1 Timoteo 2

U̶xpu̶jku̶ñ neby je̱'e̱ Dios mu̶baad nmu̶bu̶jktzoowu̶m

1Yu̶'u̶ njatytimyyajnu̶maaby ko mu̶yujkwaangu̶x je̱'e̱ Dios, mu̶bu̶jktzoogu̶x je̱'e̱ Dios, mu̶nukxtaakku̶x je̱'e̱ Dios y ye̱jkku̶x je̱'e̱ Dioskujuuyu̶p mu̶u̶d je̱'e̱ ja'ay gyu̶xpu̶ nigu̶xyu̶ ajku̶xy. 2Mmu̶bu̶jktzoogu̶x je̱'e̱ Dios mu̶u̶d je̱'e̱ mu̶dyiibu̶ mu̶j'ane̱'e̱mbu̶'ajtpu̶ñ ajku̶xy y mu̶u̶d je̱'e̱ tuungmu̶u̶dpu̶du̶jk y kuduungtu̶jk nigu̶xyu̶ ajku̶xy, neby mu̶baad agujk jootkujk ndzu̶naay njugy'ajtu̶mu̶ñ ajku̶xy y nwindzu̶gu̶u̶yu̶mu̶ch, ka'p je̱'e̱ tzip ma'ad maa, cham je̱'e̱ Dios oy yajxón nwindzu̶gu̶u̶y n'o'owu̶dajtu̶m ajku̶xy neby je̱'e̱ ja'ay du'un xywyindzu̶gu̶u̶yu̶mu̶chu̶ñ ajku̶xy oy yajxón. 3Adaa janch'oy adaa du'un, y je̱'e̱ Dios u̶u̶ch je̱'e̱ nniwaambu̶ nyajtzookpu̶ ajtu̶m ajku̶xy kyu'umaaby je̱'e̱ du'un. 4Chojkypy je̱'e̱ Dios ko je̱'e̱ ja'ay y'aanu̶mu̶ ni'idzooku̶ñ wan nigu̶xyu̶ paatku̶xy y ijxku̶x nejwu̶u̶ygyu̶xu̶ch je̱'e̱ Dios tyu̶y'ajt. 5Je̱' ko tu'ug je̱' je̱'e̱ Windzú̶n Dios, y tu'ug je̱' je̱'e̱ wingapxpu̶ mu̶dyiibu̶ je̱'e̱ ja'ay mu̶baad nigu̶xyu̶ yajja'ady Dios winduum. Y je̱'e̱ wingapxpu̶ je̱' je̱' je̱'e̱ Jesucristo. 6Je̱' ko je̱'e̱ Jesucristo ñayye̱jku̶ ma je̱'e̱ o'ku̶ñ, y du'un je̱'e̱ naaxwiiñjya'ay pyoky kyu̶dyeey ku̶xyu̶ kube̱jttaayu̶ y yajnejwu̶u̶y je̱'e̱ y'ayuuk tyu̶y'ajt du'un ko je̱'e̱ xu̶u̶ tiempo paaty. 7Y paady u̶u̶ch je̱'e̱ Dios tu̶ xyajni'ipú̶ky ko u̶u̶ch ngugapxy'ádu̶ch y n'apóstol'ádu̶ch, tu̶y'ajtu̶ñ je̱'e̱ du'un neby u̶u̶ch ngapxy nmu̶dya'agyu̶ñ y ka'p u̶u̶ch n'anu̶u̶'áty. Tu̶ u̶u̶ch adaa tuung xyajni'ipú̶ky ko u̶u̶ch je̱'e̱ ja'ay nyajni'ixu̶'u̶wu̶ch ajku̶xy neby je̱'e̱ Dios mu̶baad mu̶bu̶jkku̶xyu̶ñ y neby je̱'e̱ tu̶y'ajt mu̶baad nejwu̶u̶ygyu̶xyu̶ñ je̱'e̱ ka'pu̶ jyudíoja'ayu̶ch ajku̶xy.

