CAUNG: KHIN" 41
41
No Yaug: Akyu" Mho' Dao:
(Hebre Dao: Au:– Davi peim: ra" Nghaui"caung:)
1Myaung sho: mo; qhid' mae" bo:myid mo, wa ngaui lho" ako".
Yao: bam qug: khai: qhug' ko" au: Asang wa yao: bam re bao" thaug' byid' li" nae".
2 Asang wa yao: bam re gug: gam byid: mung: yao: bam: kao so' re khyad' yu: li" nae".
Yao: wa yao: bam re ai: mung" mae ngaui bau: nhao nae". Yao: bam: gyevo qenho: qam: so' khyo yao: bam re mashapye' to: co' nae".
3Yao: bam no phyo: qhug' re Asang: yang bao" yu mung: dam: qao" zin" lo nhao nae".
4Ngo wa Asang we"- ngo wa nao re qobo shad' va".
Ngo re nhag' khyag' mung: no gai byid: la,- ein: ta" ra".
5Nga" gyevo qe wa ngore gyo" no ja" dao: ta" ako".
Ngo shid: byaug mung: ceim" to" myhid' pye' ru qhug' nae" rure yao: bam o: ako".
6Ngo re li" qhug' mo, wa nhag' lam: san mabo ngad: ako".
Yao: bam wa ngo we' tin: yang: magai: ra" lau dao: re zhang: ci mung: khyi" khao: ngo" mae cao" ta" hau" qin" ako".
7Ngo re nghang: mo, alhab' wa yao: cao: yao: nga" khyo re jho" so' ta" ako". Yao: bam wa
nga" khyo re magai: thao" ru ga: myid: jho: ako".
8Yao: bam wa- yao: shid no yao: no: ava".
Yab qo mae" khonhae" re: dam: qo" to" nae" mangad: lo:- ga: ta" ako".
9Ngo lam: thao" ra" nga" ba nam sang- nga" zo:ve bocao: zo: yaug lhao" re:
ngore gye tug' kad' lo: ra".
10 Asang we"- ngore nhag' khyag' yu mung: ngore dam: qao" zin" lo nhao la,-
Ailao" ngo wa nga" gyevo qere loge, dam: qo" phaug' nae".
11Yao: bam ngore qo" aung genae" mangad:-
aimung: nao ngore ngaui: rure ngo ba: li" nae".
12Ngo wa jo: rure kad' rumung: nao ngore bao" yu: li" nae".
Nao wa ngore ni" qhid' kheim: mae apyad ato mae zam" to" li" nae".
13Israel nho: Mao"So Asang re caung:khin" ge,- yao: re
ana" re:- apyad ato mae re: caung:khin" na ge, wo"- Amen! Amen.!
Currently Selected:
CAUNG: KHIN" 41: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
