APAN AQAO: 26
26
Isag Gerara Mae Na: Jo; Ra" Khyo
1Abraham nho: pyad gyo: mae boe" ra" bao" khug' za: mangad: ai: mung" mae bao" khug' gatau dalhang dam: khug' lo: ra". Ailao" Isag wa Gerara mae" Philisti kho:kham Abimeleg jhao" ye" ra". 2Asang wa yao" gaung re Isag re na: qhu" mung:- Egutu mung" khyo daye: wa,- ce: mung" mae" ngo nao re na nae" ta" ra" jo, qo mae na: jo, wa,- 3Cetau mae na wa, amung: ngo wa nao we' daga" na yang: nao re shaman" byid: nae". Ngo wa ce: mug: myid alhab' re- nao re we' ni" myid:zo: qere byid: nae". Ngo wa ni" pho" Abraham re byid' to" ra" dao:so: re jhaug' zaug nae". 4Mug:gaung mae" kyi jham nho" myo" ra" myid:zo: qere ngo nao re byid: nae". Amung: ce: mug: myid alhab' ngo yao: bam re byid: nae". Byumyu" alhab' wa ni" myid:zo: qere ngoyang shaman" byid: va" ru we' dakhyo:- yao: bam re shaman" byid: nae" qhid' mae" ngore mho' li" genae". 5Abraham wa nga" nho: dao: re phug' cao" mung: nga" tarha" re we' nga" amyin" dao: jham re phug' cao" byid' ruyang ngo nao re shaman" byid: nae"- ga: ta" ra".
6Airumung: Isag wa Gerara mae na: ra". 7Ai mug: mae" yauggai qe yao" yham sang myhi" khyo we' sin: yang: myid: gelao"- Isag wa yao: wa nga" nhae: mo" ngad:- ga: ta" ra". Isag wa Rebekha re yao" yham sang myhi" ngad: ga: malhang: yu ngad: ra". Pe"mung:ga"re gyai yaung" ra" Rebekha re qo" sang: yu nae" qhid' mae" ai: mung" mae na: ra" yauggai qeyang yao: re se' li" genae" rure gyaug yang: ngad: ra". 8Ai mug: mae Isag dayo, zo: na thao re kho:kham Abimeleg wa yao" bao: zo: kham: khyo" qu" ke' re Isag we' Rebekha tao jho" ngaui: na: rure myao: ra". 9Ailao" Abimeleg wa Isag jhao" byu nhao ke' yang: yao: wa ni" yham sang myhi" angad: ra". Ni" nhae: mo" ngad: ein: nao pe"mung: ta" i? ga: ta" ra".
Ailao" Isag wa yao: re nga" yham sang myhi" ngad: ein: ngo ta" re- ngo wa se' pye' ru qhug' li" nae" ein: myid: jho yang: ngad:- ga: phaug' tau" ra".
10Abimeleg wa ngonhaung" re nao pe" kad' va" i?.Nga" byu qe mae" dayaug yaug wa ni" yham sang myhi" we' laui laui za: gai: jho" yab: ra". Amung: nao wa ngonhaung" re qobo kad' nhao: ra"- ga: ta" ra". 11Ailao" Abimeleg wa yao" byu alhab' re- byu ceyaug re mangad: lao" yao" yham sang myhi" re shad' ra" yaug khag' ngadqere: se' pye' ru qhug' nae"- ga: ta" peim: byid' ra".
12Isag wa ai: mung" mae yo kad' mung: ai: zin mae yao: wa yao: qho" ra" qhovo: nho" azhao" dayo qo" yad: zhang: yu: ra". Pe"mung:ga"re yao: re Asang shaman" byid: yang: ngad: ra". 13Yao: wa xo' yang: na: dai: li" mung: jo,nho" gyai qo" yaug boe" li" ra". 14Yao: wa yao kyaung" myo: sho'- nung: kyaung" we' daui daui okaung myo: sho' qo" ruyang Philisti byu qe wa Isag' re myid nug' ako". 15Airumung: yao: bam wa Abraham daui: na shi" au:- yao: pho" Abraham nho: daui daui okaung qe dau" to" ra" qid thaung: alhab' re bam" pye' ako".
16Ai: thao Abimeleg wa Isag re ngonhaung" mung"dan: mae" thug' lo" wa,- nao wa ngonhaung" tho' qam: so' je: bo yaug boe" ava"- ga: ta" ra". 17Airumung: ai: mug: re to: co' mung: Gerara lao: geim: mae yao" jamu re kad' ra". Yao: wa ai: jo, qo mae dayo, zo: thang: na: ra". 18Isag wa Abraham na: ra" gyo: mae dau" ra" qid thaung: jham we' Abraham shid thao re Philisti byu qeyang tam" pye' ra" qid thaung: jham re dam: dau" ra". Isag wa ai: qid thaung: jham re yao: pho" mhang" ra" mang jham reyao: dam: mhang" byid' ra".
