1 Juan 5

Je̱'e̱ nmu̶daaku̶ñ ajtu̶m ajku̶xy ma adayaaba naaxwiiñu̶ñ

1Ku̶xyu̶ pu̶n mu̶bu̶jkp ko je̱'e̱ Jesús je̱' je̱'e̱ Cristo, je̱' je̱'e̱ Dios y'Ung; y pu̶n je̱'e̱ ung teedy tu'ug tzojkku̶xp ju̶wu̶u̶ygyu̶xpu̶ñ nan chojku̶yu̶py je̱'e̱ y'ung y'ana'k ajku̶xy. 2Ko je̱'e̱ Dios ndzojku̶m nju̶wu̶u̶yu̶m ajku̶xy y nduunu̶mby ajku̶xy neby xy'ane̱'e̱mu̶mu̶ñ ajku̶xy, y nnejwu̶u̶yu̶mby ko nandu'un ndzojk nju̶wu̶u̶yu̶m ajku̶xy, je̱'e̱ mu̶dyiibu̶ je̱'e̱ Dios ung'ajtu̶gu̶xpu̶ñ. 3Ko je̱'e̱ Dios ndzojk nju̶wu̶u̶yu̶mu̶ch ajku̶xy ngapxymyu̶doowu̶yu̶py je̱'e̱ y'ane̱'e̱mu̶ñ ajtu̶m ajku̶xy. Y ka'p je̱'e̱ y'ane̱'e̱mu̶ñ chipjátyu̶ch neby tii chípu̶ch jyémchu̶chu̶ñ, 4je̱' ko ku̶xyu̶ pu̶n je̱'e̱ Dios ung'ajtu̶bu̶ñ myu̶madaakypy je̱'e̱ ju̶bu̶kpu̶ ya naaxwiiñ. Y je̱'e̱ mu̶bu̶jku̶ñ mu̶dyiibu̶ nmu̶dajtu̶mbyu̶ñ, je̱' je̱'e̱ mu̶daaku̶ñ tu̶ xymyooyu̶m ajku̶xy neby je̱'e̱ ju̶bu̶kpu̶ ya naaxwiiñ nmu̶madaaku̶mu̶chu̶ñ ajku̶xy. 5Pu̶n mu̶bu̶jkp ko je̱'e̱ Jesús jye̱'e̱ju̶ch je̱'e̱ Dios Ung, myu̶madaakypy je̱'e̱ ju̶bu̶kpu̶ ya naaxwiiñ.

