NEHEMIA 9
9
Amyu" Byu Qe Yao: Bam: Nho: Qobo Jham Re Lhang: Yu Ko" Ra" Khyo
1-2Ai: lho" khye' yao: shid' xe: byid ba ein: ba mae Israel byumyu" qe wa- yao: bam yao" qobo jham: qhid' mae" kaug' rure qhu" byid: nae" qhid' mae" phaung ham mung: zo:ve jao" ako". Yao: bam wa yao: bam yao" gaung re taung bug byumyu" qe alhab' mae" gathaung san" kho' na: jo; ako". Yao: bam wa kaug' qhui: ra" aso: khyo" jid: mo" mai bau: ve, mung: yao: bam: au: dao mae phalhug gag: sheim" ci: ako". Ai: thao yao: bam wa ye, mung: yao: bam yao: we' yao: bam: phug' pho" qe shad' nghung" lai: lo: ra" qobo jham re lhang: yu: ako". 3Yo, qug sam lam: nho" kho yao: bam re yao: bam: Asang Mao"So: Tarha" nghe' kyo" ako". Aimung: ai: thao mae" yo, qug sam lam: gu: mae yao: bam: qobo jham re lhang: yu mung: yao: bam: Mao"So Asang re caung:pa" ako".
4Levi byu qe: qhid' mae" ginbyae: dalam: jo, mung: ai: dao mae Yeshua- Bani- Kadmie- Shebania- Bunni- Sherebia- Bani- we' Khenania bam ye; jo; ako". Yao: bam wa- yao: bam: Mao"So Asang re thoe qi: ke' mung: akyu" mho' ako".
5O mae mang bo: ra" Levi byu qe ngad ko" ra" Yeshua- Kadmie- Bani- Hashabneia- Sherebia- Hodia- Shebania- we' Pethahia bam ngad: ako". Yao: bam wa- to" ye, mung: naonhaung" Mao"So Asang re caung:khin" ge,.
Yao: re apyad ato mae caung:khin" byid: ge, wo"-
Xao su byu: yang caung:khin" ru mathae ngadqere:-
yaug khao: ngo" wa yao" phung qi" ra" mang re caung:khin" byid: vageshao:- ga: caung:pa" nae" khai: ako".
Qobo Lhang: Yu: Ra" Akyu" Mho Dao:
6Aimung: Israel byumyu" qe wa ce: akyu" mho' dao: re mho' ako".
Asang nao we"- nao dayaug yao: za: Asang ngad: ra". Nao wa mug: kin jham we' mug:gaung mae" kyi jham re phan" phaug' to" ra".
Nao wa myid gaung we' panglai: rere: aijham mae bo: ra" ja: khao: ngo" rere" kad' to" ra". Nao wa alhab' re kao so' byid' ra".
Mug:gaung mae" kheim: so' jham wa goe; gyo" mung: nao re caung:pa" byid' ako". 7Asang Mao"So nao we"-
nao wa Abram re khyin: yu mung: Babelon mung" Ura mae" jhui" thug' lo: ra".
Nao wa yao" mang re Abraham ga: lhai" pye' byid' ra".
8Yao: wa ni" dao mae jhaug' zaug: rure nao qhug' myao mung:-
nao wa yao: we' dao: thang" kad' to" ra".
Nao wa yao: re- Khanan byumyu" qenho: mug: myid
Hiti byumyu" we' Amori byumyu" qenho: mug: myid-
Perizi byumyu" qe we' Yebusi byumyu" qe- Girgashid byumyu" qenho: mug: myid re-
yao" myid:zo: qe na nae" mug: myid khyo" byid' pye' nae" ga: dao:so: byid' ra".
Nao wa jhaug' zaug: yaug ngad mung: ni" dao:so: re nao jhaug' zaug: ra".
9Nao wa- ngonhaung" nho: phug' pho" bam Egutu mae khoru: qug: khai: kham zo" lai: lo: rure the' myao byid' ra".
