YOSHU 21
21
Levi Amyu" Kaung Qenho: Vogaung: Jham
1Levi amyu" yham khaung au: jhaung qe wa khinjaung Eleaza we' Nun nho: yauggai zo: Yoshu we' Israel amyu" yham khaung alhab' mo; nho: au: jhaung qejhao" ye" ako". 2Yao: bam wa Khanan mung" Shilo jo, qo mae aibam re- Asang wa Moshe nhad' khyo"- ngonhaung" na nae" vogaung: we' ai: lhang" gam: ngonhaung" nho: gug'nyhug' jham qhid' mae" mhin: gyo, jao: re we' daga" byid: nae" ga: amyin" byid' to" ra"- ga: ta" ako". 3Airumung: Israel byu qe wa Asang: amyin" re cao" yang: Levi amyu" kaung qere vogaung: daqhae: we' ngonhaung" nho: gug'nyhug' jham: qhid' mae" mhin: gyo, jao: mug:myid jham re yao: bam yao" mug:myid jham mae" jaung byid' ako".
4Levi amyu" yham khaung qemae" Kohad kaung re vogaung: jham sao qhid' jaung byid' ako". Khinjaung Arun nho: myid:zo: qere vogaung: daxe: sam vo re Yuda- Simon we' Benyamin amyu" qenho: mug:myid mae" kho' jaung byid' ako". 5Kohad kaung mae" dang: ra" mo, re wa vogaung: daxe vo re- Ephrim- Dan we' ba vao shad' mae Manashe amyu" qe: mug:myid jham mae" kho' jaung byid' ako".
6Gershon kaung re wa vogaung: daxe: sam vo re- Isakha- Ashe- Nabhtali we' ba thug' shad' mae" Manashe amyu" kaung qenho: mug:myid jham mae" kho' jaung byid' ra".
7Merari kaung yham khaung qe wa vogaung: daxe: shid' vo re- Rubin- Gad we' Zebulun amyu" kaung qe: mug:myid jham mae" kho' jaung byid' ako".
8Israel byu qe wa- Asang: yang Moshe nhad' khyo" amyin" byid' to" ru we' dakhyo: pha" ce' khyo" yang: ai: vogaung: jham re we' yao: bam: mhin: gyo, jao: jham re Levi amyu" kaung qere kho' jaung byid' ako".
9Ceru wa Yuda we' Simon amyu" kaung qe: mug:myid jham mae" vogaung: jham nho: mang jham ngad: ra". 10Cejham wa Levi mae" gyo" li" mung: Arun nho: myid:zo: qe ngad ko" ra" Kohad kaung qere byid' to" ra" mug:myid jham ngad: ra". Yao: bam re sao qhid' kho' jaung byid' ako". 11Yao: bam re Arba vogaung: (Arba wa Anag nho: yao: pho" ngad: ra") re byid' ako". Yuda bam mug: mae jo, mung: ana" wa- Hebron mhang" ra" vogaung: we' ai: lhang" gam: mhin: gyo, jao: mug:myid bobo yang: byid' ako". 12Ngadqere: vomo" mae" pa: din" jham re- ai: nho: vogaung: jham rere: Yephune nho: yauggai zo: Khaleb re yao" jo,nho" khyo" byid' to: gau ngad: ra".
13Hebron (phao: khug vogaung: jham mae" davo) re bolaung: mung:- o mae" vogaung: jham ngad ko" ra"- Libna. 14Yati- Esthemoa- 15Holon- Debi- 16Ain- Yuta- Bed Sheme jham re aibam: mhin: gyo, jao: jham we' daga". Yuda we' Simon amyu" kaung qenho: vogaung: mae" vogaung: gug vo re Arun nho: myid:zo: qere kho' jaung byid' ako". 17Benyamin amyu" kaung qe: mug:myid mae"- Gibeon- Geba. 18Anathod- Almon vogaung: byid vo re aibam: mhin: gyo, jao: jham we' daga" yao: bam re byid' ako". 19Alhab' vogaung: daxe: sam vo re aibam: mhin: gyo, jao: jham we' daga" Arun nho: myid:zo: qe ngad ko" ra" khinjaung qere byid' ako".
