2 Timoteo 1
1
Je̱'e̱ yajpókxu̶ñ
1U̶u̶ch Pablo, Jesucristo y'apóstol, kéxyu̶ch je̱'e̱ Dios, je̱'e̱ u̶u̶ch du'un tu̶ xyajmu̶dzóky ko u̶u̶ch je̱'e̱ Jesucristo y'ayuuk tyu̶y'ajt ngapxwa'kxu̶yu̶ch, du'un neby je̱'e̱ ja'ay jugy'ajtu̶ñ wiinu̶u̶xu̶u̶bu̶ yajwinwaanu̶u̶y, mu̶dyiibu̶ yajpaatp ko je̱'e̱ Cristo Jesús yajmu̶bú̶ky. 2Cham adayaaba naky nyajniguéxy miich Timoteo, du'un u̶u̶ch miich nju̶wu̶'u̶y neby je̱'e̱ ku̶'u̶m'úngu̶ñ, nyajmu̶dzojkypy ko je̱'e̱ Dios Teedy y u̶u̶ch je̱'e̱ nWindzú̶n Jesucristo ajtu̶m je̱'e̱ oy'ajt may'ajt wan tuñ ma miichu̶ñ, wan xypya'a''ayóy y xyajjootkujk'ádu̶ch.
Mu̶baad je̱'e̱ tu̶y'ajt nye̱jku̶m ajku̶xy Cristo kyu̶xpu̶
3Nyejkypyu̶ch je̱'e̱ Dioskujuuyu̶p ma je̱'e̱ Diosu̶ñ ko u̶u̶ch nja'aymye̱jtzpaady ko je̱' y'ayuuk tyu̶y'ajt mmu̶bu̶jku̶. Nmu̶bu̶jktzooybyu̶ch je̱'e̱ Dios mu̶u̶d miich kyu̶xpu̶ xu̶u̶m tzum, je̱'e̱ mu̶dyiibu̶ u̶u̶ch nmu̶duumbyu̶ñ mu̶u̶d u̶u̶ch je̱'e̱ n'oyjyoot n'oywyinma'añ, du'un neby u̶u̶ch je̱'e̱ nmu̶j'áp nmu̶jteedy nandu'un jékyu̶p mu̶duuñu̶ñ ajku̶xy. 4Nja'aymye̱jtztu̶u̶ybyu̶ch neby mju̶u̶y myaaxyu̶ñ ko nnayyo'oywya'kxu̶nu̶, y nu̶kxaamb it nja'aku'ixa'añ neby u̶u̶ch mu̶baad njootkugu̶'u̶yu̶ñ. 5Je̱' ko nja'aymyejchpyu̶ch neby je̱'e̱ tu'uda'agypyu̶ mu̶bu̶jku̶ñ miich mmu̶u̶du̶chu̶ñ. Jayu̶jp je̱'e̱ mmaam Loida y je̱'e̱ mdaj Eunice mu̶dajty ajku̶xy, y nnejwu̶u̶ybyu̶ch du'un ko chambaadnu̶ je̱'e̱ tu'uda'agypyu̶ mu̶bu̶jku̶ñ miich nandu'un mmu̶datyñu̶.
