CAUNG: KHIN" 10
10
Tarha" Din: Nyang: Ru Qhid' Mae" Akyu" Mho' Dao:
1O" Asang we"- nao pe"mung: va" na: i?
Ngonhaung" qug: khai: qhug' na: au: re nao pe"mung: phao: vho' byaug: i?
2Makhyang: mashab mo, wa ngad beim: mung: myaung sho: mo, re yhin" ako".
Yao: bam kad' ra" lha" mae yao: bam re myi" nhao wa,-
3Makhyang: mashab: ra" yaug wa yao: yao" makhyang" ra" mau" zo" mae ngad beim" na: ra"-
so'kho' myo,no, yaug wa nhang: mung: Asang re ngag: thaug' pye' ra".
4Makhyang: mashab: ra" yaug wa Asang re pe" xan: masun: ngad: ra".
Yao: yao" ngad beim: myid: yang Mao"So wa pe" akhyag mangad:- ga: myid: na: ra".
5Makhyang: mashab: ra" yaug wa ja: khao: ngo" mae aung doe; na: ra"-
Yao: wa Mao"So nho: dao: kho' rure maba: gyo: ngad: ra". Yao: wa yao" gyevo qere jung" pye' ra".
6Yao: wa yao: yao" gaung re- ngo wa khonhae" re: gyo" seim" nae" mangad:-
Ngo wa khonhae" re: qug: khai: qhug' nae" mangad: ga: ta" na: ra".
7Yao" nho: dao: thoe jham wa- nhang: kheim: jham- mhug' dao: jham we' kyaug' nhin" ru byang" jo; ra"-
Yao: wa nghang" ra" dao: we' makhyang" ra" dao: re ta" nae" phyad: ra".
8Yao: wa vogaung: jham mae vho' jo, mung: qobo maqo" ra" byu qere se' pye' nae"- ga: lao" na: ra".
Yao: wa bao" yu nae" byu mana mo, re cao" kung" qin" ra".
9Yao: wa yao" vho' jo, qo mae khangkhyi we' dakhyo: lham: na: ra".
Yao: wa myaung mo, re lham yang: kung"na: ra". Yao: wa yao: bam re yao" lha" yang myhi" yu mung: she: khyad' lo" ra".
10Bao" thaug' yu nae" maqo" mo, wa khyoe' kad' pye' ru qhug' ako".
Qam: jam" yang yao: bam re khyoe' ke' pye' ru qhug' avako".
11Makhyang: mashab yaug wa yao: yao" gaung re- Mao"So wa pe" dao" mangae"
yao" myo,jid' jham cam" ci:rumung: ngore khonhae" re: mathe' myao nae"- ga: ta" ra".
12O" Asang we"- ai: makhyang: mashab: ra" mo, re qobo dae byid: wa,- qug: khai: phau" na mo, re myid: beim: byid: la,.
13Makhyang: mashab: ra" yaug wa Mao"So re maphug' makhyad' kad' mung:- yao: ngore qobo dae mabyid: nae"- ga: yao: yao" gaung re yao: khoru: qo" ta" nae" i?
14Ngadqere: nao yao: myao: na: ra"- Qug: khai: we' dayin dayo: re nao qu" xam" to" ra"- aimung: nao wa khonhae" re: bao" yu nae" jin" jin" ngad: ra".
Bao" thaug' ru maqo" ra" yaug wa nao re yao" gaung ab byid' ra". Nao wa qo ca" yaug re khonhae" re: bao" lo: ra".
15Makhyang: mashab: ra" mo; nho: qam: so' re khyug' pye' byid: wa,
Yao: bam shad' nghung" ra" mau" zo" mathao mae ce:thao: ne, khonhae" re: madam: qo" kad' gelo: sho' yao: bam re qobo dae byid: wa,.
16 Asang wa apyad ato mae kho:kham ngad: jo; ra".
Gatau: so jham re caung:pa" mo, wa yao" mug:myid mae" baui" lo" byaug: li" genae".
17O" Asang we"- Nyham: gyo" jo, mo; akyu" mho' thoe re nao tae" gyo: byid' li" nae".
Nao wa yao: bam re vae" ra" myid byid' li" nae".
18Nao wa deim" zag zo: qhug' na mo, we' cug' zonau" qenho: hug' ngug: yao: ra" thoe re the' gyo: byid' li" nae".
Nao wa yao: bam: bo: de, mung: dao: kho' byid' li" nae". Ailao" shid ba: ra" byu qe wa khonhae" re: maqo" kyaug' tin" lo: genae".
Currently Selected:
CAUNG: KHIN" 10: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
