NEHEMIA 4
4
Nehemia Wa Yao" Mau" Re Ngag: Thaug' Mo, Re Aung: Pye' Ra" Khyo
1Vang re ngonhaung" Yuda byumyu" qe dam: zao: qhid va" rure Sanbalad the' gyo: lao"- yao: nhag' jam: yo: mung: ngonhaung" re jung" ta" phoe: qhid: li" ra". 2Yao: wa yao" byu qe we' Samari byu qe: qhid' kheim: mae- ce: masho: majhin phyag' ra" Yuda byumyu" qe wa yao: bam pe" kad' na: ga: myid ko" laug i? Yao: bam wa vomo" re dam: zao nae" seim" ko" laug i? Yao: bam wa xeim: phad' ngaui" mung: ai: mau" zo" re daba mae za: qo" kad' bin nae" ga: myid jho ko" laug i? Yao: bam wa- myi: nga" gyoe; bam: jo; ra" laug baui yo mae" yham kad' laug qo" kad' yu genae" i? ga: ta" ako".
3Tobia wa ai: yao" nhae mae ye; jo, mung: yao: bam wa khoru" vang re ba: qo" zao genae" laug i? Zagne dadau: lhao" re: aire qo" deim" phyo' khyo" pye' ra" ga: laung: yang: ta" ra".
4Ngo wa- O" Mao"So we"- yao: bam ngore jung" na: rure tae" gyo: byid: la,- yao: bam jung" ru wa yao: bam: au: dao mae gyo" zao" vashao: yao: bam qo" ru alhab' lhad' yu: pye' byid' ru qhug' mung:- yao: bam re taung bug: mang: khyo kyam: byu khyo" taung" lo" ru qhug' vageshao:- 5Yao: bam kad' ra" makhyang: mashab: mau" re qobo dakhyad' byid:- yao: bam: qobo jham rere: dato" myhid' pye'- pe"mung:ga"re- yao: bam wa ngonhaung" zao: rure maphug' makhyad' roe" pye' ako"- ein: ngo akyu" mho'.
6Aimung: ngonhaung" wa vang re xo' zao mung:- khomyhao" mamyao" re ai: agaung: kho' myhao: do, lo" va". Pe"mung:ga"re- mo,byu qe wa mau" zaui: nae" kao bau geyang: ngad: ako".
7Sanbalad- Tobia we' Arabia mae" byu qe- Amon we' Eshdod mae" byu qe wa Yerusalem vang re dam: zao: ra" mau" lo, zo" su: mung: bin: lo" na va" rure the' gyo: lao" yao: bam gyai nhag' yo" ako". 8Aimung: yao: bam alhab' zang" li" mung: Yerusalem re ceim" zin: nae" we' lhau: shug nae" ga:- byin phyo: khug' zin" ako". 9Ngadqere:- ngonhaung" wa ngonhaung" nho: Mao"So re akyu" mho' mung: ai: vang jham re myi" we' na" mae lhaug' zaung" nae" byu abang mabyid lo: nha: to: va".
10Yuda byu qe wa yao: bam nghaui" caung: ra" nghaui" caung: dalam: qo" ako".
Aiwa ngonhaung" wa qola: vin mung: qam: nang: va"- laug je, man" bam saung" myo: mung: matho' yu: pye' lo:-
Ana" ba ngonhaung" vang re khoru: qo" dam: zao lo nae" laug i? ga" ru ngad: ra".
11Ngonhaung" nho: gyevo qe wa- yao: bam: yang ngonhaung" dao mae na mung: ngonhaung" re se' pye' thao ngonhaung" nho: mau" re qo" tam" thao" pye' sho' ngonhaung" yang yao: bam re mamyao genae". Pe"mung: na: rure: maba genae"- ga: myid: jho: ako". 12Ngadqere: dayo; mae" dayo, ngonhaung" nho: gyevo qe: phaung gaung: mae na: ra" Yuda byumyu" qe wa- ngonhaung" nho: gyevo: yang ngonhaung" re magai kad' nae" byin phyo: zin" na: ru jham re li" ta" peim" kyo" ako". 13Airumung: ngo wa mo, byu qere shae pyang: jham- lhae tad' jham we' myo: jham ci nhao mung:- vang nhaung thao" mae mabin: zao shi" ra" jo, qo khao: ngo" mae daboe: we' daboe: cao" yang: lhaug' nhao: to: va".