6Paady nyajja'aymyéch yajmu̶jtu̶gu̶'u̶ je̱'e̱ mu̶k'ajtu̶ñ mu̶dyiibu̶ je̱'e̱ Dios xymyooyu̶ñ je̱'e̱, mu̶naaba najty je̱'e̱ Dios tyuung mni'imadzaanu̶ ko ngu̶'u̶ni'ixajy y nmu̶bu̶jktzooyu̶ch je̱'e̱ Dios mu̶u̶d miich kyu̶xpu̶. 7Dios ka'p je̱'e̱ mu̶k'ajt tu̶ xymyooyu̶m ajku̶xy je̱'e̱ mu̶dyiibu̶ yajwindze'ty'ajtpu̶ñ, je̱' je̱'e̱ tu̶ xymyooyu̶m ajku̶xy je̱'e̱ mu̶dyiibu̶ yajjootmu̶k'ajtpu̶ñ y nnaychojk nnayjyu̶wu̶u̶yu̶mu̶ch ajku̶xy, y nja'ay'ajtu̶mu̶ch wijy kejy ajku̶xy. 8Paady ka'p mmu̶dzo'oydyúñ neby mnidu̶y'ajt'átyu̶ñ je̱'e̱ nWindzú̶n y'ayuuk tyu̶y'ajt ajtu̶m ajku̶xy, y nan ka'p u̶u̶ch xymyu̶dzo'oydyúñ ko u̶u̶ch yam nbujxtu̶jk'u̶ña'ay mu̶u̶d je̱'e̱ Windzú̶n Jesucristo kyu̶xpu̶. Peru̶ mu̶u̶d je̱'e̱ mu̶k'ajt mu̶dyiibu̶ je̱'e̱ Dios xymyoobyu̶ñ, ku'ubú̶k je̱'e̱ mje̱' nandu'un je̱'e̱ tzaachpyu̶ ayo'on mu̶dyiibu̶ xyñimiimbu̶ñ mu̶u̶d je̱' gyu̶xpu̶ ko je̱'e̱ Dios y'ayuuk tyu̶y'ajt mgapxwa'kxu̶ mu̶dyiibu̶ aanu̶mu̶ ni'idzooku̶ñ ye̱jkpu̶ñ. 9Dios je̱'e̱ n'aanu̶mu̶ tu̶ xyajni'idzooku̶yu̶ ajtu̶m ajku̶xy y tu̶ xymyooyu̶m ajku̶xy ko je̱'e̱ ndzu̶naay njugy'ajtu̶ñ nyajwaatzu̶mu̶ch ajku̶xy, ka'p pyaadyu̶ch ko ti du'umbu̶ tu̶ nduunu̶m ajku̶xy, je̱' ko du'un je̱'e̱ niwinmayu̶u̶y y nan je̱' ko xychojku̶m xyjyu̶wu̶u̶yu̶m ajku̶xy mu̶u̶d je̱'e̱ Cristo Jesús kyu̶xpu̶. Dios xychojkp xyjyu̶wu̶u̶by najty je̱'e̱ je'emy ajtu̶m ajku̶xy maabu̶ je̱'e̱ naaxwiimbu̶ najty ka'p yajkojyñu̶. 10Tu̶ je̱'e̱ Dios cham yajni'igu̶xu̶'u̶gy ko xychojku̶m xyjyu̶wu̶u̶yu̶m ajku̶xy, ko ya naaxwiiñ y'ooy u̶u̶ch je̱'e̱ nniwaambu̶ nyajtzookpu̶ Jesucristo ajtu̶m ajku̶xy je̱'e̱ mu̶dyiibu̶ je̱'e̱ o'ku̶ñ myu̶k'ajt yajku'udu̶gooyu̶ju̶ñ, y mu̶u̶d je̱'e̱ y'ayuuk tyu̶y'ajt je̱'e̱ mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ, je̱' mu̶u̶d xyajnejwu̶u̶yu̶m ajku̶xy ko wiinu̶u̶xu̶u̶ njugy'ajtu̶mu̶ch ajku̶xy ma je̱'e̱ Diosu̶ñ.
