OBADIA 1
1
1Ce wa Obadia ta" ra" Edom we' sin: mung: kheim: so' Asang mae" lapa dao: ngad: ra".
Asang Edom Re Qobo Byid: Nae"
Asang wa yao" lagyo: re mung"dan: jham khyo nhao: ke' ra".
Amung: yao" lau dao: re ngonhaung" the' gyo" ru wa- seim" jin" ge,- Edom re mang: yezin: gelang:-
2 Asang wa Edom re ta" ra"- ngo nao re qam: nang: nhao nae".
Yaug khao: ngo" yang nao re qu" nghang: genae".
3Ni" ngad beim: myid wa- nao re mhug' pyag' ava". Ni" vomo" wa laung: mo" baui dao: mae" gyetab ngad: ra".
Ni" vomo" wa laung: mo" baui dao mae" gyetab vang ngad: ra". Ni" yham wa myhao: ra" bam dao mae ngad: ra". Aimung: ngo re khag' yang qo" lao" khyo" pye' nae" i?- ga: naoyao" gaung re nao ta" ra".
4Nao wa ni" yham re zeim baung: sad' qhi" myhao: thao" mae qo" kad' to mung: sho' ngadqere: kyi jham: agyo: mae jo, nhohab ngad sho' ngadqere: ngo wa nao re lao" phyid' khyo" pye' byid: nae".
5Myi" mug: cad' mae khug' mo, li" re yao: bam o: ra" ja: za: ayu: lo" ako". sabyi phyo' mo, wa khonhae" re: dajhid' lhaung" tang" to" ako".
Ngadqere: ni" gyevo jham wa nao mae pe" madang losho' alhab' jhad' za: paui: yu: pye' ako".
6Eso ra" myid:zo: qe we"- naonhaung" nho: jo,nho" re lhad' pye' byid: vako" ra".
7Ni" myid: vang" ba nam qe wa- nao re mhug' pyag' avako" ra". Yao: bam wa nao re ni" mug: mae" khe' thug' pye' avako".
Nao we' yaug yo taung" zam" khug: lo, mo, wa ana" nao re aung: yu: pye' avako". Nao we' daga" zo: shaug' lo: ra" ba nam qe wa ni" qhid' mae" lha" thaung: to" avako". Yao: bam wa ni" khyo re yao" laba lajhao khai: lo" va" laug i? ga: ta" ako".
8Edom re ngo qobo dae byid' ra" ba na mae yao: bam: ra" sulhe: qere ngo phyo' sin" pye' mung: yao: bam: pha,jhi" re baui" byaug nhao nae".
9Teman mae" gyekhe' mo, wa gyaug: byaug: genae".
Edom mae" gyezo: yaug khao: ngo" wa se' pye' ru qhug' genae".
Edom Re Qobo Dae Byid' Ra" Khyo
10Yaku ra" myid:zo: ni" mao: nhaung qere nao lhad' zo: mung: se' pye' ra" mathao mae nao re phyo' sin" pye' ru qhug' mung:
apyad ato nga: yeim: ru qhug' nae".
11Yao: bam: vomo" kham: jham re gyevo qeyang phyo' pye' ra" ba na mae nao wa ayae mae za: qu" ye; jo; ra".
Nao wa Yerusalem nho: jo,nho" re lhad' yu mung: yao: bam yao" phaung mae jho" gae ngho" pye' ra" byubang" qe we' dakhyo: za: makhyang: ngad: ra".
12Yuda mung" mae" ni" mao: nhaung: qe qug: khai: qhug' rure nao magai: qu" ngaui ang ngad: ra".
Yao: bam byo; qeim: ra" ba mae nao magai: bau: ang- yao: bam nhag' ngai: au: re nao qi nae" maang ngad: ra".
13Yao: bam qug: khai: de, zo" na ra" ba re nao wa yao: bam: vogaung: khug' khyo vao ye: mung: yao: bam dae no: na: rure magai: qu" ngaui ang ngad: ra".
Yao: bam: jo,nho" rere: malhad' yu ang ngad: ra".
14Phao: loe, nae" seim" mo, re taung: nae" qhid' mae" nao wa khyokao: jham mae maye: lham: na ang-
Yao: bam nhag' ngai: ra" ba na re nao wa yao: bam re gyevo qe: lo, khyo maye: ab pye' ngad: ra".
Byumyu" Mung"dan: Jham Re Mao"So Dao: Kho' Nae"
15Byumyu" mung"dan: alhab' re ngo Asang: yang dao: kho' nae" ba na jhao" li" va".
Edom we" nao kad' ra" khyo: nao re dam: kad' ru qhug' nae"- nao byid' ra" ru nao dam: qo" yu: li" nae".
16Nga" byumyu" wa nga" ra" gyang" lho" bug gaung mae qobo dae keim kho: re shaug' yid avako".
Ngadqere: avai: ayae mae" byumyu" mung"dan: jham wa ai: tho' kho" ra" qobo dae keim re qhug' shaug' li" genae". Yao: bam wa ai re shaug' mung: baui" byaug genae".
Israel Nho: Aung Doe, Ru
17Ngadqere: Ziun bam mae daqhae: phao: loe, genae". Aimung: ai wa gyang" lho" jo, qo boe" li" nae".
Israel byumyu" qe wa yao: bam yao" mug: myid re sang ang: ru we' dakhyo: qo" sang: yu: li" genae".
18Yaku amyu" we' Yoseb amyu" wa myi: re" ru: mung genae" yao: bam wa Eso" amyu" qere basad bam we' dakhyo: nga" pye' li" genae".
Eso" myid:zo: dayaug re: na dang genae" mangad:- ein: ngo Asang ta" va".
19Yuda mung" nho: mug: thao shad' mae" byu qe wa Edom re qo" na: sang: yu: li" genae".
Ba vao shad' mae" bam khyid mae na mo, wa Philisti mug: re lhad' sang: yu: li" genae". Israel byumyu" qe wa Ephrim we' Samari mung" mug: kyo: re qo" sang: yu: li" genae". Benyamin byumyu" qe wa Gilead re qo" yu genae".
20Israel mung" mug: am: shad' mae" zaug byaung" lhau: ra" gyetab wa dam: lo mung:- Phoenikia mug: re Zarephad vogaung: joe" sho' gyekhe' aung: yu: li" genae".
Sardi mae zaug byaung" phao: joe" na: ra" Yerusalem mae" mo, wa Yuda mung" qid bang: shad' mae" vogaung: jham re gye qo" khe' aung: yu li" genae".
21Yerusalem mae" gyekhe' aung mo, wa Edom re khe' yu mung: eib zo" li" genae". Asang yao: yao: wa kho:kham kad' li" nae".
Currently Selected:
OBADIA 1: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009