XEIM: NGAUI" 21
21
Khin Jaung Qenho: Gyang" Lho" Ru
1-3 Asang wa Moshe re Arun nho: khinjaung qere ta" kyo: nae" qhid' mae" amyin" byid' ra". Aiwa yao: myhi"- yao" pho"- yauggai myiqe: zo:- mao:nhaung: mangad: lao" yao" yham mae na: ra" yham maqo" shi" ra" nhae: mo" za: mangad: re- ba nam sang: cao: shid: au:- sushid poe mae boleim: ra" khyo" yang khinjaung pho" wa yao: yao" gaung re caung:pa" thung" khyo" masan masin" magai: kad' yu ngad: ra". 4Yao: wa lo, xo' ra" khyo" yang yao: we' ba nam dau: ra" mo, shid: rumae yao: yao" gaung re masan masin" magai: boe" nhao nae" ngad: ra".
5Khinjaung pho" wa yao" au: re magai: qaug ngad: ra". Yao" nho: nhad' maui: rere: magai: qaug ngad: ra". Yao: kaug' ngug: na: ra" khyo re qhu" byid: nae" qhid' mae" yao" gaung re magai: lhai" cad' nae" ngad: ra". 6Yao: wa gyang" lho" ca" mung: nga" mang re magai: phoe nhao ngad: ra". Yao: wa ngore zo:ve ngaui" xeim: ngaui" byid: mung: yao: wa gyang" lho" ca" ra". 7Khinjaung pho" wa shava myhi" boe" qu" va" yaug re:- zomyi: gyang" mangad: yaug rere:- su: yang kao" to" ra" myiqe: rere: lo, magai: xo' yu nae" ngad: ra". Yao: wa gyang" lho" yaug ngad: ra". 8Mo, byu qe wa khinjaung pho" re gyang" lho" yaug khyo" myid: jho: yu ca" ako". Pe"mung:ga"re yao: wa ngore zo:ve ngaui" xeim: ngaui" byid: yang: ngad: ra". Ngo wa Asang ngad:- ngo wa gyang" lho" yaug ngad mung:- nga" byumyu" qere re: gyang" lho" nhao yaug ngad: ra". 9Khinjaung pho" myiqe: zo: wa shava myhi" boe" li" ngad: re yao: wa yao: pho" re nga: yeim yaug ngad: ra" yao: re ngha" se' pye' nae" ngad: ra".
10Khinjaung agyi pho" wa yao" au: dao mae xau vhe' gyad byid' ru kham: yu va" ru we' khinjaung mai bau: jham ve, nae" qhid' mae" qhaug' byid' to: va" ru ngad mung:- yao: wa yao" au: re makyo' shaung lo: mangad: lao" yao: kaug' ngug: na: ra" khyo re qhu" byid: nae" qhid' mae" yao" mai bau: jham re magai: lao" cad' nae" ngad: ra". 11-12Yao: wa ngore qhaug' byid' to: va" yaug ngad mung: Zaung re to: co' yang: yao: yao" yao: myhi" yao: pho" ngad sho' ngadqere: sushid mao jo; ra" yham khug khyo vao ye" ra" khyo" yang- yao: yao" gaung re caung:pa" thung" khyo" masan masin" boe" nhao: ru we' nga" gyang" lho" Zaung rere: maca' majhad' magai: kad' ngad: ra". 13Yao: wa zomyi: gyang" re lo, xo' yu nae" ngad: ra". 14Cug' mo" rere:- kao" to" ra" myiqe: rere:- shava myhi" boe" qu" ra" yaug rere: lo, magai: xo' yu nae" ngad: ra". Yao: wa yao: yao" kaung mae" zomyi: gyang" re za: lo, xo' yu nae" ngad: ra". 15Airu: mangad: re gyang" lho" ang: ra" yao" zoshao qe wa caung:pa" thung" khyo" masan masin" mo, ngad: li" genae". Ngo wa Asang ngad mung: ngo wa yao: re Khinjaung khyo" gatau khyin: san: to: va"- ga: ta" ra".
16 Asang wa Arun re- 17Ceru: ta" kyo: nae" qhid' mae" Moshe re amyin" byid' ra". Aiwa ni" nho: myid:zo: qemae" gaung dau qo bo: ra" yaug khag' ngadqere: ngore zo:ve ngaui" xeim: magai: ngaui" byid: nae" ngad: ra". Ce: thung"li re joe" lo nae" ayo, alhab' mae ci qo: ra". 18Gaung dau we' sin: yang: qo bo mo, ngad: ra" myo, jid- khyid qeim- gaung dau: majab yaug- gaung dau: jan" de, yaug- 19Khyid gyug: lo, gyug:- 20Dao gug:- byu lang"- myo, jid no de, yaug- mao gae: de, yaug- daung" pye' va yaug khag' re: ngaui" xeim: magai: ngaui" byid: nae" ngad: ra". 21Khinjaung Arun nho: myid:zo: qemae" gaung dau qo bo yaug khag' ngadqere: ngore zo:ve ngaui" xeim: magai: ngaui" byid: nae" ngad: ra". 22Airu" ra" yaug wa ngore ngaui" byid' ra" gyang" lho" zo:ve we' gyai gyang" lho" ra" zo:ve ngaui" xeim: re gai: zo" ra". 23Yao: wa gaung dau we' sin: yang: qo bo yaug ngad: ruyang yao: wa gyang" lho" ra" qe, kyo re we' phan khyo magai: te' ye: nae" ngad: ra". Yao: wa ai: gyang" lho" ra" ja: jham re masan masin" magai: kad' nae" ngad: ra". Pe"mung:ga"re ngo wa Asang ngad mung: aijham re gyang" lho" nhao va"- ga: ta" ra".
24Airumung: Moshe wa ceru re Arun we' Arun nho: yauggai zo: qere we' Israel byu qe alhab' re ta" kyo: ra".
Currently Selected:
XEIM: NGAUI" 21: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009
