2 Corintios 8

Oyjya'ay'ajtu̶ñ ma je̱'e̱ pube̱jtu̶ñ

1Jada'achám, miich mu̶gu'uktu̶jk, n'awa'anaanu̶ ajku̶xy neby je̱'e̱ Dios may'ajt tu̶ tuñ ma je̱'e̱ mu̶bu̶jkpu̶du̶jk xii yaaju̶ñ jim Macedonia. 2Oy je̱'e̱ tzaachpyu̶ tu̶ ja'amu̶najx ja'aku'ubu̶jkku̶xy, peru̶ janch jootkujk ajku̶xy; y oy jya'ajanch'ayoogu̶xy, tu̶ je̱'e̱ pube̱jtu̶ñ yajmujkku̶xy mu̶u̶d je̱'e̱ oyjya'ay'ajtu̶ñ du'un neby kumeeñbyu̶ju̶ñ ajku̶xy. 3U̶u̶ch je̱'e̱ tu̶y'ajt nmu̶u̶d ko je̱'e̱ pube̱jtu̶ñ tu'ug'aa tu'ugjoot tu̶ yajmujkku̶xy du'un neby tu̶ myu̶daakku̶xyu̶ñ, y naxy ni'igyu̶ tu̶ ye̱jkku̶xy. 4Xymyu̶nukxtaakku̶xu̶ch ko u̶u̶ch ngu'ubú̶gu̶ch yajmujkku̶xu̶ch je̱'e̱ pube̱jtu̶ñ, je̱'e̱ mu̶dyiibu̶ je̱'e̱ Dios jya'ay mu̶u̶d pube̱daangu̶xyu̶ñ. 5Y ni'igyu̶ anaxy je̱'e̱ pube̱jtu̶ñ tu̶ yajmujkku̶xy ni'igu̶ ka'p neby u̶u̶ch najty nju̶jp'ijxku̶xyu̶ñ, jayu̶jp ku̶'u̶m tu̶ ñayyojxu̶gu̶xy ma je̱'e̱ Windzú̶n Jesucristo y u̶x'aam ma u̶u̶ch ajku̶xyu̶ñ, du'un neby je̱'e̱ Dios tzokyu̶ñ. 6Paady u̶u̶ch je̱'e̱ Tito tu̶ nmu̶nukxtaakku̶xy ko je̱'e̱ pube̱jtu̶ñ wan yajmúky ma miich ajku̶xyu̶ñ mu̶dyiibu̶ je̱' yajmujktu̶gu̶u̶yu̶ñ, mu̶dyiibu̶ miich mye̱jkku̶xu̶ñ oyjya'ay'ajtu̶ñ gyu̶xpu̶. 7Miich ajku̶xy mu̶dyiibu̶ ku̶xyu̶ tii oybyu̶ anaxy tuungu̶xpu̶ñ: anaxy je̱'e̱ mu̶bu̶jku̶ñ mmu̶dajtku̶xy, ka'p je̱'e̱ kapxy ayuuk tzip mbaatku̶xy ko je̱'e̱ ayuuk tu̶y'ajt myaj'u̶xpu̶jkku̶xy, anaxy je̱'e̱ u̶xpu̶jku̶ñ mmu̶dajtku̶xy, anaxy mnijoot'ajtku̶xy neby je̱'e̱ Dios mmu̶dunaangu̶xyu̶ñ y anaxy je̱'e̱ tzojku̶ñ ju̶wu̶u̶yu̶ñ mmu̶dajtku̶xy mu̶dyiibu̶ tu̶ mgatz'ijxku̶xy ma u̶u̶ch ajku̶xyu̶ñ, nan anaxy je̱'e̱ oybyu̶ tu̶ mduungu̶xy ko je̱'e̱ pube̱jtu̶ñ tu̶ mye̱jkku̶xy.

8Ka'p miich yam nyajmu̶guwanu̶u̶ygyu̶xy ko je̱'e̱ mmu̶gu'ug mbube̱jtku̶xu̶ch; je̱' u̶u̶ch ndzojkypy mnejwu̶u̶ygyu̶xu̶ch neby je̱'e̱ wiingpu̶ mu̶bu̶jkpu̶du̶jk wyinma'añ ku̶'u̶m pu̶daakku̶xyu̶ñ ko je̱'e̱ myu̶gu'ugtu̶jk pube̱daangu̶xy, wan du'un miich mduungu̶xu̶ch y myajni'igu̶xu̶'kku̶xu̶ch ko jaanch mdzojkku̶xy mju̶wu̶u̶ygyu̶xy. 9Je̱' ko tu̶ miich du'un mnejwu̶u̶ygyu̶xy ko je̱'e̱ nWindzú̶n Jesucristo ajtu̶m ajku̶xy mu̶u̶d y'oyjya'ay'ajtu̶ñ, du'un najty je̱' jiiby tzajpjooty yajpaady neby kumeeñjya'ayu̶ñ, chi du'un ñaybyu̶daaku̶ neby ayoobu̶ja'ayu̶ñ ko ya naaxwiiñ kyu̶daaky mu̶u̶d miich kyu̶xpu̶ ajku̶xy, wan je̱'e̱ m'oy'ajtu̶ñ jiiby du'un mbaatku̶xnu̶ch ma najty ka'p tii mmu̶d'ajtku̶xyu̶ñ.

