CAUNG: KHIN" 16
16
Myid: Lam: Ra" Khyo Mho' Yao Thoe
(Hebre Dao: Au:– Davi Peim: Ra" Nghaui"caung:)
1O" Mao"So we"- ngore gug: gam byid: la,- nao mae gug: gam qo" nae" ngo myid: lam: na:-
2Ngo wa Asang re- nga" Asang nao ngad: ra".
Ngo qo" ra" gu: gai: ra" ja: alhab' wa nao mae" joe" li" ru ngad: ra"- ein: ngo Asang re ta" ra".
3 Asang re jhaug' zaug: ra" byu qe wa khonho" gai: thao" ra" i?
Nga" nho: myid: ngaui o: thao" ru wa yao: bam we' daga" qo" na nae" ru ngad: ra".
4Gatau: so jham khyo hin: tao" ye: mo, wa yao: bam yao" gaung mae qug: khai: qho: qhug' yu: ako".
Yao: bam: ngaui" xeim: mae ngo mabo:bo nae". Yao: bam: so jham re ngo macaung:pa" nae".
5 Asang we"- nao dayaug za: nga" Asang ngad: ra".
Nao wa ngo mae ca" ru alhab' re byid' ra". Nga" nho: joe" lo nae" ayo, wa ni" lo, khug mae bo: ra".
6Nao ngore byid' ra" jhaung qhu" jham wa khonho" mug'pho: ngad: i? Aijham wa khonho" gai: i?
7 Asang wa ngore khyo shid' byid: yang: ngo wa Asang re caung:khin" ra".
Aimung: myi" ayo, re nga" aung khug nhag' lam: wa ngore ta" peim: byid' ra".
8 Asang wa ngo we' daga" na: jo; rure ngo khonhae" re: beim" na:.
Yao: wa ngo we' te' te' na: jo, mung: pe" yang re: ngore maqo" lhaui" nhan" nae".
9Airumung: ngo wa jeju beim: yang: ngaui bau" na:- aimung: ngo wa gug: gug: za: qo" na:.
10Pe"mung:ga"re nao wa ngore shid: ra" qam" so' mae" gug: gam byid' ra".
Ngo wa nao re jhaug' zaug za: caung da" byid' rumung: nao ngore movo: mug: mae to: co' nae" mangad:.
11Nao wa kao so' daui: ra" khyo jhui" ye" ra" khyodang ngore qhu" byid' li" nae".
Ngo we' daga" nao na: jo; ru wa ngore ngaui bau: byang" nhao mung: ngojhao" apyad ato ngaui bau: ngaui lho" ru cili" byid' ra".
Currently Selected:
CAUNG: KHIN" 16: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
