TARHA" AGYI 21
21
Benyamin Amyu" Kaung Qe: Qhid' Mae" Yham Sang Myhi" Jham
1Israel byu qe Mizpa jo, qo mae daga" zang" ham: na ko" au:- ngonhaung" mae"khag' re: ngonhaung" nho: myiqe: zo: qere Benyamin byu qe we' lo, xo' maxo' nhao nae"- ga: yao: bam Asang re jhaug' zaug za: dao:so: byid' ako". 2Airumung: ana" Israel byu qe wa Bethela khyo ye: mung: ai tau Mao"So: qhid' kheim: mae myi" thao joe" sho' yezaung: jo; ako". 3Israel nho: Asang Mao"So we"- ceru pe"mung: boe" laug i? Israel byu mae" Benyamin amyu" kaung pe"mung: byaug: lo" nae" seim" laug i? ga: thoe qi: we' alokho: yang: kaug' ngug: ako". 4Mo,byu qe wa thao: ba ne, seim no' mae to" mung:- ai tau mae phan dalam: kad' ako". Yao: bam wa zam" khug: ra" ngaui" xeim: we'- xeim: daqhae: re dau: geim" phad' ngaui" byid' ako". 5Mizpa jo, qo Asang: qhid' kheim: mae ye zang" ham: phaung: rumae mabo: bo ko" ra" Israel byumyu" kaung alhab' mae" daphung: phung: na ko" i? ga: yao: bam myid' ako". (Yao: bam wa Mizpa khyo maye" ra" yaug khag' ngadqere: se' pye' ru qhug' ca"- ga: jhaug' zaug za: jham tang" to" ako".) 6Israel byu qe wa yao: bam: mao:nhaung: Benyamin qe: mathao mae nhag' myid: kaug' mung:- ana" ba Israel wa yao" amyu" kaung dakaung ci phyaug' pye' ava". 7Benyamin kaung mae" dang: na: jo; ra" yauggai qe: qhid' mae" yham sang myhi" qere ngonhaung" khoru: qho byid: lo nae" i? Ngonhaung" wa yao: bam re ngonhaung" myiqe: zo: dayaug re: mabyid: zho: nae" qhid' mae" Asang re ngonhaung" jhaug' zaug za: dao:so: byid' to: va"- ga: ta"ako".
8Yao: bam wa- Mizpa jo, qo khyo maye: boham: phaung: ra" Israel amyu" kaung mae" daphung: phung: na ko" i? ga:- myid gelao"- Gilead mae" Yabe vobyu qe dayaug re: mabo: bo rure yao: bam ba: yu: ako". 9Gyezo: qere mang we' khai: ke' ra" au: Yabe mae" dayaug re: matau: ko" ngad: ra". 10Airumung: mo,ham phaung wa lhe" thao" ra" gyezo: datug: shid' taung re Yabe vogaung: khyo ye: yang: myiqe: zoshao alhab' bobo mung: yaug khao: ngo" re yese' pye' ge,. 11Yauggai alhab' re yese' ge,- zomyi: gyang" mangad ra" myiqe: yaug: khao: ngo" rere: yese' pye' ge,- ga" ra" amyin" dao: we' daga" nhao: ke' ako". 12Yao: bam wa Yabe vobyu qe: phaung mae zomyi: gyang" byid yo zo: ye qhug' ako". Airumung: yao: bam wa Khanan mung" mae" Shilo vogaung: khyo ai bam re jhui" lo gemung: jamu lokad' na: ako".
13Ai: thao mo, ham phaung geim" khyo" Rimmon laug byo, khaung: mae na: jo, ko" ra" Benyamin byu qere mang: dae ye tae" nae" qhid' mae" byu nhao: ke' ako". 14Benyamin byu qe dam: tug' lo gemung: gaje Israel byu qe wa yao: bam mase' pye' lo: jhui" lo ko" ra" Yabe mae" myiqe: nau" qere yao: bam re byid' ako". Ngadqere: malaug ngad: ako".