10Cham nwingapx nju̶jpkapxu̶u̶ygyu̶xy mu̶u̶d miich kyu̶xpu̶ m'oy'ajtu̶ñ ajku̶xy, ko pube̱jt'adu̶u̶tzku̶x je̱'e̱ mmu̶gu'ugtu̶jk neby tu̶ myajtzondaakku̶xyu̶ñ cham jyumu̶jtu̶'u̶y, y nan ka'p je̱'e̱ du'un je'eyu̶ myajtzondaakku̶xy ko je̱'e̱ mmu̶gu'ug mbube̱daangu̶xy nan myajtzondaakku̶x ko du'un yu̶u̶y pe'ty mduungu̶xy. 11Pube̱jt'adu̶u̶tzku̶x je̱'e̱ mmu̶gu'ugtu̶jk jada'achám du'un neby tu̶ myajtzondaakku̶xyu̶ñ, neby je'emy oy mnijoot'ajtku̶xyu̶ñ du'un neby naty mmu̶daakku̶xyu̶ñ, neby tu̶u̶yu̶p myajtzondaakku̶xyu̶ñ ko myajni'idijku̶xy mbube̱daangu̶xy. 12Pu̶nu̶ jii pu̶n tii yeky ku'ubu̶jkku̶xu̶p je̱'e̱ Dios yojxu̶n je̱'e̱ mu̶dyiibu̶ naty je̱' yejkypyu̶ñ du'un neby naty myu̶da'agyu̶ñ. Y ka'p je̱'e̱ Dios amdoy mu̶dyiibu̶ ka'p yajmu̶d'átyu̶ñ.

13Ka'p u̶u̶ch yam nmu̶na'añ ko mnayyaj'ayoodu̶gu̶u̶yu̶gu̶xu̶ch ko je̱'e̱ mmu̶gu'ugtu̶jk naty mbube̱jtku̶xy, 14du'un u̶u̶ch du'un ndijy ko tii kipxyjyaty mmu̶dajtku̶xu̶ch. Jada'achám miich mmu̶dajtku̶xypy je̱'e̱ tu̶gu̶'u̶bu̶ je̱'e̱ mu̶dyiibu̶ je̱'e̱ mmu̶gu'ugtu̶jk yajmayjyajtku̶xypyu̶ñ; peru̶ myajmayjyajtku̶xu̶py mu̶naa tii y je̱'e̱ mmu̶gu'ugtu̶jk je̱'e̱ tu̶gu̶'u̶bu̶ naty mmu̶dajtku̶xp, y chiiju̶tz je̱'e̱ xypyube̱jttu̶gajtzku̶xu̶ch, y du'unu̶tz tii kipxyjyaty mmu̶dajtku̶xu̶ch. 15Du'un neby je̱'e̱ Dios ñaky myu̶na'añu̶ñ: “Ka'p je̱'e̱ kyunajxu̶xu̶ je̱'e̱ mu̶dyiibu̶ najty mu̶j tu̶ yajpu̶du̶'u̶gyu̶ñ, ni ka'p tyu̶goy'ajtu̶xu̶ je̱'e̱ mu̶dyiibu̶ najty we̱e̱nu̶ tu̶ yajpu̶du̶'u̶gyu̶ñ.”

Tito y mu̶u̶d je̱'e̱ myu̶gu'ugtu̶jk ajku̶xy

16Dioskujuuyu̶p je̱'e̱ Dios ko je̱'e̱ Tito miich nandu'un xyñidaj xyñimaaygyu̶xy du'un neby u̶u̶ch miich nandu'un nnidaj nnimaaygyu̶xyu̶ñ. 17Tu̶ je̱'e̱ ku'ubú̶ky ko u̶u̶ch jim tu̶ nguexy ñú̶kxu̶ch ma miich ajku̶xyu̶ñ, y je̱' ko je̱' ku̶'u̶m xyajmayjyajtku̶xp, jada'achám jim ku̶'u̶mdzojku̶ñ ñu̶kxy ma miich ajku̶xyu̶ñ nu̶kxy xykyu'ijxku̶xy xymyu̶gápxku̶xy.

