TARHA" AGYI 14
14
Samson We' Timna Mae" Myiqe: Nau"
1Daba re Samson wa Timna vogaung: khyo gyo" ye: mung: yao: wa aimae Philisti myiqe: dayaug re ye myao: ra". 2Yao: wa yham khyo phao: lo mung: yao: pho" we' yao: myhi" tao re- Timna mae ngo qu" ngaui: ra" Philisti myiqe: dayaug na: ra". Yao: re nga" qhid' mae" yu byid: gela,- ngo yao: re lo,xo' yu nug: ra"- ga: ta" ra".
3Ngadqere: yao: pho" we' yao: myhi" tao wa yao: re- nao pe"mung: Mao"So re malam: ra" Philisti qekhyo ye: yang: yham sang myhi" yeqho ca" i? Ngonhaung" amyu" phaung- ngonhaung" yao" amyu" kaung mae myiqe: nau" dayaug re maqo" qho i? ga: myid' ako".
Ngadqere: Samson wa yao: pho" re- nga" qhid' mae"- nao ngore yu byid: nhao nug: ra" myiqe: nau" wa ceyaug yao: ngad va". Ngo yao: re o:- ga: ta" ra".
4Yao: pho" yao: myhi" tao wa Samson re Asang wa Samson re ceru kad' nhao: na: ga" rure maba ko" ngad: ra". Pe"mung:ga"re Asang wa Philisti qere gyekhe' nae" qhid' mae" agu qho: na: ra". Ai: ayo, mae Philisti qe wa Israel re eib: na: ako".
5Airumung: Samson wa yao: pho" yao: myhi" tao we' daga" Timna khyo gyo" ye" ako". Sabyi khyae dalam: khyo" su" lai: ye" lo" ko" au:- yao: wa khang khyi dadau: kyid' thoe re the' gyo" ra". 6Asang: qam: so' wa nyag din taung" Samson re qam: bo byid: mung: yao: wa ai: khang khyi re cad' be, nau" dadau: re we' dakhyo: yao" lo, cin: yang adau dau lao" kho' cad' pye' ra". Ngadqere: yao: pe" kad' ra" khyo re yao: pho" yao: myhi" tao re mata" kyo: ngad: ra".
7Ai: thao yao: wa ai myiqe: nau" jhao" ye: mung: yao: re o ngaui: ra" khyo yeta" ra". 8Dayo, kyo thao Samson wa yao: re lo, yexo' yu nae" qhid' mae" tug' ye" lo" ra". Gyaung: khyo mae yao: wa yao: se' to: co' ra" khang khyi re yequ" nae" qhid' mae" khyodang mae" ko' vao ye" ra". Ai: shid mao khug mae byo: da am am mung: byoyhid dajhid' bo: jo; rure yao: ye myao yang: mug' ra". 9Yao: wa yao" lo, mae byoyhid re le; yu mung: su" lo" zo" zo" ra". Yao: myhi" we' yao: pho" tao jhao" lo mung: yao: shid' tao re daqae: byid' ra". Ngadqere: Samson wa yao: ai: khang khyi mao gaung mae" byoyhid le; yu: ra" khyo yao: bam re mata" kyo: ngad: ra".
10Yao: pho" wa ai: myiqe: nau" nho: yham khyo ye: mung: Samson wa aimae zo: shaug' poe dalam:da" byid' ra". Ceru wa zolau: qe: phaung mae kad' ra" thung" li dalam: ngad: ra". 11Philisti byu qe yao: re myao gelao"- yao: bam wa yao: we' na nae" qhid' mae" zolau: sam xe yaug re nhao: ke' ako". 12-13Samson wa yao: bam re- naonhaung" re vai: sham" dalam: ta" geli"- ai: lajheim: re lo,xo' poe nhad' ba magan shire ngore naonhaung" maqo" ta" gere wa- naonhaung" yaug khao: ngo" we' jid: mo" pin: gai dalung: we' mai bau: dazam" zam" ngo tang: nae"- ga: ta" ra". Yao: bam wa ni" vai: sham ngonhaung" re ta" kyo: la,- aire ngonhaung" gyo" yu nae"- ga: ta" ako". 14Yao: wa- zo: yaug mae" zo: ja: thug' li" ra". Qam: bo: rumae"- cug: ru thug' li" ra"- ga: ta" ra". Sam ba thao re yao: bam ai: vai: sham" lajheim: re maqo" ta" thug' shiko" ngad: ra".
15Byid ba ein: ba mae yao: bam wa Samson nho: yham sang myhi" re- ai: vai: sham" ngonhaung" re ta" kyo: sho' ni" yham sang pho" re nyan: wa,- nao airu: makad' re ngonhaung" wa ni" pho" yham re nao we' daga" ngha" khyo" nae"- ga: ta" ako". Ni" shid' tao wa ngonhaung" re damya, mya zo: nae" qhid' mae" khai ko" ru ngad: i? ga: ta" ako".
16Airumung: Samson nho: yham sang myhi" wa yao: jhao" ye: yang: ngug byid ngug nhe' we'- nao wa ngore majhid'de, ngad: ra". Nao ngore nghang" ra"- nao wa nga" byin cao: qere vai: sham" ta" mung: ai: lajheim: nao ngore mata" kyo: ngad: ra"- ga: ta" ra". Ailao" yao: wa- qu" wa, aikhyo re nga" pho" we' nga" myhi" tao re lhao" re: ngo mata" kyo:- pe"mung: nao re ngo ta" kyo: nae" i? ga: ta" ra". 17Yao: wa ai: khyo we' sin: yang: poe nhad' ba lam: lam: gyi: ngug: ra". Ngadqere: nhad' ba ein: ba mae ai: khyo we' sin: yang: yao: taung" boe; na: ruyang Samson wa vai: sham" lajheim: yao: re ta" kyo: byid' ra". Ai: thao yao: wa Philisti byu qere ta" kyo" ra". 18Airumung: nhad' ba ein: ba mae Samson yab qo mavao shire- ai: vogaung: mae" zolau: qe wa-
Byo yhid tho' pe" je: cug: i?
Khang khyi tho' pe" je: qam: bo: i? ga: ta" ako".
Samson wa-
naonhaung" nga" nung: jaung myhi" yang maphaug' gere wa dao: phyid re ana" naonhaung" maqo" genae"- ga: phaug' tau" ra".
19 Asang: qam: so' wa nyag din taung" qam: ke' byid: mung: yao: wa Ashkelon khyo gyo" ye: yang: ai: mae byu sam xe yaug re yese' mung: yao: bam mae" mai bau: khyad' yu: ra". Amung: ai bam: mai gai bau: gai re yao" vai: sham" dao: re qo" pheim mo, re byid' ra". Ai: thao yao: wa yham khyo phao: lo: ra". Airu: boe" ra" khyo re nhag' jam: yo" ra". 20Yao" nho: yham sang myhi" re wa lo,xo' poe mae yao" byin cao: gyang" kad' yaug re byid: zho" pye' ako".
Currently Selected:
TARHA" AGYI 14: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
