ, 14je̱' ko u̶u̶ch nju̶jp'ijxypy nnu̶kxa'añu̶ch tzojku̶ ma miichu̶ñ y nmu̶dmu̶dya'aga'añ wiinu̶ ju̶jpu̶.
15Yajpaad jootkujk. Cham je̱'e̱ nmu̶gu'ugtu̶jk yajpókxu̶ñ xyajnigue̱jxku̶xy. Tun may'ajt, yajpókx jim nidu'ug nidu'ug je̱'e̱ nmu̶gu'ugtu̶jk ajtu̶m ajku̶xy.
Currently Selected:
3 Juan 1: MIXE
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005