YOBA 42
42
1Ailao" Asang re Yoba phaug' tau" ra".
Yoba
2 Asang we"- nao wa kheim: so' qi" thao" mung:
nao kad' nug: ru alhab' re qo" kad' yaug ngad: rure ngo ba: ra".
3Ngo pe" yao: maba: ru-
ni" nho: pha,jhi" re khoru: mung: vae" myid' i? ga: nao myid' ra".
Ngo wa ngo maba: gyo" ra" khyo re jhau mung:-
ngo matho' gai: ba: ra" mug' pho: jham: khyo re ta" va".
4Nao wa ngore- nao jhau: na: au: tae" gyo: mung:
ni" nho: dao: myid: jham re phaug' tau: nae" qhid' mae" ta" ava".
5Lai: lo" va" ayo, gu: mae ngo wa- su gaje: yang ni" nho: khyo re ta" kyo: ko" ru za: alhaung" gyo" qu"-
Ngadqere:- ana" kam" wa- nao re nga" myo; yang yao: the' myao va".
6Aimung: ngo wa- ngo ta" lai: lo: ru alhab' mathao mae myid: qho' mung:-
phalhug we' myimhab bam mae nhag' lam: tha" pye' va".
Dao: Pin"
7 Asang wa Yoba we' bin: jho" jhau lao" Elipha re- ngo wa nao we' ni" ba nam shid' yaug re nhag' yo" ra"- pe"mung:ga"re naonhaung" wa nga" khyo re nga" daui daui yaug Yoba we' dakhyo: dangman" ra" khyo" mata" gengad: ako". 8Ana" Yoba jhao" nung: jaung lo: nhad' dau: we' yao lo: nhad' dau: she: ye: mung:- aijham re naonhaung" yao" qhid' mae" xeim: phad' ngaui" ge,- Yoba wa naonhaung" qhid' mae" akyu" mho' byid' li" nae". Aimung: ngo wa yao" akyu" mho' dao: re phaug' tau: byid: mung:- naonhaung" leim zo: nae" man: qi" ra" khyo" nga: mayeim nhao nae". Naonhaung" wa nga" khyo re yao: we' dakhyo: dangman" ra" khyo" mata" ngad: ako".
9Elipha- Bildad we' Zopha wa Asang: yang yao: bam re kad' nhao: ru we' dakhyo: kad' ako". Aimung: Asang wa Yoba nho: akyu" mho' dao: re phaug' tau: byid' ra".
10Aimung: Yoba wa yao" ba nam sam yaug: qhid' mae" akyu" bin: mho' thao- Asang wa- yao: re dalhang dam: na: dai nhao mung:- qhid' phyao: yao: lhaung" qo" lai: lo: ra" tho' shid' nho" byid' ra". 11Yoba nho: mao:nhaung: qe alhab' yao: nhae mo" qe alhab' we' qhid' phyao: mae" yao" ba nam byin cao: alhab' mo, wa yao: re li" qhug' mung: yao: we' daga" yao" yham mae zo: shaug' poe kad' na: ako". Yao: bam wa Asang: yang yao: re leim zo: nhao: ra" qug: khai: alhab' mathao mae sho: no myid qhu" byid: mung: nhag' tang" byid' ako". Yaug khao: ngo" wa yao: re ngaui we' qhang lo,pin: dalam: lam: jhaung qhu" li" byid' ako".
12 Asang wa Yoba nho: apyad thao mae" dau re sao qhid' dau mae shaman" byid' ra" tho' re: je yang: shaman" byid' ra". Yoba wa yao datug: byid taung- gola:u khyaug' taung- nung: shid' taung we' loze dataung qo" sang: ra". 13Yao: wa yauggai zo: nhad' yaug we' myiqe: zo: sam yaug: nho: yao: pho" ngad: ra". 14Yao: wa bai: mo" yaug re Yemima- bai: le; yaug re Kezia- ngai: thao" myiqe: zo: re Keren Hapug ga: mhang" ra". 15Mug: myid geim" mae Yoba nho: myiqe: zo: qe qhi" yaung" ra" myiqe: qe dayaug re: mana ngad: ako". Yao: nhae ho' yao: pho" wa yao: bam re yao: bam: yao: maung bam we' dakhyo: za: jo,nho" ma re kho' gae byid' ra".
16Ceru: mung thao Yoba wa dayo: byid xe zin daui: na mung:- yao: myid: qe- yao" myid: kai: qere myao co' ra". 17Ai: thao yao: wa- gyai mao: yang: shid: lo" ra".
Currently Selected:
YOBA 42: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
