YOBA 38
38
Yoba Re Asang Phaug' Tau" Ra" Khyo
1Ailao" Asang wa la qam" khug mae" Yoba re dao: jhau: ra".
Asang
2Ni" nho: pe" maba: ra" dao: keim: jham: yang
nga" pha,jhi" re myid' ca: qu" nae" yaug nao wa khag' ngad: i?
3Ana" gai lo: ru: to" ye, mung:
nao re ngo myid' ra" dao: myid: re phaug' tau: wa,-
4Mug: myid re ngo phan" phaug' to" au: nao aimae na: i?
Nao gyai ba: ngad: re- ai: ra" khyo ngore ta" kyo: la,.
5Airu: khoqhi" qi: nae" ein: rure khag' myid: phyid' ra" i?
Ai: dao mae ka" ra" taui: re khag' yang khao" to" ra" i? Dao: phyid alhab' re nao ba: i?
6Myidgaung re thaug' to" ra" zang thaug' jham re pe" yang zaui" ci: i?
Mug: myid nho: akhyug laug zang re khag' zhaug' to" ra" i?
7Ai: ba mug: bo" li" re kyi jham daga" Nghaui"caung: ako".
Aimung: mug:gaung mae na mo, wa ngaui bau: ngaui lho" hug' ako".
8Myidgaung: vae: dug mae" panglai: baug: thug' li" re
panglai: re jhid' tam" ra" kham: mo" re khag' pyid' to" ra" i?
9Pang:lai:: re jham thaui" jham: yang nghoe' to: mung:
mug: cad' yang thab' to: yaug wa ngo ngad va".
10Ngo wa panglai: re mug: kyo: kyo: byid: mung:-
aire kham: kyao" yang kyao" lhaung" to: va".
11Ngo wa panglai: re cekhyi: joe" sho' za: angad: va: khyo dalai: lo"-
Ce: mae kheim: so' qi" ra" ni" bang: lhung" jham thang ca"- ein: ta" to: va".
12Yoba we"- ni" dapyad: geim" mae
ne, seim mug: bo" li" nae" qhid' mae" amyin" byid' qu" i?
13Mug: bo" li" ruyang myidgaung re myhag' pye' mung:
makhyang: mashab mo, re yao: bam: phao: vho' jo, qo mae" lao" lhaui" ke' nae" qhid' mae" amyin" khyo" qu" i?
14Na" gaung mug: bo" wa- bug gaung jham we' lao:khaung: jham re-
mai bau: kan nhe' to" ru we' dakhyo: ze: thug' li" nhao mung: zhogam: myid dao mae dazid thaung" te' tung" to: ruru: de: de: za: myao: nhao: ra".
15Na" gaung: bo" bao wa makhyang: mashab mo; qhid' mae" saung" bao mung:
yao: bam aqan alan lo, mau" makad' genae" qhid' mae" tam" to: byid' ra".
16Nao wa- panglai: khug mae" qid baug: jham khyo joe" ye" qu" i?
Nao wa- nammugdara tham: kao" mae su" qu" i?
17Nao re dayaug yaug: yang mug: cad' jo; ra"
movo: mug: lhaug' ra" kham: jham re qhu" byid' qu" ko" i?
18Mug: myid khoqhi" qi" rure nao tho' ba: i?
Nao ba: re ngore phaug' tau: byid: la,.
19Mug: bo" khai: mae" li" rure nao ba: i? mangad: lao"-
mug: cad' nho: apan aqao: pe" ngad: ru wa ba: i?
20Ai: shid' ja: re khovha" va: sho' lo" nae" ru nao qo" qhu" byid' i?
Ai: shid' ja: wa dam: qo" tug' phao nhao: ke' nae" i?
21Nao wa gyai mao: va" rumung:
mug:myid re phan" phaug' to" ra" au: na va" mathao mae nao ba nae" ein: ngo myid: lam:-
22Gyu: we' lagqu re ngo shaung: to" ra"
zai: to: qe, khyo nao vao: ye" qu" i?
23Ngo wa aishid' ja: re- qug: khai: byid: nae" ayo, jham we'
mang: zin: gyekhe' ra" ba na jham: qhid' mae" seim" jin" to: va".
24Ba thug' li" ra" jo, qo khyo nao joe" ye" qu" i? Mangad: lao"-
ba thug' shad' mae" la hug' lo: ra" jo, qo khyo joe" ye" qu" i?
25Mug: qid wa gyo" li" nae" qid khyo: re khag' dau" to" ra" i?
Aimung:- aug' la qhid' mae" khyo re khag' sho' to" ra" i?
26Khag' mana: ra" jo, qo mae khag' yang mug: qu: gyo" nhao: ra" i?
27Vohau: yaug: thug' li" nae" qhid' mae" kyaug' ho mung:
qid shab' ra" myidgaung re khag' yang qid sheim: byid' i?
28Mug: qid we' nghin wa yao: pho" qo" ako" i?
29-30Qid wa laug zang boe" lo" mung: panglai: re khai" lo" nhao: ra".
Gyu: khai" we' nghin khai" yao: myhi" wa khag' ngad: ra" i?
31Nao wa cad' myhung kyi jham re daga" za: qo" sham" dang: nae" i?
mangad: lao" bo" myhung re taui" to" rure qo" pheim: ke' nae" i?
32Nao wa- kyi jham re yao" ayo, we' ayo, mae khyo qo" shid' byid: nae" i?
aimung:- kyi qi: we' kyi ngai re khyo qo" ceim" shid' nae" i?
33Nao wa- mug:gaung re eib: ra" tarha" re ba: i?
aimung: ai: tarha" re myidgaung mae qo" ci sho' nao qo" kad' nae" i?
34Nao wa jham thaui: jham re hug' yang: amyin" byid: mung:
nao re mug: qid bab bab qo" qu: jhug' byid: nhao nae" i?
35Aimung: nao wa- lhe' cad' re cad' ke' nae" amyin" byid' re aiwa nao jhao" li" mung:-
nao asang re caung da" byid: nae" ga: ta" li" nae" i?
36Ibi ngho' re Nila gyaung: je: nae" ru khag' yang ta" shid' i?
Mug: qu nae" ga" ru qo, pho" re khag' ta" shid' i?
37-38Jham thaui: jham re qo" nghe' sho' khag' pha,jhi" bo: i?
Aimung: phalhug re myid zhai: khai" boe" lo" sho' qao nhao: ra" mug: qu qid re
vhe' sheim" ke' nae" qhid' mae" jham thaui: re khag' qo" kae" ke' i?
39-40Khang khyi jham wa yao: bam: khyaung jham mae vho' laung" jo; au: ngad ngad-
mangad: lao" yao: bam: dungkhung: jham mae lang" jo, mung: sho: lham: na: au: ngad ngad
khang khyi jham zo: nae" zo:ve re nao qo" qho zho" i?
Amung: khang khyi nau" jham re vae: gyi: sho' nao qo" zho" i?
41Kano, jham vae: moe; mung: du" lae" qin" au:-
yao: bam: kano, nau" jham ngore zo:ve mho' yao ko" au:-
zo:ve zho" ru khag' ngad: i?
Currently Selected:
YOBA 38: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