Nao wa- yao: bam Tham: Ne mae bao" yu nae" mho' yao: rure the' gyo: byid' ra".
10Nao wa kho:kham re ngag: thaug' ra" khyo" mug' pho: mau" jham re zaui" qhu" ra". Yao" zug: ade, qe we'
yao" mug: myid mae" mung" byu qere ngag: thaug' ra" khyo" mug' pho: mau" jham re kad' ra".
Pe"mung:ga"re- nao wa- ni" byumyu" qere yao: bam: yang khoru: deim" zag zo" rure nao ba byid' ra".
Nao wa ana" ba joe" sho' nao qo" jo; ra" lahau: qi" ru wa- ai: au: re the' yu: ru ngad: ra".
11Nao wa panglai: khyo" kho' yang: ni" byumyu" qe: qhid' mae" khyo phung" byid' ra".
Aimung: yao: bam re myid ho yo khyo" jhui" lai: lo" ra".
Yao: bam re cao" khe' mo wa panglai: khug khyo nab: vao lo" ra"
laug baui we' dakhyo: ai: tham: no, khug mae nab: shid: ako".
12Nao wa na" gaung ayo, mae yao: bam re jham thaui: we' jhui" lo: ra".
Aimung: myi" ayo, mae yao: bam: khyo re myi" yang bao byid' ra".
13Sina bam mae nao wa mug: khaung khyo" gyo" li" ra"-
nao wa- ni" byumyu" qere jhau mung:
yao: bam re gai: ra" Tarha" we' jo: ra" mho" shid' dao: jham byid' ra".
14Nao wa yao: bam re- ni" Dugno: Ba re gyang" lho" sho' to: nae" qhid' mae" mho" shid' ra".
Aimung: nao wa- ni" daui daui yaug Moshe khyo" yao: bam re ni" Tarha" jham byid' ra".
15Yao: bam vae: moe; gelao" nao wa yao: bam re mug: khaung mae" mug khyo" byid' ra".
Yao: bam qid shab' gelao" laug byo, mae" qid byid' ra".
Nao wa yao: bam re byid: nae" ga: dao:so: byid' to" ra" mug: myid re-
yesham" sang: yu nae" qhid' mae" yao: bam re ta" ra".
16Ngadqere: ngonhaung" nho: phug' pho" qe wa ngad beim" li" gemung:- sang: dang: ako".
Aimung: ni" amyin" jham re phug' cao" nae" ha: pye' ako".
17Yao: bam wa phug' cao" nae" ha: pye' ako".
Yao: bam wa nao kad' lai: lo: ra" mug' pho: ve,lho jham re to" myhid' pye' ako".
Yao: bam ngad beim" ruyang yao: bam wa yao: bam re Egutu khyo dam: jhui" tug' phao nae"
au: jhaung dayaug re khyin: ako".
Ngadqere: nao wa qobo khyad' byid' ra" Mao"So ngad: ra".
Nao wa jeju byang" mung: jhid'de; ba: ru we' nhag' phyad mayo: yaug ngad: ra".
Ni" nhag' khyag' myid wa qi" qhang: ra". Nao wa yao: bam re mashapye' to: co' ngad: ra".
18Yao: bam wa- nung: jaung nau" lho dalam: kad' mung:
airu wa yao: bam re Egutu mae" jhui" thug' lo: ra" so ngad: ga: ta" ako".
Asang we"- yao: bam wa nao re khoqhi" maphug' makhyad' kad' lai: lo: ako" i?
19Ngadqere: nao wa- yao: bam re ai: din"pyad' yo mae mashapye' to: co' ngad: ra".
Pe"mung:ga"re ni" nho: nhag' khyag' myid wa qi" qhang: ra".
Nao wa yao: bam re myi" re: na" re: khyo jhui" lo: ra"
jham thaui: rere: myi: rere: mayu: pye' byid: ngad: ra".
20Ni" nho: gai shab: ruyang yao: bam pe" kad' ang: rure nao yao: bam re ta" ra".