15Mo,byu qe wa Israel byumyu" kaung qenho: dadang:: dalam: ngad: rure Asang: yang phyo' pye' va" ruyang Benyamin kaung qe: qhid' mae" nhag' myid: kaug' ako". 16Airumung: zang" ham: na: mo, nho: au: jhaung qe wa- Benyamin amyu" kaung mae myiqe: mana lo:ngad: ra". Dang: na ko" ra" yauggai qe: qhid' mae" ngonhaung" khoru: yham sang myhi" qho byid: nae" i? 17Israel wa yao" amyu" kaung daxe: shid' kaung mae" dakaung magai: ci phyaug' ngad: ra". Ngonhaung" wa Benyamin amyu" kaung qhid' mae" na: dang: jo; nae" khyo qho ca" ra". 18Ngadqere: ngonhaung" nho: myiqe: zo: qere yao: bam we' lo, xo' nae" akhang" magai: byid: ngad: ra". Pe"mung:ga"re ngonhaung" nho: myiqe: zo: mae" dayaug re Benyamin byu re lo, xo' yu nhao: ra" yaug khag' rere: ngonhaung" nhang: kheim: ke' to: va" ruyang: ngad: ra"- ga: ta" ako".
19Ai: thao yao: bam wa- Shilo mae kad' ra" zin khao: ngo" kad' ra" Asang: poe wa jhao" li" na: rure myid: beim" ako" (Shilo wa Bethela nho: mug: am: shad'- Lebona nho: mug: thao shad' Bethela we' Shekhem agyo: mae" khyo dang nho: ba thug' shad' mae ngad: ra".) 20Yao: bam wa Benyamin byu qere- sabyi khyae khaung: mae yevho' jo, yang: lhaug' na qu" ge,. 21Poe gyo: mae qo" nae" ga: Shilo mae" myiqe: nau" qe thug' li" gelao"- naonhaung" wa ai: sabyi khyae jham mae" thug' ye: ge,. Naonhaung" mae" yaug nge, wa ai: myiqe: nau" qe mae" maqad maqui" yham sang myhi" dayaug re ye she: yu ge,- nao we' daga" yao: re Benyamin mug: khyo jhui" phao: lo" ge,. 22Yao: bam: yao: pho"- mangad: lao" yao: mao: yao: nhaung: bam naonhaung" jhao" li" mung: naonhaung" re yug: li" zhaug' gelao"- Jeju khyo" yao: bam re ngonhaung" re ngho" nhao gela,- pe"mung:ga"re ngonhaung" yham sang myhi" kad' nae" qhid' mae" gyekhe' poe mae naonhaung" lo, mae" ngonhaung" yu: ru mangad:- naonhaung" yang ai bam re ngonhaung" re byid: zho" ru mangad: amung: naonhaung" dao:so: re phyo' pye' ra" khyo" yang naonhaung" qobo maqo" ngad: ako" ein: naonhaung" gai: ta" ako"- ga: ta" ako".
23Benyamin byu qe wa ceru: kad' ako". Yao: bam mae" yaug nge, wa Shilo mae go" na ko" ra" myiqe: nau" qe mae" yham sang myhi" dayaug yaug khyin: yu yang: jhui" lo" byaug: ako". Yao: bam: mug: myid khyo joe" lo" gelao" yao: bam: vogaung: jham re dam: te: yang: aimae na: ako". 24Ai: yo, mae yao: dang: ra" Israel byu qere: aimae" to" mung: yaug khao: ngo" yao: yao" amyu" kaung- yao: yao" yham- yao: yao" mug: myid khyo phao: lo" ako".
25Ai: pyad mae Israel byumyu" mae kho:kham mana ngad: ra". Yaug khao: ngo" yao: yao: o: ngaui: ra" khyo" kad' yang: na: ako".
Currently Selected:
TARHA" AGYI 21: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009