Marka 4
4
Khaici Vawhpa Thugentehna
1Khatvei Zeisu in tuili geiah thu a hilh lai takin, mihonpite a kiangah kikhawm uh a, amah in tui gei nai-ah a om gunkuang tungah tuangin a tu hi. 2Mihonpite in tuili geiah lei tungah a om uh hi. Zeisu in thugentehna tawh thu tampi hilh a, a thuhilhna sungah a gen-inah, 3“Ngai un, khaici vawhpa in khaici vawh dingin a kuankhia hi. 4Khaici a vawh lai takin kimkhatte in lampi geiah kia a, vasate hong pai-in, tawmin a ne uh hi. 5Kimkhatte in lei tam lohna suang lakah kia a, lei a dai manin a po pah hangin, 6ni suak a, a sat ciangin zung kha zo lo ahih manin a vulgawp hi. 7Kimkhatte in ling lakah a kia hi. Ling kungte khang uh a, dep gawp uh ahih ciangin a gah kei hi. 8Kimkhatte in lei hoihna-ah kia a, po-in khang a, a zah sawmthum, a zah sawmguk, a zah zakhat a gah hi. 9Zak nading bil a nei teng in za ta un!” a ci hi.
Thugentehnate A Deihna
10Zeisu in gam daina-ah a om lai takin, sawm-le-nihte tawh a kimkot a omkhawmte in thugentehna a dong uh hi. 11Zeisu in, “Pasian’ Gam thu theih hakte na theih nadingun thu hong pia hi. A pua lam a omte ahih uh leh, kikheela amau mawhna uh a kimaisak loh nadingin, 12amau enin, a en napi-un a mu kei ding uh a; ngai-in, a ngai napi-un a khiatna thei lo ding uh ahih ciangin, amaute thugentehna tawh ka hilh hi.”
Zeisu In Khaici Vawhpa Thugentehna Tel Gen
13“Note in hih thugentehna thei lo na hi uh hiam? Na theih kei uh leh, thugentehna khempeuh bangci theih ding na hi uh hiam? 14Khaici vawhpa in thu a vawh hi. 15Lampi geiah khaici a kiate in, thu a zak uh ciangin thakhatin Satan hong pai a, amau sungah a kivawh thu a lakkhiatte ahi uh hi. 16Tua mah bangin, suang lakah a kiate in thu a zak uh ciangin, lungdamin a mang pah uh hi. 17Amaute sungah zung kha lo uh ahih ciangin, tawlkhat kikal bek a kip uh hi. A thu hangah gimna ahi zongin, bawlsiatna ahi zongin a thuak uh ciangin thakhatin a puk uh hi. 18Ling lakah a kiate in, thu a zak uh ciangin leitung lunghihmawhna, 19sum leh pai khemna leh, adang deihgawhna lutin thu depgawp a, gah zo lo uh hi. 20Lei hoihna ah a kiate in thu a zak uh ciangin mang uh a, a zah sawmthum, a zah sawmguk, a zah zakhat a gah thei ahi uh hi,” a ci hi.
Seeng Nuai-ah Meivak
21Zeisu in, “Meivak kho sangah vak loin, seeng khuh ding ahi zongin, lupna nuai-ah koih ding ahi zongin hong kitawi ahi hiam? 22A kilak ding longal, a kibu bangmah om lo hi. A kilang ding longal, a ki-im bangmah om lo hi. 23Zak nading bil a nei mi khatpeuh a om leh, za ta hen,” a ci hi.
24Zeisu in, “Note in bang na ci zak uh hiam ci-in na kikeem ta un. Midangte na piakna uh seeng mahin no zong hong kipia kik ding a, a tam zawin a hong pia ding hi. 25Bang hang hiam na cih uh leh, a neite a kipiak beh ding hi. A nei lote kiang pan a neihsa nangawn a kilakhia ding hi,” a ci hi.
A khang Khaici Thugentehna
26Zeisu in, “Tua ahih ciangin Vantung Gam in, mi khat in lei tungah khaici a vawh tawh kibang hi. 27Sun tawh zan tawh tua pa ihmu zel, tho zel a, ama theih lohin a kung po a, hong khangto hi. 28Lei in ama thuin gahsak hi. A masa belin a kung, tua khit ciangin a vui, tua khit ciangin a vui sungah gah taksa a piang thei hi. 29A gah a min ciangin, thakhatin ama phiaukawi tawh a at hi. Bang hang hiam na cih uh leh, taang lak hun a tung zo hi,” a ci hi.
Ankam Tang Thugentehna
30Zeisu in, “Pasian Gam bang tawh ka genteh ding hiam? Bang thugentehna tawh ka lak ding hiam? 31Ankam tang tawh a kibang hi. Ankam tang lei-ah a kicin’ lai takin, leitungah a om tang khempeuh lakah a neupen hi. 32Ahih hangin a kicin’ khit ciangin khang a, ankung khempeuh sangin gol zaw a, vanah vasate in a lim belh dingin hiang gol a meeng thei hi,” a ci hi.
Zeisu In Thugentehna A Zatna
33Zeisu in tua bang thugentehna tawh amaute in a theih zawh nadingun thu a hilh hi. 34Thugentehna loin thu a hilh kei hi. Ahih hangin thu khempeuh gam daihna-ah a nungzuite a hilh hi.
Zeisu In Huihpi Daisak
35Tua ni, nitak ciangin Zeisu in a nungzuite kiangah, “Gal khatah pai ni,” a ci hi. 36Amaute in mihonpi nusia-in paikhia uh a, gunkuangah amah a om bangin amaute in Topa tawh tuang khawmin a pai uh hi. Gunkuang dangte zong amau tawh a paikhawm uh hi. 37Tua lai takin huih nakpi nung a, tui kilok in gunkuang kipap a, gunkuang sungah tui a dim hi. 38Zeisu in gunkuang tawlam lukham tungah a ihmu hi. Amaute in phong uh a, “Topa aw, kote kisiat ding nong awi hiam?” a cih uh ciangin 39Zeisu thoin huihpi taai a, “Dai in,” ci-in thu a piak ciangin huihnung tawpa a dai pah hi. 40Tua lai takin Zeisu in, “Note in bang dinga lau na hi uh hiam? Upna nei lo na hi uh hiam?” ci-in a dong hi. 41Amaute in lau mahmah uh a, “Hih pa in kua mi ahi hiam? Huih leh tuipi nangawn in a thu ngai tazen uh hi,” ci-in khat leh khat a kikum uh hi.
Currently Selected:
Marka 4: TB77
Highlight
Copy
Compare
Share
Want to have your highlights saved across all your devices? Sign up or sign in
Tedim Bible © Bible Society of Myanmar, 1977.