Nao wa yao: bam re Mana mug byid: zho: mung: shaug' qid byid' ra".
21Din" pyad' yo mae byid xe zin lam: lam:
nao wa yao: bam ca" ru alhab' yao: bam re byid' ra".
Yao: bam: mai bau: jham wa khonhae" re: maqeim" byaug-
aimung: yao: bam: khyid jham re: maqae: mano ngad: ako".
22Nao wa yao: bam: re byumyu" mung"dan: jham re aung: pye' nhao: ra".
Yao: bam: mug: kyo: mae" mug: myid jham re aung: yu nhao: ra".
Yao: bam wa -Sihon eib: ra" Heshbon mug: myid re aung: yu: pye' ako".
Aimung: Oga kho:kham kad' ra" Bashan mug: myid rere: aung: yu: pye' ako".
23Nao wa yao: bam re- mug:gaung mae" kyi jham nho" myo" ra" myid:zo: qe byid' ra".
Aimung: nao: yang yao: bam re byid: nae" ga: yao: bam: phug' pho" qere dao:so: byid' to" ra"
mug: myid re aung: yu nhao mung: ai: khug mae na nhao: ra".
24Yao: bam wa Khanan mug: myid re aung: yu: pye' ako".
Nao wa aimae na: ra" byumyu" qere khe' aung: pye' ra".
Nao wa yao: bam re Khanan mung" byu qe we' yao: bam: kho:kham qere
yao: bam nug: khyo: kad' nae" qam: so' byid' ra".
25Ni" byumyu" qe wa- gyetab vogaung: jham-
myid xau gai: ra" mug: myid- jo,nho" byang" bo: ra" yham jham-
bin: dau" to: gau qid thug' jham zhanlun gae jham-
shi: gae jham we' sabyi khyae jham re lhad' sang: yu: ako".
Yao: bam wa yao: bam o: ru alhab' zo: mung: xau: li" ako".
Yao: bam wa- nao: yang yao: bam re byid' to" ra" gai: ru alhab' re pyo: pyo: kham zo" avako".
26Ngadqere: ni" byumyu" wa nao re tau: lhan: mung:- ni" mho dao: re magyo: ko" ngad: ra".
Yao: bam wa- ni" Tarha" re nhaung thao" ke' pye' ako".
Yao: bam wa- yao: bam re nao jhao" dam: tug' lo nae" qhid' mae" ta" peim" ra" lapa qere se' pye' ako".
Yao: bam wa dalhang: mae" dalhang nao re maphug' makhyad' roe" avako".
27Aimung: nao wa yao: bam: gyevo qeyang yao: bam: re eib zo: nhao: ra".
Yao: bam wa yao: bam qug: khai: qhug' na: rumae" nao re hug' yao: ako".
Aimung: nao wa- yao: bam re mug: khaung mae" tau: byid' ra".
Nao wa ni" qi" qhang: ra" nhag' khyag' myid: yang-
Yao: bam re yao: bam: gyevo qe: lo, mae" khyad' yu nae" au: jhaung qere nhao: ke' byid' ra".
28Yaug yo cae: tae" ru dam: joe" lo lao" yao: bam qobo dam: shad' ako".
Aimung: nao wa- yao: bam nho: gyevo qeyang yao: bam re aung: pye' nhao: ra".
Ngadqere:- yao: bam nhag' lam: tha" mung: yao: bam re khyad' yu nae" qhid' mae" nao re mho' lao"-
Mug: khaung mae nao the' gyo: mung: dalhang: mae" dalhang
ni" qi" qhang: ra" nhag' khyag' myid khyo" nao wa yao: bam re khyad' yu: ra".
29Nao wa yao: bam re ni" mho" shid' khyo jham re phug' cao" nae" qhid' mae" ta" peim" ra".
Ngadqere: ni" tarha" cao" ru wa kao so' khyodang ngad sho' ngadqere:
yao: bam: ngad beim" myid: yang ni" tarha" re ngag: ha: pye' ako".