Je̱'e̱ ayuuk mu̶dyiibu̶ je̱'e̱ Dios Ung nidu̶y'ajt'ajtpu̶ñ

6Ko je̱'e̱ Jesucristo ya naaxwiiñ y'ooy je̱'e̱ nu̶u̶ y je̱'e̱ ne'pty je̱'e̱ mu̶u̶d yaj'u̶xkajpy ko Dios Ungu̶ch, je̱'e̱ nu̶u̶ ko ñu̶u̶bejty y je̱'e̱ ne'pty ko y'o'ky; ka'p je'eyu̶ ñu̶u̶bejty, o'k nandu'un. Je̱'e̱ Espíritu Santo adaa du'un ku̶'u̶m nidu̶y'ajt'ajtp, y je̱'e̱ Espíritu Santo je̱'e̱ tu̶y'ajt mu̶dajtp. 7Tu̶gu̶u̶g je̱' mu̶dyiibu̶ nidu̶y'ajt'ajtp ko je̱'e̱ Jesús Dios Ungu̶ch:#5.7 Tu̶gu̶u̶g je̱' mu̶dyiibu̶ nidu̶y'ajt'ajtp ko je̱'e̱ Jesús Dios Ungu̶ch: nije̱' wiingpu̶ jaaybyu̶du̶jk myu̶naangu̶xy: jiiby tzajpjooty: je̱'e̱ Dios Teedy, je̱'e̱ Dios Teedy y'ayuuk mu̶dyiibu̶ mu̶gápxu̶ju̶ñ y je̱'e̱ Espíritu Santo mu̶dyiibu̶ nigu̶daaku̶ju̶ñ, y adaa tu̶gu̶u̶gpu̶ tu'ugyu̶ adaa du'un ajku̶xy. 8 Y tu̶gu̶u̶g je̱' mu̶dyiibu̶ ya naaxwiiñ nidu̶y'ajt'ajtp ko je̱'e̱ Jesús Dios Ungu̶ch. 8je̱'e̱ Espíritu Santo, je̱'e̱ nu̶u̶ ko ñu̶u̶bejty, y je̱'e̱ ne'pty ko y'o'ky. Y je̱'e̱ nidu̶gu̶u̶gpu̶ tu'ugyu̶ju̶u̶ygyu̶xp je̱'e̱ tyu̶y'ajt du'un ajku̶xy. 9Ngu'ubu̶jku̶mby je̱'e̱ ja'ay tyu̶y'ajt ko tii yaj'awingujku̶u̶ygyu̶xy ma je̱'e̱ jueez winduuyu̶ñ, peru̶ ni'igu̶ ni'igyu̶ je̱'e̱ Dios tyu̶y'ajt mu̶j chobaady, je̱' ko je̱' je̱'e̱ Dios tyu̶y'ajt nigapxp neby je̱'e̱ y'Ung Jesús jyajty y'abejtyu̶ñ. 10Pu̶n je̱'e̱ Dios y'Ung mu̶bu̶jku̶yu̶py, myu̶u̶d je̱'e̱ tu̶y'ajt ku̶'u̶m ma je̱'e̱ jyoot wyinma'añdyu̶ñ; peru̶ pu̶n je̱'e̱ Dios ka'p mu̶bu̶kyu̶ñ, du'un je̱'e̱ Dios pu̶da'agy neby anu̶u̶bu̶ju̶ñ je̱' ko ka'p je̱'e̱ tu̶y'ajt mu̶bu̶ky mu̶dyiibu̶ je̱'e̱ Dios tu̶ nigapxy neby je̱'e̱ y'Ung Jesús jyajty y'abejtyu̶ñ. 11Adaa tu̶y'ajt xyajnejwu̶u̶yu̶mb ko je̱'e̱ Dios jugy'ajt wiinu̶u̶xu̶u̶bu̶ tu̶ xymyooyu̶m ajku̶xy, je̱'e̱ mu̶dyiibu̶ ka'p nimu̶naaxu̶u̶ kyu̶xy tyu̶goyu̶ñ, y adaa jugy'ajt jim je̱'e̱ yajpaady ma je̱'e̱ y'Ung Jesucrístoju̶ñ ko je̱'e̱ y'Ung Jesucristo nmu̶bu̶jku̶yu̶ch ajtu̶m ajku̶xy. 12Pu̶n je̱'e̱ Dios Ung mu̶bu̶jkp, nan pyaadu̶py je̱'e̱ jugy'ajt wiinu̶u̶xu̶u̶bu̶ nandu'un; peru̶ pu̶n je̱'e̱ Dios Ung ka'p mu̶bu̶kyu̶ñ, ka'p je̱'e̱ jugy'ajtu̶ñ wiinu̶u̶xu̶u̶bu̶ paadu̶ch.

Wingapx ju̶jpkapxu̶u̶yu̶ñ mu̶dyiibu̶ ku̶jxp maayñu̶byu̶ñ

13Cham adayaaba naky nyajnijayu̶u̶ygyu̶xy miich mu̶dyiibu̶ je̱'e̱ Dios Ung mu̶bu̶jkku̶xpu̶ñ, wan du'un mnejwu̶u̶ygyu̶xu̶ch ko je̱'e̱ jugy'ajt wiinu̶u̶xu̶u̶bu̶ mmu̶dajtku̶xy.

