YOSHU 2
2
Yerikho Vogaung: Khyo Yoshu Jin" Byu Jham Re Nhao: Ke' Ra" Khyo
1Ai: thao Yoshu wa Shithim jamu mae" jin" byu shid' yaug re- Khanan mung" re akhug' avho' khyo" yejo" qu" mung:- je yang: Yerikho vogaung: re yejo" qu" genae" qhid' mae" amyin" byid: yang nhao: ke' ra". Yao: shid' yaug ai: vogaung khyo joe" ye gelao"-Rahab ga: mang: ra" shava myhi" yham mae yao: shid' yaug damyi yethang: na: ako". 2Yerikho vogaung: kho:kham pho" wa mung"dan: re jin" byu kad' nae" qhid' mae" Israel byu damyo" ai: myi re joe" li" ko" ra" thoe re the' gyo" ra". 3Airumung: yao: wa Rahab khyo byu nhao: ke' mung:- ni" yham mae" yauggai shid' yaug wa mung"dan: geim" re jin" byu kad' nae" joe" li" ru ngad: ako". Aishid' tao re jhui" thug' lo byid: la,- ga: ta" nhao: ke' ra".
4-6Ailao" yao: wa- nga" yham khyo yauggai damyo" joe" li" ako". Ngadqere: yao: bam khai: mae" joe" li" ko" rure ngo maba: yao: bam wa ba vao yo,- vomo" kham: mapyid' shire to" lo" avako". Yao: shid' yaug re khai khyo phao lo" ko" rure ngo mamyao: ke'- ngadqere: yao: shid' yaug khyo phyad cao" khe' ko" re wa naonhaung" yao: bam re myhi genae"- ga: tau" ra". (Ana" Rahab wa jin" byu shid' yaug re khaungdao khyo jhui" do, lo" mung:- jid: mo" gae jham: qao: mae yao: shid' yaug re lo" nyham" to" ra".) 7Kho:kham pho" nho: byu qe wa vomo" mae" to" ye" lo" ako". Ailao" vomo" kham: re pyid' pye' ako". Yao: bam wa Israel jin" byu shid' yaug re Yodan gyaung: gau" de; ra" jo, qo joe" sho' yecao" qho: ako".
8jin" byu shid' yaug mayab shire Rahab- wa yham khaung dao khyo do, lo" mung: yao: shid' yaug re- 9Asang wa ce: mung"dan: naonhaung" re byid' pye' va" rure ngo ba: ra". Mung"dan: khug mae" yaug khao: ngo" wa naonhaung" re gyaug: na: ako". 10Naonhaung" Egutu mung" mae" to" phao: lo ko" au: Tham: Ne re Asang: yang khoru: kin" ho: lo" nhao: rure ngonhaung" the' gyo: va". Yodan gyaung: ba thug' shad' Amori kho:kham shid' yaug ngad ko" ra" Sihon we' Oga re naonhaung" khoru: se' pye' ko" ra" khyo rere: ngonhaung" the' gyo: va". 11Aikhyo re ngonhaung" the' gyo: we' ngonhaung" gyaug: nin" bam va". Naonhaung" mathao mae ngonhaung" nho: lhe" ra" myid alhab' wa baui" byaug va". Naonhaung" Mao"So Asang wa mug:gaung tho' mae we' ce: myidgaung mae na: ra" Mao"So ngad: ra". 12Ana" ni" shid' yaug re ngo nyang" za: kad' va" ru we' dakhyo: nga" yham byu qere naonhaung" kad' genae" ein: rure yao" mang re lao: yang jham tang: ge,. Amung: ni" shid' yaug re: ngo qo" lam: ra" aso: daja: ja: ngore byid: gela,- 13Nga" pho"- nga" myhi"- nga" mao:- nga" bai:- nga" nhaung: qe we' yao: bam: yham byu qe alhab' naonhaung" khyad' yu genae" ein: rure ngore dao:so: byid: gela,- ngonhaung" re se' pye' ru daqhug' nhao gela,- ga: ta" ra".
14Aishid' yaug wa yao: re- ngonhaung" ta" ru we' dakhyo: ngonhaung" makad' yang: ngad: re Asang wa ngonhaung" kao so' re yu: pye' vashao: wo"- ngonhaung" pe" kad' va" khyo re nao khag' rere: mata" kyo: yang: ngad: re- ce: mung"dan: Asang: yang: ngonhaung" re byid' ra" au: nao re ngonhaung" nyang" za: kad' nae" ein: ngonhaung" nao re dao:so: byid' ra"- ga: ta" ako".
15Rahab wa vomo" vang yae mae kad' to" ra" yham mae na: ra". Airumung: aishid' yaug re bao: zo: kham: khyo" taui" yang shoe' gyo" lo" nhao: ke' ra". 16Yao: wa bam ge, khyo lo" ge,- mangad: re kho:kham pho" nho: byu qe ni" shid' yaug re qho: myao: li" genae" yao: bam dam: tug' lo yo, joe" sho' aimae sam ba yevho' na ge,- ai:thao lao"- ni" shid' yaug : nho: gyaung khyo khyo ye" lo" ge,- ga: ta" ra".
17Aishid' yaug wa nao nga" shid' yaug re kad' nhao: ra" dao:so: re nga" shid' yaug zaui" pyang" nae". 18Nao ceru: kad' ca" ra". Ngonhaung" naonhaung" mug: khyo jhin" vao li" lao"- nao nga" shid' yaug re shoe' gyo" lo" nhao: ra" bao: zo: kham: mae ce: taui: ane re taui" to: wa,- ni" pho"- ni" myhi"- ni" mao: ni" nhaung: we' ni" pho" nho: yham byu qe alhab' jhui" yu yang: ni" yham khug mae zhang: to: wa,. 19Dayaug yaug yham khug mae" thug' lo" yang: ngad: re yao: yao" xao au: yao: vin ca" li" nae". Ngonhaung" qo mayu nae". Ngadqere: nao we' daga" yham khug mae na: jo; rumae" dayaug yaug dae de; yang: ngad: re wa ngonhaung" qo yu nae". 20Ngadqere: ngonhaung" kad' lo: ra" mau" zo" re dayaug yaug re nao ta" kyo: lao" kam" wa nao nga" shid' yaug re kad' nhao: ra" dao:so: re ngonhaung" zaui" pyang" maca" lo nae"- ga: ta" ako". 21Yao: wa aire myid vang" mung:- yao: shid' yaug re nhao: ke' ra". Yao: shid' yaug phao: lo" gelao"- yao: wa ai: taui: ane re bao: zo: kham: mae taui" te' to" ra".
22Jin" byu shid' yaug wa bam ge, khyo do, lo" mung: yevho' na: ako". Kho:kham pho" nho: byu qe wa yao: shid' yaug re mung"dan: geim" mae sam ba lam: lam: yeqho: ako". Ngadqere: yao: bam wa aishid' yaug re maqhug' ngad: ako". Airumung: yao: bam Yerikho khyo tug' phao: lo: ako". 23Ai: thao jin" byu shid' yaug wa bam ge, mae" gyo" lo mung: qid gyaung: re gau" de, yang: Yoshu jhao" dam: tug' phao: lo" ako". Yao: shid' yaug wa boe" ra" khyo ja: khao: ngo" Yoshu re ta" kyo" ako". 24Aimung: yao: shid' yaug wa ai: mung"dan: geim" re Asang ngonhaung" re byid' to: va" rure nga" shid' yaug jhaug' za: ba va". Aimae na: ra" mo, alhab' wa ngonhaung" re gyaung: na: ako"- ga: ta" ako".
Currently Selected:
YOSHU 2: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