20Levi amyu" Kohad kaung mae" gatau yham khaung qe wa Ephrim mug:myid mae" vogaung: damyo" re kho' jaung byid' ako". 21Yao: bam re- vogaung: byid vo byid' to" ako". Aijham wa- Shekhem we' Ephrim bam mug: mae" yao" mhin: gyo, jao: (Phao: khug vogaung: jham mae" davo ngad: ra") Amung: Geze- 22Kibzim- Bed Horon we' aibam: mhin: gyo, jao: mug: myid jham ngad: ra". 23Dan mug:myid mae" yao: bam re byid vo byid' ako". Aijham wa- Elteke- Gibethon- 24Aiyalon Gathrimon we' aibam: mhin: gyo, jao: mug:myid jham ngad: ako". 25Ba vao shad' mae Manashe amyu" kaung qenho: mug:myid mae" yao: bam re shid' vo byid' to" ako". Aishid' vo wa- Tanag- Gathrimon we' aishid' vo: nho: mhin: gyo, jao: mug:myid jham ngad: ako". 26Kohad kaung mae" yham khaung qere wa alhab' re vogaung: daxe vo we' aibam: mhin: gyo, jao: mug:myid jham re qo" yu: ako".
27Levi amyu" gatau daphung: ngad ko" ra" Gershon kaung qe wa ba thug' shad' mae" Manashe amyu" qe: mug:myid mae" vogaung: shid' vo qo" yu: ako". Aishid' vo wa Bashan mung" mae Golan- (Phao: khug vogaung: jham mae" davo ngad: ra") Beshtera we' shid' vo: nho: mhin: gyo, jao: mug:myid jham ngad: ako". 28Isakha amyu" kaung qe: mug:myid mae" vogaung: byid vo re yao: bam qo" yu: ako". Aijham wa Kishon- Daberad- 29Yamud- Engannim we' aijham: nho: mhin: gyo, jao: mug:myid jham ngad: ako". 30Ashe amyu" kaung qe: mug:myid mae" vogaung: byid vo re yao: bam qo" yu: ako". Aijham wa- Misha- Abdon 31Helakat- Rehob we' aibam: mhin: gyo, jao: mug:myid jham ngad: ako". 32Nabhtali amyu" kaung qe: mug:myid mae" vogaung: sam vo re yao: bam qo" yu: ako". Aijham wa- Galile mung" mae Kade we' ai nho: mhin: gyo, jao: mug:myid (Phao: khug vogaung: jham mae" davo ngad: ra") Hamod Do- Kartan we' aibam: mhin: gyo, jao: mug:myid jham ngad: ako". 33Gershon kaung mae" yham khaung qe wa alhab' re vogaung: daxe: sam vo we' aibam: mhin: gyo, jao: mug:myid jham re qo" yu: ako".
34Levi amyu" kaung qemae" dang: ra" mo, ngad: ra" Merari kaung qe wa Zebulun amyu" qenho: mug:myid mae"- vogaung: byid vo re yao: bam qo" yu: ako". Aijham wa Yokneam- Karta- 35Dimna- Nahala we' aibam: mhin: gyo, jao: mug:myid jham ngad: ako". 36Rubin amyu" kaung qe: mug:myid mae" vogaung: byid vo re yao: bam qo" yu: ako". Aijham wa Beze- Yaha- 37Kedemod- Mephad we' aibam: mhin: gyo, jao: mug:myid jham ngad: ako". 38Gad amyu" kaung qe: mug:myid mae" vogaung: byid vo re yao: bam qo" yu: ako". Aijham wa Gilead mung" mae" Ramod we' ainho: mhin: gyo, jao: mug:myid- (phao: khug vogaung: jham mae" davo ngad: ra".) 39Mahanaim- Heshbon- Yaze we' aibam: mhin: gyo, jao: mug:myid jham ngad: ako". 40Airumung: Merari kaung qe alhab' re vogaung: daxe: shid' vo kho' jaung byid' ako".
41-42Israel byu qe sang: ra" mug:myid mae" vogaung: byid xe: she' vo we' aijham re lhang" kham" to" ra" mhin: gyo, jao: mug:myid re Levi byu qere byid' ako".
Israel Byu Qe: Mung"dan: Nho: Jo, Nho" Re Sang: Yu: Ra" Khyo
43Aimung: Asang wa byid: nae" ga: yao: bam: phug' pho" qere jhaug' za: dao:so: byid' to" ra" mug:myid alhab' Israel byu qere byid' ra". Yao: bam aire qo" sang: yu gelao"-aimae te" na: ako". 44Yao: bam: phug' pho" qere dao:so: byid' to" ru we' dakhyo: Asang wa mung"dan: geim" re ngaui pyo: yaug yo: ru yao: bam re byid' ra". Yao: bam: gyevo qe alhab' mae" dayaug re: yao: bam re gye maqo" kad' ngad: ako". Pe"mung:ga"re Asang wa Israel byu qere yao: bam: gyevo qe alhab' mo; dao mae aung nhao: ra". 45Asang wa Israel byu qere yao: byid' to" ra" dao:so: jham mae" ja: khao: ngo" re zaui" pyang" byid' ra".
Currently Selected:
YOSHU 21: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
