SHOLAMON NGHAUI" CAUNG: 1
1
1Sholamon yang tung" ra" yaung" shab: thao" nghaui" caung: jham-
Dalam: Ein: Lam: nghaui" caung:
Zoqae: myhi"
2Ni" nhad' qid: yang ngore bobaug baug: ra".
Ni" jhid'de; myid wa sabyi qang: tho' je: gai: ra".
3Ni" gaung wa sheim nae pyo" ra"
Ni" mang thoe wa aire myid: beim: nhao: ra".
Myiqe: khoyaug re: nao re majhid'de, lo: maqo" na-
4Ngo re nao we' daga" jhui: la,- nga" shid' tao va: khyo phao lang:-
nga" kho:kham boe" mung: ngore ni" qe, khyo jhui" lo" la,.
Nga" shid' zo: daga" za: pyo" na lang:-
myo: sho' shaug' mung: jho" ngaui: na lang:
nao re myiqe: alhab' mo, jhid'de; ru wa pe" mug' cang mabo lhe".
5Yerusalem mae" myiqe: qe we"-
ngo wa sho: no, ngadqere: yaung" lhe" Keda mae" din"pyad' yo mae jo; ra" zaung jham we' dakhyo: no, ngadqere:
Sholamon nho: kho:kham yham mae" qe,kyo pin: lung: we' dakhyo: yaung" ra".
6Nga" sho: re qu" mung: daqu" ngai: pye'
ba zho yang: ngore sho: no, nhao: ra" mathao mae ngore daqu" qid: pye'.
Nga" mao: bam wa ngore nhag' yo: mung: sabyi khyae mae mau" zaui: nhao: ako".
Nga" gaung re gun caung nae" ayo, maqo"-
7Ngo re ta" kyo: la,- nga" jhid' we"
ni" cad' yao kyaung" re khai: mae yezam: nae" i?
Aijham re na" gaung ba laung: rumae" khai: mae jhui" thang nae" i?
Gatau: cad' yao zam: mo; cad' yao kyaung" phaung agaung: mae pe"mung: nao re ngo cao" qho ca" nae" i?
Zoqae: pho"
8Ai: jo, qo re nao maba i? myiqe: qemae" yaung" thao" yaug we"-
cad' yao kyaung" jham: thao cao" ye: wa,
yao zaung" mo; nho: zaung nhae mae ni" nho: cad' be, jham: qhid' mae" mhin: gyo, jao: yeqho: yu wa,.
9Nao- nga" jhid' nao we"
Phara-u nho: myao: lhin" jham mae" myao: lo: jham re lhau: zhung" ke' ra" myao: myhi" we' dakhyo: nao wa yauggai qere lhau: zhung" ke' ra".
10Ni" nho: xae jham wa ni" boqae dao mae gyai yaung" jo; ako".
Aiwa ni" lang zang: cao" yang: phug' de; ra" laug ru: gyo" jo; ra".
11Ngadqere: ngonhaung" wa ni" qhid' mae" ngaui: yang shaung: pye' ra" qhang qui: kad' byid: nae".
Zoqae: myhi"
12Nga" nho: kho:kham wa yao" jaung: dao mae lang" jo; ra".
Aimung: nga" nho: nae pyo: xau wa gyai nae pyo" jo; ra".
13Nga" zoqae: pho" wa nga" nug' cug am mae lang" jo; au:- Mura sheim nae pyo" ra".
14Nga" zoqae: pho" wa Engedi mae" sabyi khye jham mae bu" yaung" jo; ra" seyo: bin: bu" we' dau: ra".
Zoqae: pho"
15Nga" jhid'de; myhi" we" nao wa yaung" thao" va" lhe"-
Ni" nho: myo,jid' jham wa jhid'de; myid: yang bao: jo; ra".
Zoqae: myhi"
16Nga" nho: jhid'de; thao" yaug we"- nao wa yaung" thao" va" lhe"-
Nao wa ngore qu" ngaui: ra".
Mhin: nyhug wa nga" shid' tao: nho: yab jaung: boe" li" nae".
17Arid shaug' jham wa nga" shid' tao: nho: yham mae" sag' qhang boe" li" nae"- qhoje; sag' gae jham wa khaung kyo ngad nae".
Currently Selected:
SHOLAMON NGHAUI" CAUNG: 1: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009