18Kipxy mu̶u̶d je̱'e̱ Tito, yam tu'ug nyajnigue̱jxku̶xy u̶u̶ch nmu̶gu'ug ajtu̶m ajku̶xy, je̱'e̱ mu̶dyiibu̶ oy yajxón yajnigápxp yajnimu̶dyaakp majaty je̱'e̱ mu̶bu̶jkpu̶du̶jk yajpaatku̶xyu̶ñ, ko oy yajxón tu̶ tyuñ kapxwa'kxy je̱'e̱ ayuuk tu̶y'ajt je̱'e̱ mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ. 19Nan je̱'e̱ mu̶bu̶jkpu̶du̶jk je̱'e̱ tu̶ win'ijxku̶xy ko ñú̶kxu̶ch mu̶u̶d u̶u̶ch ajku̶xy, y pyubé̱du̶ch ma adayaaba tuung mu̶dyiibu̶ u̶u̶ch yam nduungu̶xypyu̶ñ nyajmujkku̶xyu̶ch je̱'e̱ pube̱jtu̶ñ, neby je̱'e̱ Windzú̶n Jesucristo du'un nwindzu̶gu̶u̶yu̶mu̶chu̶ñ ajku̶xy y neby je̱'e̱ oyjyoot oywyinma'añ du'un ñi'igu̶xu̶'u̶gu̶chu̶ñ ko je̱'e̱ nmu̶gu'ugtu̶jk nbube̱jtu̶m ajku̶xy. 20Paady u̶u̶ch nime̱tzk nidu̶gu̶u̶g nwu̶dijtku̶xy ka'pu̶ u̶u̶ch pu̶n xyñi'oj xyñiyaaxu̶u̶ygyu̶xu̶ch mu̶u̶d adaa gyu̶xpu̶ ko u̶u̶ch adaa mu̶jpu̶ pube̱jtu̶ñ du'un nyajmujkku̶xy, 21y paady u̶u̶ch njoottu̶gooygyu̶xy nduungu̶xyu̶ch je̱'e̱ oybyu̶, ka'p je̱'e̱ Dios je'eyu̶du̶'ajty ijx nejwu̶u̶by nan y'ijxypy ñejwu̶u̶by je̱'e̱ ja'ay nandu'un.

22Kipxy mu̶u̶d je̱' ajku̶xy, cham u̶u̶ch tu'ug ngue̱jxnu̶ba, u̶u̶ch nmu̶gu'ug ajtu̶m ajku̶xy, je̱'e̱ mu̶dyiibu̶ je̱'e̱ Dios tyuung oy yajxón mayñax tu̶ tuunu̶ju̶ñ, jada'achám ni'igyu̶ oy yajxón tyuna'añ je̱' ko ñejwu̶u̶by neby miich mja'ay'ajtku̶xyu̶ñ. 23Pu̶nu̶ jii pu̶n mu̶du̶y yajtú̶y je̱'e̱ Tito, du'un m'adzoogu̶xu̶ch ko u̶u̶ch nmu̶gu'ug yu̶'u̶ y ko u̶u̶ch xymyu̶dtuumb ma miich ajku̶xyu̶ñ mu̶u̶d miich kyu̶xpu̶ m'oy'ajtu̶ñ ajku̶xy. Y pu̶nu̶ jii je̱'e̱ wiingpu̶ mu̶gu'uktu̶jk nandu'un mu̶du̶u̶ yajtu̶u̶gu̶xy je̱'e̱ mu̶dyiibu̶ nú̶kxku̶xpu̶ñ mu̶u̶d miich ajku̶xy, du'un m'adzoogu̶xu̶ch ko je̱'e̱ mu̶bu̶jkpu̶du̶jk je̱'e̱ tu̶ kye̱jxu̶gu̶xyu̶ y wyindzu̶gu̶u̶ygyu̶xypy je̱'e̱ Cristo. 24Y neby je̱'e̱ mu̶bu̶jkpu̶du̶jk du'un nejwu̶u̶ygyu̶xu̶chu̶ñ, yaj'ijx yajnejwu̶u̶ygyu̶x ko jaanch mdzojkku̶xy mju̶wu̶u̶ygyu̶xy, cham oy yajxón mgu'ubu̶jkku̶xy ma je̱'e̱ mju̶u̶n mdu̶jk ajku̶xyu̶ñ y wan du'un ñi'igu̶xu̶'u̶gu̶ch ko u̶u̶ch njootkujku̶ch ajku̶xy mu̶u̶d miich kyu̶xpu̶ ajku̶xy.

Currently Selected:

2 Corintios 8: MIXE

Highlight

Copy

Compare