GYAUNG: SU: 28
28
Jao Dang Qhaug' Byid' Ra" Ngaui Xeim:
(Phao: Thug' 29.38-46)
1 Asang wa Moshe re- 2So" to" ra" ayo, mae qhaug' byid: ca" ra" Asang o ngaui: ra" zo:ve ngaui" xeim: re Mao"So re ngaui" byid: nae" qhid' mae" Israel byumyu" qere mho" shid' nhao: ra".
3Cegu: wa Asang re qhaug' byid: ca" ra" zo:ve xeim: ngad: ra". Ba khao: ngo" phad' ngaui" ra" xeim: qhid' mae" qo mabo: ra" dazin byang" va" yao lo: nau" shid' dau:- 4Sao Qhid' dau: re ne, kao ngaui" byid: mung: thao mae" dau: re myi" thao ngaui" byid: ge,- 5Dau: khao: ngo" re gai: thao" ra" zhanlun xau dajoe: we' lhag' to" ra" cin man" ngaui" xeim: shid' kaug' we' lhag' to" ra" cin man" ngaui" xeim: we' daga" qhaug' byid: nae" ngad: ra". 6Ceru wa Asang re ngaui nhao: ra" meim sheim zo:ve ngaui" xeim: khyo" Sina bam mae sao qhid' qhaug' byid' ra" bin sho' phad' ngaui" byid' ra" ba khao: ngo" mae" ngaui" xeim: ngad: ra". 7Sao Qhid' mae" yao nau" we' daga" sabyi xeim: shid' soe: re phan mae vhe' zaui wa,- 8Yao shid' dau: ein: dau: re ne, kao: mae" xeim: ngaui" qhaug' byid' ru we' dakhyo: za: sabyi qang: xeim: we' daga" myi" thao qhaug' byid: wa,- aire: Asang re o ngaui nhao: ra" meim: sheim zo:ve ngaui" xeim: ngad: ra".
Dugno: Ba Ngaui" Xeim:
9Dugno: Ba re cin man" ngaui" xeim: we' sabyi qang: ngaui" xeim: khyo" zhanlun xau we' lhag' ra" cin man" byid kaug' re dazin byang" va" qo mabo: ra" yao lo: nau" shid' dau: we' daga" sabyi qang: xeim: qhaug' byid: wa,- 10Ba khao: ngo" mae" ngaui" xeim: re sabyi qang: xeim: we' daga" qhaug' byid' ra" tho' mae Dugno: Ba khao: ngo" ce: phad' ngaui" xeim: qhaug' byid: ca" ra".
Lho" Xin: Sao Qhid' Ba: Mae" Ngaui" Xeim:
11Lho" xin: khao: ngo" Asang re phad' ngaui" byid' ra" xeim: khyo" qo mabo: ra" nung: jaung lo: shid' dau:- yao: lo: dadau: we' dazin byang" ra" yao: lo: nau" nhad' dau: qhaug' byid: ge,. 12Cin man" xeim: khyo" zhanlun xau we' lhag' ra" cin man" re qhaug' byid: ge,- nung: jaung lo: dau: khao: ngo" we' cin man" khyaug' kaug'- yao lo: dadau: we' cin man" byid kaug' qhaug' byid: ge,. 13Yao lo: nau" dau: khao: ngo" we' cin man" shid' kaug'- qhaug' byid: ge, ce: phad' ngaui" xeim: jham wa Asang re ngaui nhao: ra" zo: ve xeim: jham ngad: ra". 14sabyi qang: ngaui" xeim: yao: kam" wa nung: jaung lo: dau: khao: ngo" mae sabyi byid soe:- yao lo: dau: khao: ngo" mae sabyi qang: sam soe:- yao nau" dau: khao: ngo" mae sabyi qang: shid' soe: ngad: ra". Cegu: wa dazin: geim" mae" lho" xin: sao qhid' ba khao: ngo" mae abang mabyid phad' ngaui" xeim: qhaug' byid: nae" tarha" ngad: ra". 15Aimung: ba khao: ngo" mae" phad ngaui" xeim: we' sabyi xeim: tho' mae je yang: qobo khyad' xeim: khyo" cad' lo: dadau: qhaug' byid: ge,.
