YOBA 26
26
Yoba
1-2Masho: majhin phyag' mung: qam: nang" ra"
ngo ru" yaug re nao: yang bao" thaug' ru khoqhi" ngad i?
3Nao wa ngo ru: nhag' magyang" yaug re
aiqhi" gai: ra" pha,jhi" byid' ra" i?
4Ni" dao: kheim: alhab' re khag' gyo: byid: nae" ein: myid: jho: i?
Ceru: ba: jhau nae" qhid' mae" nao re khag' yang jaung" byid' i?
Bildad
5Shid mo; nho: subyo jham wa
myidgaung khug mae" qid mae nin" na: ako".
6Movo: mug: wa Mao"So: qhid' kheim: mae de: de: myao: thug' jo; ra".
airu re yao" qhid' kheim: mae" pe" yang re: pe" ja" go: yang re: maqo" nghoe' to: ngad: ra".
7Mao"So wa mug: am: shad' mae" mug:gaung re phyid: myhung" ke' ra".
Aimung: myidgaung rere: mug: le; phyo: mae lhao" to" ra".
8Jham thaui: jham mae qid ke' pyang" mung:
aijham re la: yang: mabaug: sheim: gyo" lo sho' tam" to: yaug wa Mao"So ngad: ra".
9Yao: wa lho" lang" mo" re jham thaui: khug mae nyham" to" ra".
10Yao: wa panglai: dao mae khao" to" ra" akheim" yang
mug: bo" we' mug: cad' re kho' to" ra".
11Mug:gaung re thaug' to" ra" zang baung: jham re yao: kyaug' nin" ke' lao"
aijham wa gyaug: nin" mung: lab: nan" ako".
12Pang:lai:: re aung: pye' ru wa yao" qam: ngad: ra"
yao" laba lajhao: yang maojaung: Rahab re phyo' qheim" pye' ra".
13Yao" so' she: ru wa mug:gaung re gyang: gyang: za: sho' pye' ra".
Aimung: phao: loe; lo" ra" maojaung: re se' pye' ru wa yao" lo, yang ngad: ra".
14Ngadqere: cegu: wa yao" kheim: so' mae" daqhae: za: angad:-
ngonhaung" the' gyo" ru wa yao" dao: so' so' thoe ru za: angad:-
Mao"So dang dang za: khoqhi" qi" qhang: rure khag' qo" ba nae" i?
Currently Selected:
YOBA 26: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