Yao: bam wa sang dang: ruwe' nhag' lam: qao ko" ruyang manug: phug' cao" ngad: ako".
30Dazin mae" dazin nao wa yao: bam re nhag' lam: qhang qhang to: mung: ta" peim" ra".
Nao wa- ni" lapa qere dao: jhau nae" qhid' mae" nhag' lam: suzo: du: nhao: ra".
Ngadqere: ni" byumyu" qe wa no: jid: ako".
Aimung: nao wa yao: bam re gatau: byumyu" qeyang aung: pye' nhao: ra".
31Ngad sho' ngadqere:- ni" nhag' khyag' myid qi" qhang: ra" mathao mae-
Nao wa yao: bam re mashapye' co'- phyo' re: maphyo' qheim" pye' ngad: ra".
Nao wa jeju byang" ru we' nhag' myan" ra" Mao"So ngad: ra".
32O" Mao"So we" ngonhaung" nho: Mao"So we"- nao wa gyai qi" qhang: ra" wo"-
Khoqhi" gyaug din pho: i? Khoqhi" kheim: so' qi" i?
Nao wa ni" dao: thang" dao:so: jham re jhaug' zaug taung" zam" ci: ra".
Asuri kho:kham qe ngonhaung" re zag zo" lai: lo: ra"
ayo, mae" ana" joe" sho' lhao" re:- ngonhaung" khonho" dayin dayo: qug: khai: kham zo" lo: i?
Ngonhaung" nho: kho:kham qe- ngonhaung" nho: au: jhaung qe- ngonhaung" nho: khinjaung qe we' lapa qe-
ngonhaung" phug' pho" qe- ngonhaung" nho: mang: byu qe alhab' mo, dayin dayo: kham zo: va".
Ngonhaung" khonho" qug: khai: kham zo" lo: rure myid: beim: byid: la,-
33Nao ngonhaung" re qobo dae byid' ru wa jo: ru kad' ava".
Ngonhaung" qobo shad' sho' ngadqere: nao wa jhaug' zaug: lai: lo va".
34Ngonhaung" nho: phug' pho" qe- ngonhaung" nho: kho:kham qe- au: jhaung qe we' khinjaung qe wa
ni" tarha" re macao" ngad: ako".
Yao: bam wa ni" amyin" jham we' ta" peim" ru jham re matae" gyo: ngad: ako".
35Kho:kham qe wa ni" shaman" jeju khyo" ni" byumyu" qere-
nao: yang byid' to" ra" myid xau gai: ra" mug: lu mae na ko" au: re eib zo" lai: lo: ako".
Ngadqere:- yao: bam wa qobo mae" dam: tug' lo mung: nao re caung da" byid: nae" lhaui" pye' ako".
36Aimung: ana" ngonhaung" wa- nao: yang ngonhaung" re byid' to" ra" ngonhaung" re zo:ve byid' ra"
ce: myid xau gai: ra" mug: myid mae jeim boe" na: bam va".
37Ai: mug: myid: yang ashi: zaui" thug' byid' ru wa- ngonhaung" qobo shad' yang:- nao: yang
ngonhaung" dao mae eib zo: nhao: ra" kho:kham qejhao" joe" lo" ra".
Yao: bam wa- ngonhaung" we' ngonhaung" nho: gug'nyhug' jham re yao: bam nug: khyo: kad' ako".
Aimung: ngonhaung" wa xo sho' nhag' lam: thao" na: bam va".
Amyu" Byu Qe Wa Myid Vang" Soxam: Deim" Ako"
38Boe" lo: ru alhab' mathao mae- Israel byumyu" ngonhaung" wa cemae tung" to" ra" myid vang" aso: kad' mung: ngonhaung" nho: au: jhaung qe ngonhaung" nho: Levi byu qe we' ngonhaung" nho: khinjaung qe wa ai: dao mae yao: bam: dazid aso: thaung" te' ako".
Currently Selected:
NEHEMIA 9: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