14Nmu̶dajtu̶mby je̱'e̱ jootkujk'ajt ma je̱'e̱ Diosu̶ñ, je̱' ko nnejwu̶u̶yu̶mby ko naty tii n'amdoowu̶ ajtu̶m ajku̶xy, xymyooyu̶mu̶p je̱'e̱ ajku̶xy du'un neby naty xyajmu̶dzojku̶mu̶ñ ajku̶xy. 15Y du'un neby nnejwu̶u̶yu̶mu̶ñ ajku̶xy ko je̱'e̱ Dios nmu̶bu̶jktzoowu̶ñ xy'amdoo'ijtu̶ ajtu̶m ajku̶xy, nan nmu̶dajtu̶mby je̱'e̱ tu̶y'ajt ajtu̶m ajku̶xy ko xymyooyu̶mu̶ch je̱'e̱ mu̶dyiibu̶ naty tu̶ n'amdoowu̶yu̶ ajtu̶m ajku̶xy.

16Pu̶nu̶ jii je̱'e̱ myu̶gu'ug pu̶n ixy ko pyokytyúñ, je̱'e̱ poky mu̶dyiibu̶ je̱'e̱ Dios mu̶baad mekxyu̶ñ, wan je̱'e̱ Dios mu̶bu̶jktzóy mu̶u̶d je̱' gyu̶xpu̶, y winme̱kxu̶u̶ju̶p je̱'e̱ Dios, pu̶nu̶ je̱'e̱ poky naty tu̶ tuñ mu̶dyiibu̶ je̱'e̱ Dios mu̶baad mekxyu̶ñ. Jii poky mu̶dyiibu̶ je̱'e̱ Dios ka'p mu̶baad mekxyu̶ñ y ka'p u̶u̶ch je̱'e̱ du'umbu̶ poky yam ndijpy ko je̱'e̱ Dios mmu̶bu̶jktzoogu̶xu̶ch mu̶u̶d je̱'e̱ du'umbu̶ poky. 17Ku̶xyu̶ je̱'e̱ ju̶bu̶kwinma'añ poky je̱'e̱. Peru̶ jii poky mu̶dyiibu̶ je̱'e̱ Dios myekxypyu̶ñ.

18Nnejwu̶u̶yu̶mby ko pu̶n je̱'e̱ Dios Teedy Teedy'ajtp, ka'p je̱'e̱ pyokytyúñ, je̱' ko Dios Ung je̱'e̱ kueentu̶'ajtu̶p, y ka'p je̱'e̱ ju̶bu̶kpu̶ ka'a'óybyu̶ myu̶wa'añyii. 19Nnejwu̶u̶yu̶mby ko je̱'e̱ Dios xy'ung'ajtp ajtu̶m ajku̶xy y ko je̱'e̱ naaxwiiñjya'ay je̱'e̱ ju̶bu̶kpu̶ ka'a'óybyu̶ ku̶xyu̶ y'ane̱'e̱mu̶gu̶xyu̶. 20Nan nnejwu̶u̶yu̶mby nandu'un ajku̶xy ko je̱'e̱ Dios Ung ya naaxwiiñ tu̶ y'oy y tu̶ je̱'e̱ wij'ajt ke̱j'ajt xymyooyu̶m ajku̶xy, neby je̱'e̱ jaanchpyu̶ Dios y'ayuuk tyu̶y'ajt nnejwu̶u̶yu̶mu̶chu̶ñ ajku̶xy. Tu'ugyu̶ du'un n'ijtu̶m ajku̶xy mu̶u̶d je̱'e̱ mu̶dyiibu̶ tu̶y'ajt mu̶u̶du̶ñ, je̱' u̶u̶ch du'un ndijpy, je̱'e̱ y'Ung Jesucristo. Y adaaju̶tz je̱'e̱ jaanchpyu̶ Dios y je̱'e̱ mu̶dyiibu̶ je̱'e̱ jaanchpyu̶ jugy'ajt wiinu̶u̶xu̶u̶bu̶ ye̱jkpu̶ñ. 21“Mu̶gu'uktu̶jk mu̶dyiibu̶ u̶u̶ch du'un nju̶wu̶u̶by neby je̱'e̱ ung ana'ku̶ñ, naygyweentu̶'ajtu̶gu̶x, ka'p oy tii oy pu̶n mdios'ajtku̶xu̶ch, je̱'e̱ mu̶dyiibu̶ ka'p jaanch dyiosu̶chu̶ñ ajku̶xy.

Currently Selected:

1 Juan 5: MIXE

Highlight

Copy

Compare