8Du'un u̶u̶ch ndzoky ko je̱'e̱ ya'aydyu̶jktu̶jk Dios wan mu̶bu̶jktzoogu̶xy o'owu̶dajtku̶xy oytimymya'eembyu̶ch ma ñaymyujku̶gu̶xyu̶ñ, y wan mu̶bu̶jktzoogu̶xy Dios mu̶u̶d je̱'e̱ oyjyoot oywyinma'añ, y ka'p y'ama'ad jyootma'adu̶ch, nan ka'p y'adzip y'ama'adu̶ch. 9Y nandu'un u̶u̶ch ndzoky ko je̱'e̱ to'oxyu̶jktu̶jk wyit tyukxy wan adu̶yu̶ pu̶daakku̶xy, mu̶u̶d je̱'e̱ tu'uda'agy'ajtu̶ñ y yuung'ajt naaxypy'ajtu̶ñ. Wan je̱'e̱ kyu'uwaay ku'udu̶'k kaxu̶'kku̶xy mu̶du̶yu̶, peru̶ nan ka'p timyaj'anajxku̶xpu̶ch, ka'p ñayxojxu̶gu̶xu̶ch mu̶u̶d je̱'e̱ ooru̶, ni mu̶u̶d je̱'e̱ perla y ni mu̶u̶d je̱'e̱ vestido mu̶dyiibu̶ janch tzoowu̶ anaxyu̶ñ. 10Wan je̱'e̱ oybyu̶ tuungu̶xy neby je̱'e̱ to'oxyu̶jktu̶jk tyuungu̶xyu̶ñ mu̶dyiibu̶ tu'ug'aa tu'ugjoot tu̶ ñayye̱jku̶gu̶xy ma je̱'e̱ Diosu̶ñ. 11Je̱'e̱ to'oxyu̶jktu̶jk amoñu̶ je̱'e̱ mu̶baad amdo'ijtku̶xy je̱'e̱ Dios y'ayuuk tyu̶y'ajt y ka'p tii yaj'ú̶w yaj'adzowu̶u̶ygyu̶xu̶ch. 12Y ka'p u̶u̶ch ngu'ubú̶ky nu̶kxy je̱'e̱ to'oxyu̶jktu̶jk mayjya'ayjyooty yaj'u̶xpu̶jkku̶xy y nan ka'p pyadyii nu̶kxy je̱'e̱ ya'aydyu̶jktu̶jk ane̱'e̱mgu̶xy. Du'un u̶u̶ch ndzoky ko wan amoñyu̶ ijtku̶xy, 13je̱' ko jayu̶jp je̱'e̱ Dios je̱'e̱ Adán yajkojy y jak'u̶x'aam je̱'e̱ Eva. 14Y ka'p je̱'e̱ Adán yajwin'ú̶n, je̱'e̱ Eva yajwin'ú̶n, y ko yajwin'ú̶ñ mu̶'it pyokykya'ay. 15Peru̶ je̱'e̱ to'oxyu̶jktu̶jk pyaadu̶py y'aanu̶mu̶ ni'idzooku̶ñ je̱'e̱ ajku̶xy pu̶nu̶ kyuydyuundaaby je̱'e̱ du'un ajku̶xy neby je̱'e̱ Dios tzokyu̶ñ ko y'ung'ijxku̶xu̶ch, y pu̶nu̶ myu̶bu̶jkku̶xypy je̱'e̱ Dios mu̶u̶d je̱'e̱ wijy kejypyu̶ joot winma'añ y tzojk ju̶wu̶u̶ygyu̶xu̶ch je̱'e̱ myu̶gu'ugtu̶jk ajku̶xy y mu̶dajtku̶xu̶ch je̱'e̱ wa'adztzu̶naay wa'adzjugy'ajtu̶ñ ajku̶xy.

Currently Selected:

1 Timoteo 2: MIXE

Highlight

Copy

Compare