APAN AQAO: 38
38
Yuda We' Tama
1Ai: ayo, mae Yuda wa yao: mao: yao:nhaung: qere to: co' mung: Adulam vogaung: mae" Hira ga: mang yaug jhao" yecao: na: ra". 2Ai: mae Yuda wa Shua ga: mang: ra" yaug: myiqe: zo: Khanan myiqe: nau" dayaug we' ye jho" qhug' ako". Yuda wa yao: re lo, xo' xo' yu: ra". 3Yao: wa Yuda qhid' mae" yauggai zo: dayaug khau byid: mung: Era ga: mhang" byid' ako". 4Yao: wa gaung dam: la" li" mung: yauggai zo: gatau dayaug dam: khau byid' ra"- yao: re Onan ga: mhang" ako". 5Yao: wa yauggai zo: dam: khau mung: yao: re Shela ga: mhang" ako". Ai: yauggai zo: re khau: ra" au:- Yuda wa Agzib mae na: ra".
6Yuda wa yao" zoqhid' Era qhid' mae" Tama ga: mang: ra" myi: dayaug yu byid' ra". 7Era nho: lo, mau" wa makhyang" ru ngad mung: ai wa Asang re nhag' yo: nhao mung: Asang wa yao: re se' pye' ra". 8Ai: thao re Yuda wa Era nho: yao: nhaung: Onan re ni" mao" nho: cug' mo" we' yeyab wa,- ni" mao" nho: nyaug qo" xo' nae" qhid' mae" yao" yham sang pho" nho: yao: nhaung: dayaug khyo" yao" qhid' mae" ni" qo re vin wa,- ga: ta" ra". 9Ngadqere: zo: dau qere yao: masang nae" rure ba mung: yao: mao" nho: nyaug makhau shao: ga:- yao: mao" nho: cug' mo" we' gaung sho: jho" zam" au:- yao: wa ashug' qang: re myid gaung khyo phoe' she: vhe' khyo" pye' ra". 10Asang wa yao: kad' ra" lo, mau" re ma-o ngaui mung: Asang wa yao: re se' pye' ra". 11Airumung: Yuda wa yao: dau mo" Tama re ni" pho" yham khyo tug' lo" mung: nga" zo: Shela qi: sho' cug' mo" lo" mo" na wa,- ga: ta" ra". Yao: ceru: ta" ru wa yao: mao: tao we' dakhyo: Shela se' pye' qhug' li" nae" rure gyaug yang: ngad: ra". Airumung: Tama wa yao: pho" yham khyo tug' phao: lo" ra".
12Ai: thao mamyao" re Yuda nho: yham sang myhi" shid: lo" ra". Yuda wa kaug' ngug: ra" ayo, re bin: na: kan" pye' lao"- yao" yao jham amug' qaug: na ko" ra" Timna vogaung: khyo yao" ba nam pho" Adulam byu Hira we' ye" ra". 13Byu dayaug: yang Timna vogaung: khyo yao mug' qaug nae" qhid' mae" yao: vao ye" lo" ra" khyo re Tama re ta" kyo" ra". 14Airumung: yao: wa yao: ve; ci: ra" cug' mo" mai bau: jham re tha" pye' mung:- myo, khung: nghoe' pye' yang: Timna khyo ye" ra" khyodang mae" Enaim vogaung: kham: nhae mae yezaung: jo; ra". Yuda nho: zo:thao" Shela wa ana" qi: va" ru ngadqere: yao: we' lo, xo' maxo' byid' rure yao: ba: ra".
15Yuda wa Tama re myao lao"- yao" myo, khung: nghoe' ci: ruyang shava myhi" ngad: ga: yao: myid: jho: ra". 16Yuda wa khyoyae khyo yao: jhao" ye: mung:- nao khonho" mho' nae" i? ga: myid' ra". (Ai: myiqe: wa yao" dau mo" ngad: rure Yuda maba ngad: ra".)
Tama wa- nao ngore pe" byid: nae" i?- ga: myid' ra".
17Yuda wa ngo nao re cad' be, nau" dadau: byid' ke' nae"- ga: tau" ra".
