HABAKUG 3
3
Habakug Nho: Akyu" Mho' Dao:
1Ceru wa lapa Habakug nho: akyu" mho' dao: ngad: ra".
2O" Asang we"- ngo wa nao pe" kad' va" rure the' gyo: va".
Aimung: ngo wa gyai gyaug: mug' pye' va".
Nao lhaung" kad' lo va" lo, mau" jham re ana" ngonhaung" qae: mae dalhang dam: kad' qhu" la,-
nao nhag' yo" ra" au: lhao" re: nhag' khyag' yu la,.
3Mao"So wa Edom mae" dam: li" nae". Gyang" lho" ra" Mao"So wa Paran bug gaung jham mae" li" naeva". Yao" phungbao wa mug:gaung re nghoe' pye' mung: myidgaung wa yao: re caung:khin" ru we' byang" jo; ra".
4Yao: wa lhe' cad' bo" bao khyo" joe" li" mung: yao" nho: lo, mae" bao qhui: ru thug' li" ra".
Aimae yao" nho: kheim: so' nyham" ci: ra".
5Yao: wa no phyo: re yao" nho: qhid' khyo nhao: ke' mung: shid gyan nogyan re yao" thao mae cao" nhao: ra".
6Yao: thang lao"- myidgaung nan" mung: yao: tau: qu" ke' lao"- byumyu" qe gyaug: nin" ako".
Apyad ato mae" bam jham wa go; man" sin" lo" mung:
ganhae" gaco' ayo, mae" yao: su" lai: lo: ra" mathao" magan: ra" bug gaung jham wa nab: vao lo" ako".
7Ethiopia byumyu" qe gyaug: na: rure ngo the' myao va".
Aimung: Midian byumyu" qe ko, ko, nin" na: rure the' myao va".
8 Asang we"- nao re nhag' yo: nhao: ru wa qid gyaung: jham ngad: ra" i?
Nao re nhag' jam: yo: nhao ru wa panglai: ngad: ra" i?
Nao wa jham thaui: dao mae zaung mung: la qam" bo: ra" jham thaui: wa-
ni" byumyu" qere nao: yang: aung doe, nhao: ra" ni" nho: gye myao: lhin" jham ngad: ako".
9Nao wa ni" lo, la: re bag nae" seim" ci mung: ni" nho: myo: jham re bag: ke' nae" za: ngad va".
Ni" nho: lhe' cad' wa myidgaung re go; gyae" lo" nhao: ra".
10Bam jham wa nao re myao lao"- gyaug: nin" ako".
Mug:gaung mae" qid sheim" khyo" ke' ra"-
myidgaung khug mae" qid jham myang mung: yao: bam: bang: lhung" jham wa myhao: do; li" ako".
11Ni" nho: phyad: ra" myo: jham bo" bao bag: ke' re
ni" nho: lhae tad' qhi qhi mung: bao mung: ba we' lho" wa thang: jo; ako".
12Nao wa nhag' yo" ru we' myidgaung: dao mae su" lo" mung:
nao nhag' jam: yo" ruyang byumyu" qere zab: nhae" pye' ra".
13Nao wa ni" byumyu" qere khyad' yu nae" qhid' mae" we' nao: yang khyin: to" ra" kho:kham re khyad' yu nae" qhid' mae" thug' ye" lo" ra".
Nao wa makhyang: mashab mo; au: jhaung re be; lhang" pye' mung: yao" thao cao" mo, re bin sho' phyo' qheim" pye' ra".
14Ni" nho: myo: jham wa naonhaung" re khe' sin" pye' nae" ga: la qam" re" ru joe" li" ra" au:
yao" nho: gyetab mae" zug: mo" re bag: kyao" pye' ra".
Yao: wa myaung mo, re sae za: zug: yang: zag zo: mo, we' dakhyo: qu" so' ha" na yaug ngad: ra".
15Nao wa panglai: re ni" nho: myao: jham: yang zab: nhe" pye' ra". Aimung: qam: so' qi" ra" qid jham wa nyab dui" thug' ako".
16Ngo wa cejham alhab' re the' gyo: mung: gyaug yang: nin" na: ra"- nga" nho: nhad' qid jham wa gyaug yang: nin" byaug va".
Nga" gaung khyao maqo" lab lo: nga" nho: khyid jham re: khyid au: thaung" na va".
Ngonhaung" re khe' zin: mo, re Mao"So: yang qobo dae byid: nae" ayo, re ngo wa sae za: mazug lo: lao" na nae".
17Pho' ham" gae jham ashi: mazaui: mung: sabyi naui mae sabyi shi: made;-
zhanlun gae wa abu" mabu" mung: yothaung: mae gaug zo mathug' qere:-
yao jham alhab' shid: dam: mung: nung: kyaung" wa akeim boe" byaug sho' ngadqere:-
18 Asang Mao"So wa ngore khyad' yu yaug Asang ngad: ruyang ngo wa ngaui bau: ngaui lho" taung" na: jo, shinae".
19Qam: so' bo: ra" Asang wa ngore qam: byid' ra"-
yao: wa ngore shocid khyid we' dakhyo: khu xam ngore tang nhao mung: bam jham: dao mae gug:gam taung" na: jo, nhao: ra".
Currently Selected:
HABAKUG 3: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009