প্রেরিত 10
10
চঃ সুরুয়ি আগ্রি কর্ণীলিয়
1কৈসরিয়া ম্রুমা কর্ণীলিয় নাঃমিনা লুঃউ তয়ক ঈটালীয় চঃ সুরুয়ি আয়ক তাঃরা আঃথাকমা আগ্রি হিকলিরি। 2য়াংসুউ যিহুদী মুহুকিলি, থাওরা ফুরাগো রুসিঃসা হিকলিরি অর য়াংসুউনা ঈংসারো আলুংসুউলি থাওরা ফুরাগু ওয়িপাসানা রুক্কেতি। য়াংসুউ ছাংরিসারোগু আম্যা তেংগা পয়স্যা ল্হুরি অর থাওরা ফুরাবামা খ্যাংখামুছু ছুউক তংলিরি। 3তারাক ঞ্যজাঞ্যং সুং নাঃরি আখিংমা য়াংসুউ তুুখু কুঃদৈং আম্রাং রালিরি। য়াংসুউচা দিকথা ডেংমা ম্রাংলিরিচাগা, থাওরা ফুরা তেমেংদ তয়ক লাঃরো য়াংসুউগো খঃরি, “কর্ণীলিয়।”
4কর্ণীলিয়চা ক্রকরো য়াং থাওরা ফুরা তেমেংদ দুঃ ক্রিরো প্রলিরি, “আস্যাং, প্রবা।”
থাওরা ফুরা তেমেংদচা প্রলিরি, “নাং ছুঃউক তংচানা ছাংরিসারোগু ল্হুচা, থাওরা ফুরাফুংমা রকব্যা অর থাওরা ফুরা য়াংচাগো ম্হেরো থাঃব্যা। 5নাং আগু যাফু ম্রুদুঃ লুঃউ রুওয়েলৈ অর শিমোন, যাসুগো অরতিমি খঃরি পিতর, য়াংসুউগো খঃ য়ুখি। ম্রঃনামা অরতয়ক শিমোন নিংরি। 6য়াংসুউ আঃরি কুং প্রুত্তি। পিতরচা য়াং শিমোন ঈংমা হিরি।”
7যা থাওরা ফুরা তেমেংদচা কর্ণীলিয়না চাঃগা প্রলিরিলি, য়াংসুউ লাঃব্রিনক কর্ণীলিয়চা নৈয়ক আঙাসানা অরতয়ক আঃকু ঞিং পিঃসাগো খঃলিইরি। য়াং সুরুয়িচা থাওরা ফুরাগো রুসিঃসা হিকলিরি। 8আলুং চাঃগাগো নাঃলিঅং প্রব্রিনক কর্ণীলিয় য়াংসুউরোগু যাফু ম্রুদুঃ রুওয়েলৈ লিরি।
পিতর কুঃদৈং ম্রাংচা
9নক্কা রাকমা যাখা থুউ লুঃউরো যাফু ম্রুদুঃ লাঃখা য়াংখা মুওয়েংদি তিছি নৈখ্যাক লক তিব্যা। পিতর ছুউক তংফু কিজু য়াংখা ঈংখংদুঃ তাকলিরি। 10য়াংখা পিতর কংগং মুওয়েলিরি অর তুখুমাঃসা চাঃফু ক্রিলিরি। যাখা আঃচা য়াংগেতি য়াংখা পিতরচা ওয়িমঃপাবঞ্যং হিকলিরি। 11য়জং হিরি অাখামা য়াংসুউ ম্রাংলিরি, গংখাংচা লঃ লাঃখাব্যা অর পুছুঞ্যং তুখুগো লিঃথংগা কৈরো, কাবাদুঃ খ্যাগেতি। 12য়াং পুছুমা হিকলিরি আঃলুঃউং সুদুঃওয়া, রাংফেনা লাঃচা সুদুঃওয়া অর ঙাক। 13য়াং নক য়াংসুউ ক্রালিরিচাগা যাসু মিঃসি য়াংসুউগো প্ররি, “পিতর, থাআঃ, দিঃচারোগু সেঃরো চাআঃ।” 14পিতর প্রলিরি, “আস্যাং, ঈঃহি, ঈঃহি, তাখ্যাকপাং মাঃচা। মকংদ্রানা সেসেং মুহুচাগো ঙা তাখালি মাঃচাসি।” 15য়াংখা য়াংসুউ প্রেংরো ক্রালিরি, “থাওরা ফুরা ঈঃ যাচাগো সেসেং প্যাংলিরি, নাং য়াংচাগো সেসেং মুহু মঃপ্রগি।” 16দিঃ পুয়েং সুংখক প্রব্রিনক, থুউ পুছুগো গংখাংদুঃ তাং য়ুউ লাঃখারি। 