Man" Make' Ra" Mug Poe Mae Qhaug' Byid' Ra" Xeim:
(Xeim: Ngaui" 23.5-14)
16Zin sag' khye' lho" xin: daxe: byid ba: ba Asang re nga: yhe' ra" khyo" lai co' poe kad' ca" ra". 17Daxe: ngo" ba: ba mae" caung:pa" poe re nhad' ba myao" sho' kad' ca" ra". Ai: poe ayo, gu: mae man" make' ra" mug re za: zo: ca" genae". 18Poe sao qhid' ba mae naonhaung" wa caung:pa" nae" qhid' mae" phaung: qham ca" genae"- pe" mau" re: magai: zaui: genae". 19Asang re zo:ve xeim: khyo" phad' ngaui" xeim: qhaug' byid: ge,- pe" qo mabo: ra" nung: jaung lo: nau" shid' dau:- yao lo: nau" dadau: we' dazin byang" ra" yao nau" nhad' dau: ngad ca" ra". 20Zhan:lun: xau we' lhag' ra" cin man" gaug zo ngaui" xeim: wa- nung: jaung lo: dau: khao: ngo" mae khyaug' kaug'- yao lo: dadau: mae byid kaug' we' 21Yao lo: nau" dau: khao: ngo" mae shid' kaug' bo ca" ra". 22Cad' be, lo: dadau: rere: qobo khyad' ngaui" xeim: khyo" qhaug' byid: ge,- aimung: ai: byumyu" qere caung:pa" thung" khyo" kyang" san: pye' rure cao" ca" ra". 23Abang mabyid ne, kao: phad' ngaui" xeim: tho' mae ce: xeim: jham re qhaug' byid: ge,. 24Ai we' dakhyo: nhad' ba: geim" yao: re o ngaui nhao: ra" mheim sheim ngad: ra" zo:ve xeim: Asang re qhaug' byid: ge,. Ba khao: ngo" mae" phad' ngaui" xeim: we' sabyi qang: xeim: tho' mae ceru re qhaug' laung: byid: ge,. 25Nhad' ba ein: ba re caung:pa" nae" qhid' mae" phaung: qham mung: mau" dazaui: ge,.
Qhovo: Jham: Poe Mae Qhaug' Byid: Nae" Xeim:
(Xeim: Ngaui" 23.15-22)
26Qhovo: jham: poe sao qhid' ba Asang re nao: yang gaug sag' qhaug' byid' au: re naonhaung" wa caung:pa" nae" qhid' mae" ham phaung mung: pe" mau" magai: zaui: genae". 27Asang re ngaui nhao: ra" meim sheim khyo" phad' ngaui" xeim:- nung: jaung lo: shid' dau:- yao lo: dadau: we' dazin byang" ra" yao lo: nau" nhad' dau: qhaug' byid: ge,. Ai: gug'nyhug' alhab' qo daja: re: magai: bo ngad: ra". 28Zhan:lun: xau we' lhag' ra" cin man" gaug zo ngaui" xeim: kam" wa- nung: jaung lo: dau: khao: ngo" we' cin man" khyaug' kaug'- yao lo: dadau: we' cin man" byid kaug'- qhaug' byid: wa,- 29Yao lo: nau" dau: khao: ngo" we' cin man" shid' kaug' ngad: ra". 30Qobo khyad' xeim: khyo" cad' be, lo: dadau: qhaug' byid: mung: ai: byumyu" qenho: qobo re caung:pa" thung" khyo" kyang" san: pye' byid wa,- 31Ba khao: ngo" mae" phad ngaui" xeim: we' cin man" xeim: tho' mae cejham we' sabyi qang: xeim: re boqhaug' byid: ge,.
Currently Selected:
GYAUNG: SU: 28: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009