14Mo,byu qe sang: kho" na: rure ngo the' myao mung: yao: bam re we' yao: bam: au: jhaung qe- zug: ade, qere ceru: ta" ra". Ngonhaung" nho: gyevo qere dagyaug ge,. Asang wa khoqhi" qi" qhang mung: khonho" gyaung din nae" man: qi" rure myid: beim: ge,. Aimung: naonhaung" damug: mae" za" byu qe: qhid' mae"- naonhaung" yao: zo: qe naonhaung" yham sang myhi" qe we' naonhaung" yham jham: qhid' mae" gyekhe' zin: byid' rure myid: beim: ge,- ein: ta" ra". 15Ngonhaung" nho: gyevo qe wa- yao: bam magai: ru kad' nae" qhid' mae" byin phyo: khug' zin" to" rure ngonhaung" yang ba: pye' byid: va" ru the' ba: yu gelao"- Mao"So: yang yao: bam: byin phyo: mau" re aung: pye' byid: va" rure myid: beim" ako". Ai: thao ngonhaung" alhab' wa vang re dam: zao nae" qhid' mae" dam: tug' lo" bam va".
16Ai: ayo, mae" thao phyao:- nga" byu agaung: dano" mau" zaui" na: au: agaung: dano" wa gyemai gyebau: ve, gyezai lhae tad' jham- go jham we' myo: jham ci mung: lhaug' zaung" ako". Aimung: ngonhaung" nho: au: jhaung qere: vang dam: zao: na: ra" mo,byu qere jab byang" sho' bao" thaug' byid' ako". 17Vang zao nae" sag' vo: zai jham tai mo, lhao" re: dalo; yang mau" zaui: mung: dang: ra" dashad' lo; yang gyezai shae lhae ci: ako". 18Aimung:- vang zao: na: ra" yaug khao:ngo" nho: phyid' dam: mae shae pyang: dakhyae: khyae: taui" vin: ci: ako". Labo" mad mung: gye peim: nae" yaug wa nga" nhae mae na: jo; ra". 19Ngo wa mo, byu qere- yao: bam: au: jhaung qe we' yao: bam: zug: ade, qere ceru: ein: ta" kyo: va". Lo, zo" saung" lu mung: ngonhaung" wa vang cao" yang dayaug we' dayaug saung" jho" va" na: bam: ra". 20Naonhaung" wa labo" mad thoe the' gyo: gelao" ngojhao" zang" ham: lo ge,. Ngonhaung" nho: Mao"So wa- ngonhaung" qhid' mae" gyekhe' zin: byid' li" nae"- ein: ta" va". 21Aimung:- ne, khao: ngo" mug: bo" myi: yo, mae" myi" ayo, kyi jham thug' sho' ngonhaung" mae" agaung: dano" mo, vang mae mau" zaui" na: au:-agaung: dano" mo, wa lhae tad' jham ci mung: lhaug' zaung" na: bam va".
22Ce: ayo, mae ngo wa- mau" qu" kam: mo, re- na" gaung ngonhaung" mau zaui" ru we' dakhyo:- myi" ayo, mae re: vomo" re qo" lhaug' zaung" nae" qhid' mae" Yerusalem mae myi" myi" re yao: bam we' yao: bam: bao" thaug' byu qe na ca" genae" ein: ta" to: va". 23Ngo wa nga" mai bau: jham re myi" ayo, mae lhao" re: makhyad' pye'- nga" mau" zaui: byin cao: qe dayaug re: nga" daui daui mo, dayaug re:- nga" kao lhaug' mo, dayaug re: makhyad' ngad: ako". Aimung: ngonhaung" alhab' mo, wa ngonhaung" nho: gyezai shae lhae jham re lo, mae zhab' ci yang: na: bam va".
Currently Selected:
NEHEMIA 4: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
