YOBA 13
13
1-2Nao ta" ru ja: khao: ngo" re qhid' phyao: ngo gyo" qu" va".
Aigu: alhab' re ngo ba: gyo" nao ba: qhi" za: wa ngore: ba: ra".
Ngo wa ni" o mae manyham-
3Ngadqere:- ngo wa Mao"So we' jho" ngag: na: ru ngad: nao we' mangad:-
ngo wa nga" si: re yao: we' ajho" ngag nug: ra".
4Nao wa nao maba: rure mhug' ra" dao" yang we' sai" nghoe' pye' ra".
Nao wa khag' rere: no maqo" ya: gai: ra" mocid' zug: qe we' dau: ra".
5Pe" majhau lo: na wa, aire dayaug yaug: yang nao re pha,jhi" bo nhaung ga: myid: jho: li" nae".
6Nga" si: re ta" na: au: tae" gyo" qu" shi: wa,
7Nao pe"mung: mhug' na: i?
Ni" nho: mhug' ta" ra" dao: jham wa Mao"So re akyu" byid: nae" ein: myid: jho: i?
8Nao wa yao: re can: nae" ein: seim" na: i?
Nao wa yao" si: re tarha" yung" mae jho" ta" ngag nae" i?
9Mao"So: yang nao re te' te' mae" qe zhaug' qu" ngad: re yao: wa gai: ru daja: ja: re qhug' myao nae" laug i?
Nao wa byu qere mhug' vhan" ru we' dakhyo: Mao"So re qo" mhug' vhan" nae" ein: myid: jho: i?
10Naonhaung" nho: myo,nho khyin: ru mamyao sho' nyham" to: ngad sho' ngadqere:-
yao: wa nao re qeim: mho" li" nae".
11Aimung:- yao" kheim: so' wa nao re gyaug: din: ru byang" nhao: li" nae".
12Ni" dao: zham" jham wa myimhab we' dakhyo: pe" akyu" mabo ngad: ako".
Nao ngag: ru wa zhogam: we' dakhyo: gyoe; lo" li" nae".
13Sae za: tae" jo, mung: ngore dao: jhau nae" akhang" byid: la,-
aimung: boe" thug' lo nae" rure boe" nhao lang:-
14Ngo wa nga" kao so' re dan: pye' nae" jin" va".
15Ngo wa myid: lao" jo, qo alhab' re ciphyaug' pye' va". Aimung: Mao"So: yang ngore se' pye' ngad: re pe"mung nae" i?
Ngo wa nga" si: re yao: jhao" yeta" kyo: nae".
16Nga" vae" ra" myid: yang lhao" re: ngore qo" khyad' yu maba-
Pe"mung:ga"re- nhag' lam: kaui: ra" byu khag' re: Mao"So jhao" mavae" yeqhug' ngad: ra".
17Ana" nga" nho: ta" sho' kyo" ra" dao: jham re tae" gyo: wa,-
18Ngo wa nga" si: re ta" kyo: nae" jin" jin" ngad: va".
Pe"mung:ga"re ngo wa jo: rumae na: ein: rure ngo ba:-
19Mao"So we"- nao wa ngore qobo zhaug' nae" i?
Nao qobo zhaug' ngad: re- ngo wa sae za: tae" to: mung: shid: lo" nae" jin" jin" ngad: va".
20Ngo shid' ja: mho' li"- ai: gu: re myid vang" byid: la,-
Aire ngo wa nao mae" maphao: vho' qin" nae".
21Ngore qobo dae byid' ru thang: pye' mung: ngore kyaug' tin" ruyang dakhyoe' pye' la,.
22O" Mao"So we"- nao shi" qhid' jhau: qu" wa, ngo phaug' tau: nae".
Mangad: lao" ngo re jhau nhao la, ngo nao re phaug' tau: nae".
23Nga" qobo jham wa pe" pe" ngad: ako" i? Ngo pe" kad' shad' lai: lo va" i?
Ngo re pe" yug: mau" mae qobo zhaug' i?
24Nao pe"mung: ngore jao" pye' i?
Nao wa pe"mung: ngore gyevo dayaug we' dakhyo: kad' i?
25Nao wa ngore kyaug' nae" seim" na: i? Ngo wa sag' fo' dafo' za: angad:-
Nao wa khavho kyaug' dakhyang re za: khe' zin" na: ra".
26Nao wa- ngo ngai shi" au: kad' ru qhid' mae" lhao" re:
ngore kyid kyid kho: sho' qobo zhaug' ra".
27Nao wa nga" khyid mae jao co: vhe' to" ra"
nao wa ngo ce" lo" ra" khyid bye khao: ngo" re lhaug' qu" na: ra".
Aimung: nga" khyid khu jham re lhao" re: ca: qu" ra".
28Ai: mathao khyo" yang- ngo wa sag' qeim: we' dakhyo:
bab: lo" mung: nhug: yang zo" mhan" pye' ra" adao: bau: ru: man" lo" ra".
Currently Selected:
YOBA 13: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