19Isag nho: daui daui mo, wa ai lao: geim: mae qid thaung: dalam: dau: ko" re qid dau" myao: ako". 20Gerara mae" yao lhaug' mo, wa ce: qid thaung wa ngonhaung" sang: ru ngad: ga: ta" mung: Isag nho: yao lhaug' mo, we' Myan" Myo: mung:- Isag wa ai: qid thaung: re Myan" Myo:- ga: mhang" ra".
21Isag nho: daui daui mo, wa qid thaung: gatau dam: dau" ako". Ai: qid thaung we' sin: yang: re: myan" jho" myo" ako". Airumung: Isag wa aire Mo, Byo, ga: mhang" ra". 22Yao: wa ai: jo, qo mae" byaung" lo" mung:-qid thaung: gatau dau" ra". Ce: qid thaung: wa khag' we' myan" majho" myo: ngad: ako". Airumung: yao: wa aire Loe; Beim ga: mhang" ra". Yao: wa ana" Asang wa ce: mung" mae galin: gago: na nae" loe, beim khyo byid' to" ava". Amung: ngonhaung" wa cemug: mae na: dai: li" nae"- ga: ta" ra".
23Isag wa ai: jo, qo re to: co' yang: Bersheba khyo ye" lo" ra". 24Ai: myi: re Asang wa Isag re li" na: qhu" mung:- ngo wa ni" pho" Abraham nho: Mao"So ngad: dagyaug, wa,- ngo wa nao we' daga" na: nga" daui daui yaug Abraham re nga" dao:so: byid' to" ruyang ngo wa nao re shaman" byid: mung: ngo wa nao re zo: dau myo: sho' byid: nae"- ga: ta" ra". 25Isag wa ai: jo, qo mae phan dalam: kad' mung: Asang re caung:pa" byid' ra". Ai: thao yao" jamu re ai: jo, qo mae kad' mung: yao" daui daui mo, wa qid thaung: gatau dau" ako".
Abimeleg We' Isag Agyo: Mae" Myid Vang" Khyo
26Abimeleg wa Isag re kam: nae" qhid' mae" yao" pha,jhi" byid: yaug we' yao" gyezug: pho" Phiko we' daga" Gerara mae" thug' li" ra". 27Ailao" Isag wa qhid' phyao: naonhaung" wa ngore ba nam mangad: ra" khyo" kad' mung: ngore naonhaung" mung"dan: mae" thug' lo" nhao gemung: ana" wa ngore pe"mung: li" qhug' ko" i?- ga: myid' ra".
28Yao: bam wa Asang wa nao we' daga" ngad: rure ngonhaung" wa ana" ba va"- amung: nao we' ngonhaung" gyo: mae jho" myid vang" ra" khyo dalam: to: nug: ra" ein: ngonhaung" myid: ra". Ngonhaung" wa nao re pe" dae mate' ru we' dakhyo: nao re: ngonhaung" re dae mate' nae" ga: nao dao:so: to: nae" rure ngonhaung" o: ra". 29Ngonhaung" wa nao re nhag' khyag' mung: yaug yo zo: nao re thug' lo" nhao va"- Asang wa nao re shaman" byid : ru wa ana" de: de: za: ngad: ava"- ga: phaug' tau" ako". 30Isag wa yao: bam: qhid' mae" zo: shaug' poe dalam: nyhang" byid: mung: yao: bam aire zo: shaug' ako". 31Thao: ba ne, seim no' mae" dayaug we' dayaug yao: yao" dao:so: kad' mung: aire jham tang: yang: dazid thaung" te' ako". Isag wa yao: bam re au" ke' mung: yao: bam wa ba nam qe khyo" phao: lo" ako".
32Ai: ba mae Isag nho: daui daui mo, wa joe" lo mung: Isag re yao: bam dau" ra" qid thaung: we' sin: yang: lota" kyo" ako". Yao: bam wa ngonhaung" qid myao va" ga: ta" ako". 33Isag wa ai: qid thaung: re Jham Tang: ga: mhang" ra". Bersheba nho: vomo" wa yao" mang airu: qo" lo: ru ngad: ra".
Eso Nho: Taung Bug Yham Sang Myhi" Qe
34Eso wa apyad byid xe zin ngad lao" Beri nho: myiqe: zo: Yudid we' Elon nho: myiqe: zo: Basemad ga" ra" Hiti myiqe: shid' yaug re lo, xo' yu: ra". 35Ai shid' yaug wa Isag we' Rebekha tao re myid myo: nhao: ako".
Currently Selected:
APAN AQAO: 26: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009