17পিতর ম্রাংলিচা ঈংমাক আঃদিপিচা যা ফ্রফুলি, য়াংচাগো য়াংখালি ছাংখ্রাংলিরি; য়াং আখিংমা কর্ণীলিয় রুওয়েলৈচা লুঃউরো শিমোন ঈংগো রাআঃ রাঃরো লেংখাওয়া হ্রিইগা রেঃক্কেরি। 18য়াংনক য়াংসুউরো খঃরো মিংগেরি, “শিমোন, যাসুগো পিতরলি খঃরি, য়াংসুউ দিঃমা নিংরি লঃ?” 19পিতর য়াংখালি ঈংমাকমা ম্রাংচাগো য়ুউরো ছাংখ্রাংরো হিকলিরি, য়াং আখিংমা সেংস্যাংস ওয়িঞেংচা য়াংসুউগো প্রলিরি, “ক্রি, লুঃউ সুংয়ক নাংকু রাঃগেতি। 20থাঃরো অকতু লাঃলি। তুখুপাং মাচেংজাব্রি, য়াংসুউরো নক্কা লঃলি আক্রংগা ঙা য়াংসুউরোগু রুওয়েলৈতি।” 21য়াংখা পিতর অকতু সাকরো য়াং লুঃউরোগু প্রলিরি, “কুবাংরো যাসুগো রাঃআগেতিলি, য়াংসুউ ঙা। কুবাংরো যাফু লাঃগেতিলি?” 22য়াং লুঃউরো প্রগেলিরি, “চঃ সুরুয়িমা আগ্রি কর্ণীলিয় ঙারোগু রুওয়েলৈতি। য়াংসুউ তয়ক সুদঃগং লুঃউ অর য়াংসুউ থাওরা ফুরাগো রুসিঃরি। হিচা আঃলুঃউং যিহুদীরো য়াংসুউগো আকং প্রগেতি। থাওরা ফুরা ঈঃ তয়ক তেমেংদ য়াংসুউগো আনাঃ পিইলিরিচাগা, য়াংসুউ কুবাংগো ঈংদুঃ খঃ য়ুলাঃরো কুঃবাং চাঃগাগো নাথংবেচি।” 23য়াংখা পিতর য়াং লুঃউরোগু ঈংদুঃ খঃ য়ুলিরি অর য়াংসুউরো নিংফুচানা চাঃফু সকফুচা য়াংলিরি। কর্ণীলিয় ঈংমা পিতর। নক তারাকখা পিতর য়াং লুঃউরোনা আতু লাঃলিইরি। যাফু ম্রুগা লৈংগায়ক ক্যুংসারোলি য়াংসুউ নক্কা লঃক্কেরি। 24য়াংনক য়াংসুউরো কৈসরিয়ামা রক্কেলিরি।
য়াং আখিংমা কর্ণীলিয়চা য়াংসুউ ম্যুসা ছুয়িসানা আফু আফাক্কু তেরে তৈংমা খঃরো য়াংসুউরো কিজু চংগেলিরি। 25পিতর যাখা ঈংদুঃ ওয়ংলিরি, য়াংখা কর্ণীলিয়চা য়াংসুউ আখ্রিরাংমা ওয়েরো থাওরা ফুরা ঈঃ রুসিই তাঃরা পিরো হ্রি খুঃলিরি। 26য়জংছুগি পিতর য়াংসুউগো থুউরো প্রলিরি, “থাঃআ, ঙাগা কুঃদৈং লুঃউ তয়ক।” 27কর্ণীলিয়না চাঃগা প্ররো প্ররো পিতর আঃথিমা লাঃরো ম্রাংলিরি, য়াংদেমা আম্যাগ্রি লুঃউ চুক্কেরো হিরি। 28য়াংখা পিতর য়াংসুউরোগু প্রলিরি, “কুবাংরোগা সিঃরি, তয়ক যিহুদীগা নিংরো অরতয়ক যিহুদীমুহু লুঃউনা পংফুচানা য়াংসুউনা আতুয়ি খেংফুচা ঙারো বাসা থুংজৈংমা ছেংগ্যাংফাক ফ্রতি। ছুগি থাওরা ফুরাচা ঙাগো প্রালিইরি, তয়ক্কুলি মাসেংনা মকৈংরা ছুরো প্রফুচা ঙামা মাসাং। 29য়াংচা কিজু যাখা কুবাংরো ঙাগো খঃফু রুওয়েলৈতিলি য়াংখা ঙা তুখুউলি মপ্রব্রি লেঃতি। ঙা আগু মিংরি, কুবাংরো যাফু ঙাগো খঃফু রুওয়েলৈতিলি?”
