PHAO: THUG' 40

Asang: Qhid' Kheim: Zaung Re Tau: To' Ru We' Qhaug' Byid' Ra" Khyo

1 Asang wa Moshe re- 2Lho" sao qhid' khye' mae" sao qhid' ba mae- Asang: qhid' kheim: Zaung re tau: to' wa,. 3Kham" to" ra" tarha" zang daxe bo: ra" Dao: Thang" Ban" re ai: khug mae ke' mung:- ai: qhid' au: mae akyo pin: lung: ke' go: to: wa,. 4Saboe" re dao: vo; ye: mung: ai nho: zai kug jham re saboe" dao mae ci to: wa,- myikaug' tao" rere: ci vao ye: mung: ai: dao mae myikaug' jham te' to: wa,. 5Dao: Thang" Ban" qhid' au: mae sheim ne ja: phad' ngaui" nae" qhid' mae" qhang phan re vo; to: wa,- amung: Zaung kham: dung: mae akyo pin: lung: lhao" to: wa,. 6Saboe" qhid' au: shad' mae xeim: jham phad' ngaui" nae" qhid' mae" phan re vo; to: wa,- 7Cid' nae" jarung: re- Zaung we' phan agyo: mae vo; to: mung: aimae qid ke' to: wa,. 8Alhaung" re lhang" gam: tau: to' mung: ai: nho: kham: dung: mae akyo pin: lung: lhao" to: wa,.

9Ai: thao Zaung we' ai: nho: zai kug jham alhab' re gyang" lho" ra" xau gyad yang: Asang re qhaug' byid: wa,- amung: ai wa gyang" lho" li" nae". 10Ai: thao re- phan we' ai nho: zai kug alhab' re xau gyad yang: qhaug' byid: wa,- ai wa bin sho' gyang" lho" li" nae". 11Cid' nae" jarung: re we' ai: nho: tao" rere: dakhyo: za: kad' yang: qhaug' byid: wa,.

12Arun we' yao" yauggai zo: qere Zaung kham: dung: khyo jhui" ye: mung: caung:pa" thung" li re cao" yang: gaung cid' nhao wa,. 13Arun re khinjaung bau: jham vhe' byid: mung:- xau gyad byid: wa,- yao: wa ngore khinjaung khyo" qo" caung da" nae" qhid' mae" ceru: kad' yang: yao: re qhaug' byid: la,- 14Yao" yauggai zo: qere jhui" ye: mung: yao: bam re bau: jham vhe' byid: wa,. 15Ai: thao yao: bam: khinjaung qekhyo" ngore qo" caung da" byid: genae" qhid' mae" yao: bam: yao: pho" re nao xau gyad byid' ru we' dakhyo: yao: bam re xau gyad byid: wa,- ce: xau gyad: ru wa joe" lo: nae" ayo, alhab' qhid' mae" yao: bam re khinjaung qe boe" nhao: li" nae"- ga: ta" ra".

16Moshe wa Asang: yang amyin" byid' to" ru we' dakhyo: ja: khao" re kad' ra". 17Airumung: yao: bam Egutu mung" mae" thug' lo" thao shid' zin ein: zin- lho" sao qhid' khye' sao qhid' ba mae Asang: qhid' kheim: Zaung re tau: to' ako". 18Moshe wa ai nho: zang pan jham re vo; khyo" to: mung: ai: nho: sag' pye: jham re tau: to' ra". Qae khyao" jham re te' mung: zang jham re tau: to' ra". 19Yao: wa Asang: yang amyin" byid' to" ru we' dakhyo:- Zaung dao mae mhao: mug: phyid: mug' ke' mung:- taung gaung shad' mae" mhao: mug: dao mae nghoe' ke' ra". 20Ai: thao yao: wa ai: laug pye: shid' pye: re yu mung:- Dao: Thang" Ban" khug mae ke' ra". Yao: wa Ban" lo, zaui: akheim" jham khug khyo gyang: yao: jhoe" zaui mung: ai: dao mae apyid' pyid' ra". 21Ai: thao yao: wa ai: Ban" re Zaung khug mae ke' mung: akyo pin: lung: lhao" to" ra". Asang: yang amyin" byid' to" ru we' dakhyo:- yao: wa Dao: Thang" Ban" re ceru: kad' yang: go: pye' ra".

22Yao: wa Zaung khug mug: am: shad'- akyo pin: lung: taung gaung shad' mae" saboe" re vo; to" ra". 23Amung: yao: wa Asang: yang amyin" byid' to" ru we' dakhyo:- ai: dao mae Asang re qhaug' byid' to" ra" mug re kai" to" ra". 24Yao: wa myikaug' tao" re Zaung khug mug: thao shad' saboe" we' tau" te' mae ke' to" ra". 25Amung: yao: wa Asang: yang amyin" byid' to" ru we' dakhyo:- ai: Asang: qhid' kheim: mae myikaug' jham re myi: te' ra". 26Yao: wa ai: Zaung khug akyo pin: lung: qhid' au: mae qhang phan re vo; to" ra". 27Amung: Asang: yang amyin" byid' to" ru we' dakhyo: sheim nae pyo" ra" ja: re phad' ngaui" byid' ra". 28Yao: wa ai: Zaung kham: dung: mae akyo pin: lung: re lhao" to" ra". 29Amung: yao: wa ai: akyo pin: lung" nho: qhid' au: mae xeim: jham re phad' ngaui" byid: nae" qhid' mae" phan re vo; to" ra". Yao: wa ai: dao mae- Asang: yang amyin" byid' to" ru we' dakhyo:- phad' ngaui" ra" xeim: re we' cin man" ngaui" xeim: re ngaui" byid' ra". 30Yao: wa cid' nae" jarung: re Zaung we' phan agyo: mae vo; to: mung: aire qid ke' to" ra". 31-32Moshe- Arun- yao" yauggai zo: qe wa Asang: yang amyin" byid' to" ru we' dakhyo: yao: bam wa Zaung khug khyo mangad: lao" phan khyo vao ye: khao: ngo" yao: bam: khyid lo, jham re ai: mae cid' ako". 33Moshe wa Zaung we' phan alhaung" lhang" gam: re tau: to' mung: alhaung" nho: kham: dung: mae akyo pin: lung: lhao" to" ra". Yao: wa airu: mau" zo" alhab' re zaui" pin" pye' ra".

Asang: Qhid' Kheim: Zaung Tho' Mae" Jham Thaui:

(Gyaung: Su: 9.15-23)

34Ai: thao jham thaui: wa ai: Zaung re nghoe' to: mung: Asang: qhid' kheim: bao qhui: ra" bo" bao wa ai: mae byang" jo; ra". 35Ce: mathao mae- Moshe wa ai: Zaung khug khyo maqo" vao ye: ngad: ra". 36Zaung dao mae" jham thaui: to' do, lo" khao: ngo"- Israel byu qe wa yao: bam: gyaung: khyo re lhaung" su" ye" lo" ako". 37Jham thaui: aimae athang: jo, jo, wa yao: bam wa yao: bam: Jamu re maqhui: ko" ngad: ra". 38Yao: bam du" lae" qin" ko" ra" ayo, alhab' gyo: mae na" gaung re wa Asang: qhid' kheim: Zaung tho' mae" jham thaui: re yao: bam qo" myao mung:- myi" re ngad lao" wa mug: tho' mae nga" na: ra" myi: re yao: bam myao: ako".

Currently Selected:

PHAO: THUG' 40: LHCL

Highlight

Copy