YOBA 21
21
Yoba
1-2Ngo ta" na: rure tae" gyo: ge,-
ceru wa naonhaung" mae" ngo mho' nug: ra" nhag' tang" dao: ai: gu: za: ngad: va".
3Ngore dao: jhau nae" akhang" byid: gela,-
aimung: ngo bin jhau lao" naonhaung" nug: khyo jung" gela,-
4Ngo jho" myan" myo" ru wa shid ba: ra" byu qe we' mangad:
ngo nhag' lam: matho' qhang nae" khyo yao: jo; ra".
5Ngo re qu" gela,
naonhaung" qu" gyaug: din mung: zhaug' qu" tae" byaug sho' mung: ru maga" shi: i?
6Ngo mae boe" jo; rure ngo myid: ke' lao"
ngo din: mug' byaug mung: ko, ko, nin" na:-
7Mao"So wa pe"mung: makhyang: mashab mo, re daui: na nhao: mung:-
mao: sho' na yang: na: dai nhao: laug i?
8Yao: bam mae yao: zo: qe we' yao: myid: jham qo" ako".
Aimung: yao: bam alhab' na: qi: sho' myao co' ako".
9Mao"So wa yao: bam: yham mae kyi" khyag' ru maboe" nhao ngad: ra".
Yao: bam wa gyaug din taung" khonhae" re: mana ca" ngad: ako".
10Ngad:- yao: bam: nung: jham alhab' nung: myug cao" mung:-
aqug: akhai: mabo lo: xao" ako".
11Yao: bam: zoshao qe wa yao nau" jham we' dakhyo: tao" qin" mung: sab' keim" ako".
12Aimung: tang:- khalhao: thoe khyo" cao" yang: go" ako".
13Yao: bam wa yaug yo cae tae" ru we' kao so' daui: na mung:
pe" qug: khai: maqhug' lo: yo yo za: shid: ako".
14Makhyang: mashab mo, wa yao: bam re sae za: nha: to: nae" qhid' mae" Mao"So re ta" ako". Yao: bam wa yao: bam: apyad qhid' mae" Mao:So khoru: boe" nhao nug: ga" rure manug: ba ngad: ako".
15Yao: bam wa Mao"So re caung da" byid: maca" ga: myid: ako".
Yao: re akyu" mho' yang: pe" akyu" maqo" ga: re: myid: ako".
16Yao: bam wa yao: bam: qam: so' yang aung doe; ru ngad: ga: ta" ako".
Ngadqere:- yao: bam myid: ra" akhyo: re ngo maqo" khae: yu.
17Makhyang: mashab yaug dayaug: nho: myibaung: lhaung" shid: lo" i?
Yao: bam mae" dayaug yaug wa byo; qeim: lo" ru lhaung" qhug' ra" i?
Mao"So wa makhyang: mashab mo, re nhag' yo: yang: qobo dae lhaung" byid' ra" i?
18Amung: yao: bam re la hug' khug mae khavho mad sin" pye' ru we' dakhyo:- la qam" mae phalhug bodao" lo" ru we' dakhyo: yao: bam re hug' sin" pye' nae" ngad: i?
19Mao"So wa yao: pho" bam: qobo: qhid' mae" yao: zo: bam re qobo dae byid' ga: naonhaung" ta" ako".
Airu: mangad: nae"- qobo byu qere yao: bam yao" qobo: mathao mae Mao"So: yang qobo dae byid: vashao:-
yao: bam yao" qobo: ra" mathao mae yao: airu: kad' rure qhu" byid: vashao:-
20Qobo byu qe wa yao: bam yao" qobo dae re phau: zo: geshao:-
Qam: so' bo: thao" ra" Mao"So nho: nhag' jam: yo" rure yao: bam leim zo: vageshao:-
21Byu dayaug nho: kao so' apyad gan: byaug lao"
yao: zo: qe ngaui bau" na ko" laug ga" rure yao: wa gaigai: yao: myid: gaung yug nae" laug i?
22Myhao: ra" jo, qo jham mae na: ra" mo, re lhao" re:-
dao: kho' ra" yaug Mao"So re- byu: yang qo" mho" nae" i?
23-24Byu damyo" wa yao: bam shid: ra" ba na joe" sho' qao" zin: taung" qo" na: ako".
Yao: bam wa ngaui bau: mung: myan myan yo yo qhug' shid: ako".
Yao: bam: maogaung jham re nyang" za: nyhang" caung: ke' ru qhug' ako".
25Gaje wa ngaui bau" ru dajhid' re: maqo" yu ngad: ako".
Yao: bam wa nhag' lam: mae kyid kyid kho" ru we' kao so' daui: na mung: airu: shid: lo" ako".
26Ngadqere:- alhab' mo, shid: lo" mung: nyhab' pye' ru qhug' ako".
Yao: bam alhab' mo, re laug daung: jham: yang bam" pye' ako".
27Naonhaung" nhag' myid: no: ci: rure ngo ba-
28Naonhaung" wa- qi" qhang: ra" byu-
makhyang: mashab: rure lhaung" kad' zhao: ra" qi" qhang: ra" yaug: nho: yham ana" khai: mae laug i? ga: myid' ako".
29Naonhaung" wa- gyaung: qhang su mo, we' maye: jho" jhau: qu" gela,
Yao: bam yu: lo: ra" lau dao: jham re naonhaung" maba ko" i?
30Mao"So nhag' yo: mung: qobo dae byid' ra" ba mae-
khonhae" re: lhaung" loe, yaug wa makhyang: mashab yaug ngad: ra".
31Makhyang: mashab yaug re qobo zhaug' nae" byu khag' mana-
aimung: yao: kad' lai: lo: ra" mathao mae yao: re lage, phaug' nae" byu re: mana-
32Lab bug mae nyang" za: lhaug' zaung" to" ra"
yao" lab khyo yao: re dao: ye" lo" au: re-
33Mao dai" rumae byu ataung myo: sho' mo, yan" ako".
Myid zhai: lhao" re: yao" maogaung dao mae yo yo za: jo; jo; ra".
34Aimung: naonhaung" lhe"- naonhaung" wa ngore pe" lajheim: mabo: ra" dao: khyo" yang nhag' tang" byid: nae" phin" ako".
Naonhaung" byid' ra" dao: phyid khao: ngo" wa mhug' pyag' dao: za: ngad: ra".
Currently Selected:
YOBA 21: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