Tama wa- gai va" nao ngojhao" cad' be, nau" byid: yo, joe" sho' dao:so: khyo" nao ngore daja: ja: byid' to: nae" i?- ga: ta" ra".
18Yuda wa- cedao: so: khyo" nao re ngo pe" byid: zai i? ga: myid' ra".
Tama wa ni" nho: dazid we' taui: nao ci: ra" zaung: bao" byid' to: la,- ga: tau" ra". Yuda wa aijham re Tama re byid' pye' ra". Ai: thao yao: shid' vao dau gaung sho: jho" zam" mung: yao: wa gaung la" li" ra". 19Tama wa yham khyo phao: lo" mung: myo, khung: nghoe' khyad' pye' yang: yao" cug' mo" mai bau: dam: gaug: ve; ra".
20Yuda wa yao" ba nam pho" Hira re cad' be, nau" ciye: nhao mung: ai: myiqe" lo, mae" yao: tang" to: co' ra" zai jham re yu nhao: ke' ra". Ngadqere: Hira wa ai: myiqe: re maye: qhug' ngad: ra". 21Hira wa Enaim mae" byu damyo" re- ce: khyoyae mae na: ra" shava myhi" khai mae ngad: ra" i? ga: myid' ra".
Yao: bam wa- cetau mae shava myhi" khonhae" re: mana: qu"- ga: phaug' tau" ako".
22Yao: wa Yuda jhao" dam: tug' lo mung:- ngo wa ai: myiqe: re mamyao ai: jo, qo mae shava myhi" khonhae" re: mana: qu"- ga: aitau mae" byu qe ta" ako"- ga: lota" ra".
23Yuda wa- ai: zai re zam" ci: to: vashao:- byu jham nga" shid' yaug re qi: jung" pye' rure nga" shid' yaug manug yang: ngad: ra". Ngo wa yao: re aphug' byid: nae" seim" va"-
Ngadqere: nao wa yao: re maqho: myao ngad: ra"- ga: ta" ra".
24Lho" mo" sam khye' kyo thao re byu dayaug wa Yuda re- ni" dau mo" Tama wa shava myhi" ru: kad' lhau mung: yao: wa ana" gaung la" ava"- ga: ta" kyo" ra".
Ailao" Yuda wa yao: re jhui" thug' lo" mung: yengha" se' pye' ge,- ga: amyin" khyo" ke' ra".
25Yao: re jhui" thug' lo" na: au:- yao: wa yao: vao re ngo gaung la" ru wa ce: zai sang yaug we' zam" na yang: ngad:- aijham re qu" mung: ce: dazid we' khyang taui:- ce: zaung: bao" khag' nho: ngad: rure qu" wa,- ga: ta" nhao: ke' ra".
26Yuda wa aijham re qu" xam: mung:- yao: wa ngo tho' je: jo: ra" khyo" ngad: ra"- ngo wa yao: re kad' byid: ca" ra" qo re lhaui" pye' va". Ngo wa yao: re nga" zo: Shela we' lo,xo' byid: ang: ru ngad:- ga: ta" ra". Amung: Yuda wa yao: we' khonhae" re: gaung sho: madam: zam" lo:ngad: ra".
27Tama wa zo:khau yo, nge, lao" zozam khau nae" ngad: rure ba: ra". 28Yao: zo:khau no no: na: au: yao: tao mae" dayaug wa lo,jhoe" thug' ke' ra". Zokhau byid' ra" yaug wa ai re zaui" yu mung: khyang ne taui" te' byid: mung: ceyaug wa zoqhid' ngad: ra"- ga: ta" ra". 29Ngadqere: ai: zonau" wa yao" lo, re dam: she: vhao" yu mung:- yao: nhaung: yaug shi" sao qhid' khau: li" ra". Ai: thao- zo:khau byid: yaug wa- ni" khyo re nao ceru: phung" yu nhaung- ga: ta" ra". Amung: yao: re Pere ga: mhang" byid' ra". 30Ai: thao yao: mao: wa yao" lo, mae khyang ne taui: de, zang khau: li" ra". Yao: re Zera ga: mhang" ako".
Currently Selected:
APAN AQAO: 38: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009