APAN AQAO: 40
40
Thaung: Byu Qe: Yab,Mo, Jham Re Yoseb Lajheim: Pheim Byid' Ra" Khyo
1Ai: thao Egutu kho:kham pho" nho: sabyi qang: jaung da" byid: yaug we' yao" mug kad' au: jhaung wa kho:kham pho" re geim lau: ako". 2Kho:kham pho" wa ai: zug: shid' yaug re nhag' yo: mung: kho:kham kho" zaung" ra" Gye zug: pho" nho: yham ngad: ra". 3Yoseb re lhaung" to" ra" thaung: khug mae yao: ai shid' yaug rere: lhaung" ke' ra". 4Yao: bam wa thaung: khug mae myao" sho' laung" jo; ako". Zug: pho" wa Yoseb re yao: bam: daui daui yaug khyo" san: yu: ra".
5Damyi mae sabyi qang: jaung da" yaug we' mug kad' yaug wa thaung: khug mae yab mo, dayaug daja: mo; ako". Yab mo, re: lajheim: gatau tau jho" shai" ako". 6Ne, kao yao: bam jhao" Yoseb joe" vao ye" re yao: shid' zo: myid myo" na ko" rure Yoseb myao: ra". 7Yao: wa yao: shid' zo: re- ana" ba ni" shid' yaug pe"mung: gyai myid myo: nhohab ngad ko" i? ga: myid' ra".
8Yao: shid' zo: wa- nga" shid' yaug yab mo, dayaug daja: mo; to"- ai: yab mo, lajheim: re pheim: kyo: byid: nae" byu cetau mae dayaug re: mana ga: tau" ako".
Yoseb wa yab mo, jham re pheim: ta" kyo: nae" qam: o: byid: yaug wa Mao"So ngad: ra". Ni" shid' zo" nho: yab mo, ngore ta" kyo: gela,- ga: ta" ra".
9Airulao" sabyi jaung da" yaug wa- Nga" yab mo, mae nga" qhid' kheim: mae ako' sam lam: de; ra" sabyi naui danaui re ngo myao:. 10Ako' jham tad' thug' li" ge we'- abu" jham bu" thug' li" gemung: sabyi shi: amhang" zaui" li" ako". 11Ngo kho:kham pho" nho: keim re zaui" ci mung:- ai: sabyi shi: jham re yu: yu yang: keim khug khyo myhag' jhab' zaui: ke' mung: kho:kham pho" re byid: jhaug' ke' rure yab mo, myao:- ga: ta" kyo" ra".
12Yoseb ta" ru wa ai wa ce: lajheim: ngad: ra". Ako' sam ko' wa sam ba ngad: ra". 13Sam ba re kho:kham pho" wa nao re qobo khyad' byid: mung: Pheim: ke' li" nae". Aimung: ni" jo, qo mae nao re mau" dam: byid' li" nae". Nao wa qhid' phyao: yao" sabyi qang: jaung da" byid: yaug lhaung" kad' ru we' dakhyo: nao wa yao: re sabyi qang: keim dam: saboe" byid' li" nae". 14Ngadqere: ni" qhid' mae" acao jab na: gai lao" jeju khyo" ngore myid: beim: la,- jeju khyo" kho:kham pho" re nyang" za: bao" ta" kyo: byid: mung: nhag' khyag' byid: la,- ce: thaung: mae" thug' sho' bao" thaug' byid: la,- 15Ai: tho' mago" ngo wa Hebre mung" mae" taung" aung: zo" ke' qhug' yaug ngad: ru we' ce: Egutu mung" mae ngo thaung: gyo" man" ra" lo, mau" daja: lhao" re: makad'- ga: ta" ra".
16Mug kad' au: jhaung pho" wa sabyi qang: jaung da" byid: yaug: nho: yab mo, lajheim: pheim: ra" khyo wa- gyo" ngaui taung" ngad; rure myao lao"- yao: wa Yoseb re ngore: yab mo, daja: mo; to"- Yab mo, mae ngo wa- nga" au: dao mae mug gyan sam lam: kai" ci:. 17Tho' mae" gyan mae kho:kham pho" qhid' mae" kad' to" ra" mug acao jab bo: ra". Ai mug jham re ngho' jham li" zo" pye' ako"- ga: ta" kyo" ra".
18Ailao" Yoseb wa- lajheim: wa ceru: ngad: ra". Gyan sam lam: wa sam ba ngad: ra". 19Sam ba re kho:kham pho" wa nao re pheim: ke' li" nae"- amung: ni" au: re: phyid' pye' byid' li" nae". Ai: thao re ni" mao gaung re daung" zang dao mae lhao" to" li" nae". Amung: ngho' jham wa ni" sho: re zo" li" genae"- ga: ta" ra".
20Sam ba thao re kho:kham pho" wa yao" khau ba na mae yao" zug: alhab' mo; qhid' mae" zo: shaug' poe dalam: da" byid' ra". Yao: wa yao" sabyi qang: jaung da" byid: yaug re we' mug kad' au: jhaung pho" re pheim: ke' mung: yao: shid' zo: re yao" zug: qe: qhid' kheim: khyo jhui" lo nhao: ra". 21Kho:kham pho" wa sabyi qang: jaung da" byid: yaug re qhid' phyao: mae" yao" aya: jo, qo re dam: byid' ra". 22Ngadqere: mug kad' au: jhaung pho" re wa se' pye' ra". Yoseb ta" to" ru we' dakhyo: alhab' boe" ra". 23Ngadqere: sabyi qang: jaung da" byid: yaug wa Yoseb re khonhae" re: mabeim: lo:ngad: ra". Yao: wa Yoseb khyo re to" myhid' pye' ra".
Currently Selected:
APAN AQAO: 40: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009