30য়াংখা কর্ণীলিয়চা প্রলিরি, “লিঃরাক হ্রিঃগা, দিঃ আখিং সুংনারিমা, ঙা ঙাক খেংমা ছুউক তংলিরি। য়াং আখিংমা ব্রুংখনৈং প্যাংরো আড়ং থুঃউঅক আওয়ে ওয়েরো লুঃউ তয়ক ঙা হ্রিঃগা রেঃরো প্রলিরি, 31‘কর্ণীলিয়, থাওরা ফুরা ঈঃ নাং ছুঃউক তংচাগো ক্রাব্যা অর ছাংরিসাঃরোগু ল্হুচাগো চিঃমা ম্হেথাব্যা। 32নাং আগু যাফুদুঃ লুঃউ রুওয়েলৈ। অর শিমোন যাসুগো পিতরলি খঃরি, য়াংসুউগো খঃ য়ুখি। ম্রনামা যা শিমোন নিংরি অর য়াংসুউ সিকরি কুং প্রুত্তি পিতর য়াংসুউরো ঈংমা গরবা ফ্ররো হিরি।’ 33য়াংচা কিজু ঙা খ্যাং খ্যাং কুবাংগো খঃ য়ুফু কিজু লুঃউ রুওয়েলৈতি। অর কুঃবাং লাঃরি কিজু কংগং আকং ফ্ররি। ঈদেমা ঙারো আলুংসুউ আগু থাওরা ফুরা ঈঃ হ্রিঃগা হিরি। আস্যাং কুবাংগো যা প্রফু ঙারোগু আঃনা পিইলিরিলি, য়াংচা আলুংচাগো ঙারো নাথংফু।” 34য়াংখা পিতর প্রফু চাঃলিরি, “ঙা আগু আম্হেং সিকরিচাগা, থাওরা ফুরা ঈঃ ম্যাকচিমা আলুংসুউ তিঙিংদৈংব্যা। 35হিচা লুঃউ জেম্যুউগা যাসুরো য়াংসুউগো রুসিঃরি অর য়াংসুউ ম্যাকচিমা যা সাংরি য়াংচাগো লুক্কি, য়াংসুউ য়াংসুউরোগু লাঃক খেংরি। 36থাওরা ফুরা ঈঃ ঈস্রায়েলীয়রোদুঃ আকং সাদাং রুওয়েলিরিচাগা, যীশু খ্রীট, যাসু আলুংসোমা আস্যাং, য়াংসুউগা আতুওয়ংগা নিংরোরা আখেংসা রাঃরি। 37লুঃউরো রিইখ্যু মাঙ্গালাগু লাঃক খেংরাফুচাগু যোহন য়াং চাঃগাগু হঃ প্রালিইরি নক গালীলগা চাঃরো হিচা আলুং যিহুদীয়ামা যা প্রাসানা ফ্রলিরি, য়াংচাগো কুবাংরো কুঃদৈং সিকগেতি। 38কুবাংরো দিঃচাগো সিঃরি, থাওরা ফুরা ঈঃ নাসরতমা যীশুগো সেংস্যাংস ওয়েঞেংনা গুংধ পিরো আগ্রি ম্রকলিরি। থাওরা ফুরা ঈঃ য়াংসুউনা হিকলিরি কিজু য়াংসুউ আকং অলুঃউঃউউ লুঃউঃউউরো পেলিরি অর যাসুরো মকং নেঃকা দুঃখাওয়া রাঃগেতি, য়াংসুউরোগু কেইংমাজিলিরি।
