YONA 1
1
Mao"So: Mho Dao: Re Yona Matae" Gyo" Ra" Khyo
1Daba: ba na mae Amitai yao: zo: Yona re Mao"So ta" ra". 2Yao: wa ai: vogaung: mo" Nineve khyo ye: mung: ta" gyan: byid: wa, ai: vogaung: byu qe khonho" makhyang" rure ngo ba: myao byid' na: ga: ta" ra". 3Ngadqere: Yona wa Asang mae" phao: loe, nae" khyo" gatau dashad' khyo thug' ye" lo" va". Yona wa Yopa vogaung: khyo ye: mung: Spain mung" khyo ye" lo" nae" qid sang pho dalam: re yeqhug' myao: ra". Yao: wa qid sang pho kho" byid: mung: ai: qid sang pho mae" mo, we' daga" Asang we' va: va: Spain mung" khyo ye" lo" nae" ga: yedo; zaung: jo; ra".
4Ngadqere: Asang wa panglai: dao mae la qam" qi: re nhao: ke' mung: qid sang pho wa alaug laug byo; lo" ra". 5Qid sang pho kau: mo, wa gyai gyaug: bam gemung: yao: yaug yao" so re yao: hug' yang: mho' ako". Aimung: gyaug: ci" ca" ru nang: vashao: ga: qid sang pho dao mae" aung: xan: jham re phoe' pye' ako". Ai: au: re Yona wa qid sang pho o: pyae mae yevao: laung" mung: yab: myid' jo; ra".
6Qid sang pho zug: wa yao: re aimae yemyao mung: nao wa pe" mung: yab: jo; i? to" mung: bao" thaug' yu nae" qhid' mae" ni" so re akyu" mho' wa,- yao: wa ngonhaung" re nhag' khyag' yu mung: ngonhaung" nho: kao so' re loe, nhao: re loe, nhao nae" maba ga: ta" ra".
7Qid sang pho kau: mo, wa yao: cao: ngonhaung" mae" khoyaug: nho: mathao mae cera" qug: khai: qhug' rure ba nae" qhid' mae" pha" ce' khyo" qu" gelang: ga: jho" ta" ako". Yao: bam pha" ce' khyo" qu" re Yona mae ang: ra". 8Aimung: yao: bam wa Yona re ana" ngonhaung" re ta" kyo: la, ce: qug: khai: khag' re qobo zhaug' zai i? Nao cemae pe" li" kad' na:- nao khomug: mae" ngad: i?- Nao pe" ja" byumyu" ngad: i?- ga: myid' ako".
9Yona wa ngo wa Hebre byumyu" ngad: ngo wa myidgaung we' panglai: re kad' to" ra" mug:gaung dao mae" Mao"So re caung:pa" yaug ngad: ga: ta" ra". 10Yona wa Mao"So: qhid' kheim: mae" phao: qin" ru ngad: ga: xo' ta" kyo" ra". Qid sang pho kau: mo, wa gyo" gyaug gemung: yao: re airu: phao: qin" ru wa gyaug ja: yao: ngad: wo"- ga: ta" ako". 11La qam" wa je: je: xo: li" mung: qid sang pho kau: mo, yao: re la qam" thang: yo: lo" sho' ngonhaung" pe" kad' re gai nae" i?- ga: ceim" myid' ako".
12Yona wa ngore panglai: khug khyo tau: khyo" pye' gela, aire la qam" jo; yo: lo" nae". Naonhaung" cera" la qam" leim zo" ru wa nga" mathao mae ngad: rure ngo ba: ga: phaug' tau" ra".
13Ai: atha" qid sang pho kau: mo, wa qid sang pho re taung gaung khyo joe" sho' ga: qam: bo: thao" qhi" phin: mung: gau" ako". Ngadqere: la qam" wa je: je: thin: li" mung: yao: bam khai: maqo" joe" ngad: ako". 14Aimung: yao: bam wa Asang re yao mung: Asang we" byu ceyaug: ra" kao so' mathao mae ngonhaung" re shid nae" qobo davhin la, ceru: mung: ru alhab' wa nao re za: qobo zhaug' nae" khyo jo; ra" ce wa nao kad' ra" ga: mho: ako". 15Ailao" yao: bam wa Yona re gaug: vo; yu yang panglai: khug khyo pye' khyo" ke' ako". Ai: au: yao: panglai: wa yo: lo" byaug: ra". 16Ceru: mung: qid sang pho kau: mo, wa gyai gyaug: pye' mung: Asang re caung: da" byid: nae" ga: dao: thang" xeim: ngaui" byid' ako".
17 Asang: amyin" dao" yang joe" li" ra" ngozang qi: dadau: wa Yona re lham: myug: pye' mung: yao: wa ngo: vae: dug: khug mae sam ba sam myi laung" jo; ra".
Currently Selected:
YONA 1: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009