APAN AQAO: 15
15
Abram We' To" Ra" Mao"So: Dao: Thang"
1Ai: thao Abram wa qhu" lho dalam: myao mung:- Asang wa yao: re- Abram we" dagyaug wa,- ngo wa nao re gyaug ci" rumae" gug: gam byid: nae"- amung: jhaung qhu" qi: byid: nae" ga: ta" ra" thoe re the' gyo" ra".
2Ngadqere: Abram wa phung qam: so' Asang we"- nao ngore pe" jhaung qhu" byid: nae" i? Ngo wa zo: dau lhao" re: maqo" yaug angad:. Nga" yham khaung sang: yu nae" yaug wa Damasku mae" Elieze za: ngad: ra". 3Nao wa ngore zo: dau mabyid' to: ngad: ra". Amung: nga" jeim qe mae" dayaug wa nga" jo,nho" qo" sang: yu: li" nae"- ga: phaug' tau" ra".
4Ai: thao yao: wa ai: jeim Elieze wa ni" nho: jo,nho" ma re sang nae" mangad: nao yao" yauggai zo: wa ni" nho: yham khaung sang yaug ngad: li" nae" ga: dao: dam: jhau: ra" thoe re the' gyo" ra". 5Asang wa yao: re taung gaung khyo jhui" thug' ye: mung: mug:gaung re qu" wa, amung: kyi jham re nghe' qu" wa, nao wa ai: khyi jham nho" ni" myid:zo: qe qo" li" nae"- ga: ta" ra".
6Abram wa Asang re khug ngha: ra"- ce: mathao mae Asang wa yao: re ngaui mung: yao: re khae: yu: ra".
7Aimung: Asang wa yao: re- nao ngo wa ce: mug: myid re ni" nho: mug: myid khyo" byid: nae" qhid' mae" Babelon mung" Ura mae" nao re khai: thug' lo: ra" Asang ngad:-
8Ngadqere: Abram wa phung qam: so' Asang we" ai: mug: myid nga" mae" ngad nae" rure ngo khoru: qo" gai: ba nae" i? ga: myid' ra".
9Ailao" Asang wa sam zin byang" ra" nung: bae: dadau:- cad' be, dadau:- yao lo: dadau: we' phaung" kyug' dadau: jid: au dadau: ngojhao" cili" ri:- ga: ta" ra". 10Abram wa Mao"So jhao" gug'nyhug' jham re cili" mung: dau: khao: ngo" re agaung: daqi" qi" kho' mung: dashad' mae dakhao: khao: bam: to" ra". Ngadqere: yao: wa ngho' shid dau: re wa makho' ngad: ra". 11Nangda jham wa ai: gug'nyhug' mao jham: dao khyo dao" gyo" li" ako". Abram kam" wa aijham re lham: khe' ke' ra".
12Ba vao: lo" na lao"- Abram wa yab mo" myid' sho' yab: myid' lo" ra". Amung: gyaug: din: ru wa yao: jhao" joe" lo: ra". 13Asang wa yao: re Ni" myid:zo: qe wa taung bug mung" mae bang" vo boe" li" genae" yao: bam wa ai: mung" mae jeim doe, mung: byid yo zin lam: lam: se' da: be, khyad' kad' ru qhug' li" genae". 14Ngadqere: ngo wa yao: bam re jeim kad' yam" zo" ra"- Byumyu" re qobo dae byid: nae". Amung: yao: bam wa ce: taung bug mung" mae" thug' lo" gelao"- yao: bam wa jo,nho" myo: sho' qo" ci phao: li" genae". 15Nao yao: kam" wa mao: sho' na mung: yaug yo za: shid: lo" ru we' nyhab' shaung: pye' ru qhug' li" nae". 16Ni" myid:zo: qe ce: jo, qo khyo tug' joe" lo nae" byu byid qae: myao" li" nae"- pe"mung:ga"re yao: bam wa gyai makhyang: mo, boe" li" mung: qobo dae byid' ru qhug' yo, joe" sho' ngo wa Amori byu qere makhe' thug' pye' nae"- ga: ta" ra".
17Ba vao: lo" byaug mung: mug: cad' lao" myikhug' thug' ra" myi: ug' we' myishae de; ra" myidam dalam: nyag din taung" myao: thug' li" mung: phyo' to" ra" gug'nyhug' sho:bam gaung: khyo" lai: lo" ra". 18-21Ailao" aitau mae Asang wa Abram we' dao: thang" kad' ra". Yao: wa- Kenid mung"- Kenizi mung" Kadoni mung"- Hiti mung" Parizi Rephaim- Amori Khanan ni- Girgashid- Yebusi byu qere na: ra" mung" ngad: ra"- Egutu mug: kyo: mae" Uphrad gyaung: joe" sho' ngad: ra" ce: mug: myid alhab' re ni" myid:zo: qere ngo byid: nae" ein: ngo dao:so: byid' ra"- ga: ta" ra".
Currently Selected:
APAN AQAO: 15: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009