39“যিহুদীরো প্রিমা অর যিরুশালেংমা য়াংসুউ যা লুকলিইরি, ঙারো য়াংদেমা সাকসি। লুঃউরো য়াংসুউগো থুউ খেঃরো সেঃ বৈকেরি। 40য়জংছুগি থাওরা ফুরাচা সুংরাকমা য়াংসুউগো আঃসিগা আহ্রাং প্যাংরো তাংলিরি অর লুঃউরো য়াংসুউগো ম্রাংলৈঅং প্যাংলিরি। 41য়িগিলি আলুংসুউ য়াংসুউগো মাম্রাংগেলি, ছুগি থাওরা ফুরাচা যা সাকসিরোগু হ্রিইগা রুঈকক য়ুলিরি, য়াংসুউরোরা য়াংসুউগো ম্রাংগেরি। প্রফুছুগি য়াংসুউ আঃসিগা হ্রাং থাঃরি নক ঙারো যাসুরো য়াংসুউনা আতু চাঃগেরি সক্কেরি, ঙারোনা য়াংসুউগো ম্রাংগেরি। 42য়াংসুউ ঙারোগু আঃনা পিইলিরিচাগা, যিহুদীরোমা লাঃরো হঃ প্রাগেলি অর সাকসি পিগেলিচাগা, থাওরা ফুরা ঈঃ য়াংসুউগো আহ্রাংনা আঃসিরো আঃপমা তাঃরা চৈস্যাং ছুরো আঃরা পিইলিরি। 43হিকচা আলুং রিসিইরো য়াংসুউ আক্রলিলাগো য়ুউরো সাকসি পিগেচাগা, য়াংসুউ আঃপমা যাসুরো ক্যুংগেতি য়াংসুউরো তয়ক মক্যুং য়াংসুউ গুংদনা আপ্রইকা খুওয়ংরাফু।”
44পিতর য়াংখালি চাঃগা প্ররিসি, য়াং আখিংমা যাসুরো য়াং চাঃগাগো নাথংগেতি, য়াংসুউরো আলুংসুউ আঃপমা সেংস্যাংস ওয়িঞেং লেঃলিরি। 45যা ক্যুংসা যিহুদীরো পিতরনা আতু লেঃলিরি য়াংসুউরো যিহুদী মুহু লুঃউরো আঃপমালি সেংস্যাংস ওয়িঞেং লাঃচাগো ম্রাংরো কংগং এংঅগেলিরি।
46য়াংসুউরো য়াংচাগো সিকগেলিরি, আক্রংগা দিঃ যিহুদী মুহু লুঃউরোচা আখ্রা আখ্রা আঃমু প্রচাগো অর থাওরা ফুরাগো খিম্যুংচাগো ক্রাগেলিরি,
47য়াংখা পিতর প্রলিরি, “রিইমা রিঃখ্যু মাঙ্গালা য়ুফু কিজু দিঃ লুঃউরোগু যাসু ছিঃরো থাঃফুলি? য়াংসুউরোগা ঙারোঞ্যং তেথেং সেস্যাংস ওয়িঞেংগো রাঃগেব্যা।” 48য়াংখা পিতরচা য়াং লুঃউরোগু যীশু খ্রীট্ নাঃমিনা রিঃখ্যু মাঙ্গালা পিফু আঃনা পিইলিরি। নক্কা য়াংসুউরো পিতরগো য়াংসুউরোবামা লৈগারাক নিংফু কিজু আতবেং থাঃগেলিরি।
Currently Selected:
প্রেরিত 10: BBSRMZ
Highlight
Share
Compare
Copy
Want to have your highlights saved across all your devices? Sign up or sign in