11U̶u̶ch tu̶ u̶u̶ch je̱'e̱ Dios xyajni'ipú̶ky ko u̶u̶ch adaa y'ayuuk tyu̶y'ajt ngapxwa'kxu̶yu̶ch, y tu̶ xykyéxyu̶ch ko u̶u̶ch n'apóstol'ádu̶ch y ko u̶u̶ch nyaj'u̶xpú̶gu̶ch#1.11 Nije̱' wiingpu̶ versión myu̶na'añ: je̱'e̱ mu̶dyiibu̶ ka'p jyudíoja'ayu̶chu̶ñ ajku̶xy. 12Paady kyu̶xpu̶ u̶u̶ch je̱'e̱ tzaachpyu̶ yam du'un ku̶xyu̶ nmu̶naxy ngu'ubú̶ky. Peru̶ ka'p u̶u̶ch adaa nmu̶dzo'oydyúñ, je̱' ko nnejwu̶u̶ybyu̶ch pu̶n u̶u̶ch nmu̶bu̶jkypyu̶ñ y nnejwu̶u̶ybyu̶ch oy yajxón ko myu̶u̶d mu̶k'ajt je̱' neby mu̶baad kweentu̶'áty je̱'e̱ mu̶dyiibu̶ u̶u̶ch tu̶ xyajku̶'u̶du̶gu̶'u̶yu̶ñ u̶xtu̶ je̱'e̱ mu̶'it xu̶u̶ ko naty je̱'e̱ naaxwiiñjya'ay tu̶ydyuna'añ.
13Yajtu'uyo'oy'adu̶'u̶dz je̱'e̱ wa'adzpu̶ u̶xpu̶jku̶ñ mu̶dyiibu̶ tu̶ nyajni'ixu̶'u̶yu̶ñ, y tzu̶na'a jugy'at cham je̱'e̱ Dios y'ayuuk tyu̶y'ajt mmu̶bu̶jku̶yu̶ y mdzok mju̶wu̶'u̶wu̶ch je̱'e̱ mmu̶gu'ugtu̶jk ajku̶xy je̱'e̱ ko tu'ugyu̶ nyajpaatu̶m ajku̶xy ma je̱'e̱ Cristo Jesúsu̶ñ. 14Mu̶u̶d je̱'e̱ Espíritu Santo pyube̱jtu̶ñ mu̶dyiibu̶ ijtp ma u̶u̶ch ajtu̶mu̶ñ ajku̶xy, kweentu̶'át je̱'e̱ oybyu̶ u̶xpu̶jku̶ñ mu̶dyiibu̶ je̱'e̱ Dios tu̶ xymyo'oyu̶ñ.
15Je̱' ko tu̶ du'un mnejwu̶'u̶y ko je̱'e̱ mu̶bu̶jkpu̶du̶jk ku̶xyu̶ mu̶dyiibu̶ jim Asia naaxjooty tzóngu̶xpu̶ñ; tu̶ u̶u̶ch je̱'e̱ xykyu'ugue̱e̱ktaaygyu̶xy, je̱'e̱ Figelio y je̱'e̱ Hermógenes du'un nimay tu̶ y'adu̶u̶tzku̶xy. 16Wan je̱'e̱ Windzú̶n Dios pa'a''ayóy je̱'e̱ Onesíforo y je̱'e̱ jyuugy myu̶gu'ug ajku̶xy, je̱' ko janch may'ook u̶u̶ch je̱'e̱ xyñi'ooy oy u̶u̶ch xyajjootkugu̶'u̶y y ka'p u̶u̶ch xymyu̶dzo'oydyuuñ ko u̶u̶ch najty ya nbujxtu̶jk'u̶ña'ay. 17Je'eyu̶ ya Roma ñi'ija'ty, chi u̶u̶ch mu̶kta'agy xy'u̶xtaaydyu̶gu̶u̶y y ka'p ñayyajpókxu̶ u̶xtu̶ koonu̶ u̶u̶ch xypyaaty. 18Wan je̱'e̱ Windzú̶n Dios pa'a''ayówu̶ch je̱'e̱ Onesíforo je̱'e̱ mu̶'it xu̶u̶ ko naty je̱'e̱ naaxwiiñjya'ay tu̶ydyuna'añ. Miich oy wa'adzu̶ mnejwu̶ydya'ay neby xypyubejty xypyudu̶gu̶u̶y ajtu̶mu̶ñ jim Éfeso.
Currently Selected:
2 Timoteo 1: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005