YOBA 29
29
Yoba Wa Yao" Si: Re Lo" Thao" Lhang Ta" Ru
1Yoba wa dao: dam: jhau: ra".
Yoba
2Nga" dao mae Mao"So lhaug' qu" na shi: au:
mae" we' dakhyo: nga" apyad qe dam: ngad shi" qa: we"-
3Ai: au: mae- Mao"So wa khonhae" re: ngo we' daga" na: lo: ra"-
aimung: mug: cad' khug khyo" ngo su" lai: lo" au: ngore mug: bo" byid' ra".
4Ai: ba na: gu: wa ngo na: dai: ra" ba na jham ngad: lo: ra".
Amung: nga" yham re Mao"So: zam" khug: ruyang gug:gam byid' lo: ra".
5Ai: ayo, mae qam: so' bo: thao" ra" Mao"So wa ngo we' daga" na mung:-
nga" avai: ayae mae nga" zo: bam: yang lhang" gam" to" ako".
6Nga" nung: zang jham we' cad' be, jham wa nug' myo: sho' vin" byid' lo: ako".
Amung: nga" nho: zhanlun gae jham wa laug qan" mae yaug lo: ako".
7Vomo" zug: ade, qe jho" qhug' qham: khao: ngo"
yao: bam: phaung gaung: mae ngo bolhaung" bo: lo: au: re-
8Ve, qae" qe wa ngore the' myao we' ayae khyo phao: qui" lo" ako".
Amung: phug' mao: qe wa ngore phug' myao" ru qhu" byid' nae" qhid' mae" to" ye; lo: ako".
9Byumyu" au: jhaung qe wa jho" jhau: na: rure lhaung" thang: pye' ako".
10Akhyag: thao" ra" mo, lhao" re" sae za: tae" byaug: ako".
11Ngore the' myao: ra" yaug khao: ngo"- nga" khyo re the' gyo" ra" yaug khao: ngo"-
Ngo kad' lai: lo va" ru we' sin: yang: gai: ru jham ta" lo: ako".
12Myaung mo, hug' yao gelao" yao: bam re ngo bao" byid: va".
khokhyo maba: ye" lo" ra" cug' zonau" qere ngo lhaung" bao" yu:-
13Lo" thao" sho' khyag' qhui mo, ngore khin" lo: ako".
Amung: cug' mo" qe gug:gam qo" yu sho' ngo bao" thaug' byid' lo va".
14Ngo wa khonhae" re: tarha" din:nyang: ru we' tarha" nyang: ra" khyo" za: kad' lo: va".
15Ngo wa myo,jid mo; qhid mae" myo,
khyid gyug: mo; qhid' mae" khyid ngad: lo: va".
16Ngo wa myaung mo; qhid' mae" yao: pho" we' dakhyo: ngad:-
aimung: qug: khai: qhug' ra" bang" vo qe: shad' khyo bode; lo: ra".
17Ngo wa- nhag' khyag' myid mabo: ra" mo, nho: kheim: so' re phyo' qheim" pye' byid: mung:
yao: bam: lo, leim zo: mo, re khyad' yu: ra".
18Ngo wa kao qhang sho' na nae" we' yham mae myan myan taung" qo" shid nae" qhid' mae"
khonhae" re: nhag' lhaung" nghae" lai: lo:-
19Ngo wa- agyi: mae khonhae" re: qid qo" mung:
akaung mae nghin: yang jhug' jo; ra" sag' gae we' dau: lo:-
20Yaug khao: ngo" wa khonhae" re: ngore lhaung" khin" na: lo: ako".
Amung: nga" qam: o: re: khonhae" malhaung" gan-
21Ngo pha,jhi" byid: lhao" byu qe wa sae za: tae" jo, mung:
ngo ta" rure nyang" za: tae" gyo" lo: ako".
22Ngo bin: ta" to: va" rumae yao: bam dam: laung: nae" pe" made; lo:-
nga" dao: kheim: jham wa mug: qid we' dakhyo: dag: vao lo" ako".
23Yaug khao: ngo" wa- zin vao kheim: mae yo kad' zo: mo, mug: qid re tug: yu: ru we' dakhyo:
ai: dao: kheim: jham re lham: tug: yu: lo: ako".
24Yao: bam yao" gaung re maqo" myid: lam ko" au: re ngo wa yao: bam re qisam: su kad' ra".
Nga" nho: ngaui bau" ra" myo, nho wa yao: bam re qam: byid' lo va".
25Ngo wa qo yu mung: dao: phyid' ra".
Kho:kham dayaug: yang yao" gyetab re jhui" au: she ru we' dakhyo: yao: bam re ngo jhui" au: she: lo: va".
Aimung: yao: bam nhag' lam: thao" na: au: re yao: bam re nhag' tang" byid: va".
Currently Selected:
YOBA 29: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
