GYAUNG: SU: 13
13
Jin" Byu Qe
(Mho" Peim: 1.19-33)
1 Asang wa Moshe re- 2Amyu" daxe: shid' kaung mae" au: jhaung qe mae" damyu" mae" dayaug yaug khyin: yu mung:- Israel byumyu" qere ngo byid: nae" ngad: ra" Khanan mung" khyo yejo" qu" nae" qhid' mae" jin" byu qekhyo" yao: bam re nhao: ke' wa,- 3-15Moshe wa mho dao: gyo: mung: o mae tung" to" ru we' dakhyo:- Paran din"pyad' yo mae" ai: au: jhaung qere nhao: ke' ra".
| Amyu" | Au: jhaung |
|---|---|
| Rubin | Zaku nho: yauggai zo: shammua |
| Simon | Horid nho: yauggai zo: Shaphad |
| Yuda | Yephune nho: yauggai zo: Khaleb |
| Isakha | Yoseb nho: yauggai zo: Iga |
| Ephrim | Raphu nho: yauggai zo: Palti |
| Zebulun | Sodi nho: yauggai zo: Gaddiela |
| Manashe | Susi nho: yauggai zo: Gaddi |
| Dan | Gemali nho: yauggai zo: Ammie |
| Ashe | Mikhae nho: yauggai zo: Sethur |
| Nabhtali | Vophsi nho: yauggai zo: Nabi |
| Gad | Makhi nho: yauggai zo: Guela |
16Cebam wa Moshe yang mung"dan: re yejo" qu" nae" qhid' mae" nhao: ke' ra" jin" byu qe ngad: ako". Yao: wa Nun nho: yauggai zo: Hoshea re Yoshu ga: tha" mhang" byid' ra".
17Moshe yao: bam re nhao: ke' au:- yao: wa yao: bam re- ce: mug: am: mae" Khanan mung" nho: mug: thao khyo ye" lo" ge,- ai: dao re bam mug: khaung: khyo ye: ge,- 18Ai: mung"dan: pe" ru" ru ngad: rure re: aimae byu khonho" na ko" rure re: yao: bam khoqhi" qam: bo ko" rure re: yequ" lo geri:- 19Mug: myid gai: ru- magai: rure re:- byu qe wa gyetab vogaung: majo; ra" vogaung: mae na ko" ra" la,- gyetab vogaung: jo; ra" vomo" vang khug mae na ko" ra" la, ein: rure re: yequ" lo ge,. 20Myid xau gai: ra" la,- sag' mo" yo ngad: ra" la,- ein: rure yequ" lo ge,. Amung: aimae qho" to" ra" shi: daqhae: re ba nae" qhid' mae" qo" qo" phyo' cilo geri:- (ai: ayo, wa sabyi shi: mhang" qhid: ra" ayo, ngad: ra".)
21Airumung: aibam wa mug: am: khyo ye: mung: Zin din"pyad' yo mae" mug: myid re jo" qu" mung:- mug am: mae" Hamad bam gyo: nhae khyo" lai: lo" ra" khyo cao" yang: mug: thao mae" Rehob vogaung: khyo joe" sho' yejo" qu" ako". 22Yao: bam wa ai: mung" nho: mug: thao shad' khyo shi" sao qhid' ye: mung:- Hebron khyo lo: ako". Ai mae Anakim ga: mhang" ra" byuqi: myu" qenho: myid:zo: qe ngad ko" ra" Ahiman- Sheshai- Talmai kaung qe na: ako". (Hebron vogaung: wa Egutu mung" Zoan vogaung: tho' mae nhad' zin no' yang: te" to" ra" vogaung: ngad: ra".) 23Yao: bam wa Eshko lao: khaung: khyo joe" lo mung:- yao: bam wa sabyi shi: atang: datang: za: de; ra" sabyi kaung dakaung re thau: yu: ako". Saung" la: yang: byu shid' yaug gyang: yao" yang aire dao: ako". Yao: bam wa khaung: shi: shi: we' pho' ham" shi: daqhae: rere: phyo' cilo: ako". 24(Ai: jo, qo re Eshko lao: khaung: ga: mhang" ako". Pe"mung:ga"re aitau mae Israel byu qe sabyi tang: re thau: yu geyang: ngad: ra".)
25Ai: mung" re byid xe ba bin: jo" qu" thao re Jin" byu qe wa- 26Paran din"pyad' yo mae" Kade mae na ko" ra" Moshe- Arun we' Israel byu phung: geim" khyo dam: tug' lo: ako". Yao: bam wa yao: bam myao: lo: ra" khyo re lozhao: kyo: mung: yao: bam cilo ko" ra" shi: jham re yao: bam re loqhu" ako". 27Yao: bam wa Moshe re- ngonhaung" wa ai: mung" re jo" qu" lo mung: myid gai: ru we' myid xau bo: rure myao: bam va"- aimae" shi: daqhae: ce ngad: ra" ga: ta" ako". 28Ngadqere: ai: mae na ko" ra" byu qe wa qam: bo mo, ngad: ako". Yao: bam: vomo" jham wa gyai qi" ru we' gye khug zaung we' vang gyai tang sho' kad' to" ako". Aitho' mago" gaung khyao qi" ra" byu qe: myid:zo: qere ngonhaung" ai: mae yemyao: to: co' va". 29Aimung" mug: thao shad' mae Amaleg byu qe na mung: Hiti- Yebusi- Amori byu qere: bam mug: mae na: ako". Mug:gaung: panglai: nhae mae we' Yodan gyaung: cao" yang: mae re: Khanan byumyu" qe na: ako"- ga: ta" ako".
30Khaleb wa- ngonhaung" ana" yekhe' mung:- ai: mung" re yesang: yu gelang: aire khe' aung: yu nae" qam: ngonhaung" laug sho' bo: ra" ga: ta" yang: Moshe re qobo vhin nyhung: ra" mo, re tae" lo" nhao: ra".
31Ngadqere: Khaleb we' bocao: ye" ra" mo, wa mangad:- yao: bam re khe' zin nae" qam: laug sho' mabo- ai: mae na: ra" mo, wa ngonhaung" tho' mae je yang: qam: bo: ako"- ga: ta" ako". 32Airumung: yao: bam wa yao: bam ai: mung" re jo" qu" vako" ra" khyo re Israel byumyu" phaung mae majo: ra" khyo" lau dao: hau" pyo: ke' ako". Yao: bam wa ai: mug: myid wa ai: mae na: ra" mo; qhid' mae" lhao" re: laug sho' zo: nae" gaug zo mathug' ngad: ra". Ngonhaung" the' myao: ra" mo, yaug khao: ngo" wa gaung gyai qi: gyai qhang mo, ngad gemung:- 33Anag nho: myid:zo: qe ngad ko" ra" byuqi: qere lhao" re: ngonhaung" myao va"- ngonhaung" wa jhin khyag' ru: ngai: byaug: ruru: ga" ra"- amung: ngonhaung" yao: bam re airu: qu" ca" nae" ru ngad: ra"- ga: ta" ako".
Currently Selected:
GYAUNG: SU: 13: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009
