YOBA 35
35
1-2Yoba we"- Mao"So: qhid' kheim: mae
nao qobo maqo" ga: ta" ru wa majo ngad: ra".
3Mangad: lao"- Mao"So re- nga" nho: qobo: yang nao re pe" li" mung: i?
ngo qobo mashad' yang: pe" the' va" i? ga: myid' rure: majo nae".
4Ngo wa nao re we' ni" byin cao: qere re: myid: nae".
5Mug:gaung khyo qu" ke' ge,- Jham thaui: jham wa khonho" myhao: ra" i?
6Nao qobo shad' re Mao"So khyo pe" malo" zao"-
nao myo: sho' lhang shad' ru kad' ngad: re- aiwa yao: re pe" lo" mung nae" i?
7Nao ainho" din:man: mung: Mao"So re qo" bao" i?
Mao"So qo ca" ru nao mae pe" majo,
8Ni" nho: qobo jham: mathao mae dae leim zo" ru wa naonhaung" byu yao: cao za: angad:-
aimung: nao kad' ra" gai: rure byu yao: cao: re za: bao" thaug' byid' ra".
9Byu qe wa deim" zag zo: qhug' gelao" yao: bam nokyang: kyang" ako".
Yao: bam wa yao: bam re khyad' yu nae" byu dayaug yaug re hug' yao: ako".
10Ngadqere: yao: bam wa- yao: bam re phan" ra" Asang Mao"So jhao" malhang: lo ngad: ako".
Mug: cad' no, sang: kyid ngad: au: yao: bam re myid: lao" jo, qo byid: yaug jhao" malhang: lo ngad: ako".
11Yao: bam wa- ngonhaung" re gug'nyhug' mangad: lao" ngho' tho' pha,jhi" bo nhao: ra"
Mao"So jhao" malhang: lo ngad: ako".
12Yao: bam wa bao" yu nae" mho' yao: ako". Ngadqere:- Mao"So maphaug' tau: byid: ngad: ra".
Pe"mung:ga"re- yao: bam wa ngad beim: mung: makhyang: mashab mo, ngad: ako".
13Yao: bam hug' yao: ru wa yao: bam: qhid' mae" pe" akyu" mabo ngad: ra".
Qam: so' bo: thao" ra" Mao"So wa yao: bam re mamyao byid:- gyo: re magyo: byid: ngad: ra".
14Yoba we"- nao wa Mao"So re mathe' myao ga: ta" ra"-
ngadqere: nhag' lam: qhang qhang to: mung: lao" na wa,- ni" si: wa yao" qhid' kheim: mae joe" jo; ra".
15Mao"So wa qobo dae mabyid: ga:-
yao: wa qobo re pe" xan: masun: ga: nao myid: jho: ra".
16Nao xo' yang: jhau: na: ru wa pe" akyu" mabo ngad: ra"-
nao pe" ta" na: rure nao maba: ru wa de: de: za: myao: jo; ra".
Currently Selected:
YOBA 35: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
