LAGYO: 27
27
Roma Vogaung: Khyo Polu Qid Sang Pho Khyo" Gau" Ye" Lo" Ru
1Ngonhaung" re Itali mung" khyo qid sang pho khyo" dai" ke' nae" qhid' mae" bin: myid: phyid' lao"- Polu we' gatau thaung: byu daqhae: re Khosin"" pho" gyetab ga" ra" Roma gyetab dalam: mae" gyezug: pho" Yuliu lo, khyo yao: bam ab byid' ke' ako". 2Ngonhaung" wa Asia mung" tham: yae gau: khung: jham khyo gau" ye" lo" nae" seim" na: bam:. Adramutium mae" qid sang pho dao mae yedo; zaung yang: gau" ye" lo" bam va". Thesaloni vogaung: mae" Makedoni byu Aristaku wa ngonhaung" we' daga" ngad: ra". 3Ai: thao: ba ngonhaung" wa Sidon vogaung: khyo joe" ye" lo" bam va". Yuliu wa Polu re nhag' khyag' ruyang Polu re yao" ba nam byin cao: qejhao" ye:qhug' mung: yao: qo ca" ra" gu: re ba nam qe:yang da" byid: rure kham: yu nhao: ra". 4Ngonhaung" aimae" to" lo" re la mayo" mung: Kupru gagyo: kao" yang la go: ra" shad' khyo" gau" ye" lo" bam va". 5Kiliki mung" we' Pamphulia mung" we' tau" te' panglai: tham: re gau" phyid' ye" lo" mung:- Lukia mung" mae" Mara vogaung: khyo joe" ye" lo" bam va". 6Gyezug: pho" wa ai: vogaung: mae Itali mung" khyo ye" lo" nae" Alexanda vogaung: mae" qid sang pho re ye:myao mung:- yao: wa ngonhaung" re ai: dao khyo do; zaung nhao: ra".
7Ngonhaung" wa myao" sho' ba yin yin za: gau" ye" lo" mung: aqug: akhai: gyai qhug' ru we' lo" thao" re wa Kidu vogaung: tau" te' khyo joe" ye" lo" bam va". La mayo" ruyang qhid' au: khyo maqo" xo' gau" ye: mung: ngonhaung" wa Salmone akhyug nhae khyo" gau" phyid' lai: ye: yang:- Krete gagyo: kao" yang la go: ra" khyo" gau" ye" lo" bam va". 8Gagyo: kao" qid yae te' te' khyo" gau" ye" lo" re aqug: akhai: gyai qhug' ru we' Lasea vogaung: mae" mataung" va" ra" Gug' Ra" Gau: Khung:- ga" ra" jo, qo khyo joe" ye" lo" bam va".
9Ngonhaung" wa ai: jo, qo mae myao" sho' ba thang: na: bam mung: Zo: Ve Jao" ra" Poe ba na lhao" re: lai: lo" byaug va" ruyang qid sang pho khyo" gyaung: su: nae" gyaug qo: ra" ayo, joe" lo: ra". Airumung: Polu wa yao: bam re lau: de, zokho' qe we"- ngonhaung" cemae"- 10Xo' gau" ye" lo" re wa gyaug ca" nae"myao:- qid sang pho we' gai xan: jham jeim" byaug: ru we' ngonhaung" kao so' lhao" re: jeim" lo" nae" khyo jo; rure ngo myao:- ga: pha,jhi" byid: ta" peim" ra". 11Ngadqere: gyezug: pho" wa Polu ta" ra" dao: re tho' qid sang pho khang" yaug we' qid sang pho asang ta" ra" dao: re je: lam" ra". 12Ai: gau: khung: wa gyo, yo, lai sho' thang: na nae" qhi" magai: ruyang byu myo: sho' wa ai: gau: khung: mae" to" mung:- gai: boe" ngad: re- Phoenig vogaung: khyo joe" sho' qam: ke' gau" ye" lo" mung:- ai: vogaung: mae gyo, yo, gu: re yethang: na nug: ako". Phoenig gau: khung: wa Krete gagyo: kao" mae ngad mung: ba vao mug:thao shad' we' ba vao mug: am: shad' khyo myo, nho qhang: to" ra" gau: khung: ngad: ra".
Pang:lai: Mae La Qam" Hug' Lo: Ru
13Mug:thao shad' mae" la cae: hug' lo lao"- qid sang pho gau: mo, wa yao: bam myid: yaung: to" ru we' dakhyo: qo" kad' nae" myid: jho gemung: yao: bam wa jo, to' nghoe: re she: to' yu mung: qid sang pho re Krete gagyo: kao" ayae khyo" cao" yang: qo" te' ra" qhi" te' mung: gau" ye" lo" ako". 14Ngadqere: mamyao" shire Ba Thug' mug: am: La Qam" ga: mhang" ra" gyai qam: bo: ra" la qam" wa gagyo: kao" taung gaung shad' khyo" hug' gyo" lo: ra". 15Ai: la qam" wa qid sang pho re lo:deim: mung:- qid sang pho wa la qam" re maqo" lham: thaug' qhao" ruyang ngonhaung" wa qam: ke' ru thang: pye' mung: la: yang deim" lo" ra" khyo cao: myung: lo" bam va". 16Kauda ga" ra" gagyo: kao" ngai mug:thao shad' khyo lai: joe" ye: lao"- la qam" dae mae" dajhid' zo: ago aqab qo" yu: bam va". Ai: tau mae qid lha mabyo; qeim: lo" nae" qhid' mae" aqug: akhai: qo" zaui" tam" ci: bam va". 17Yao: bam wa ai: lha re qid sang pho dao khyo she: to' yu mung: taui: jham: yang qid sang pho we' tang za: taui" te' ako". Yao: bam wa Surti ga" ra" ma dam: mae qid sang pho lo" kai" jo, nae" rure gyaug gemung:- qid sang pho pin: lung: jham re o khyo khyo" yu mung: la: yang deim" ra" khyo bocao: myung: lo" ako". 18Thao: ba rere: la qam" xo' yang: hug' na: ruyang yao: bam wa qid sang pho dao mae" aung: xan: jham daqhae: re phoe' khyo" pye' ako". 19Airumung: ai: thao: ba re yao: bam wa qid sang pho we' sin" ra" zai jham rere: phoe' khyo" pye' ako". 20Ngonhaung" wa myo: sho' ba- ba we' kyi jham re mathe' myao. La qam" wa xo' yang: gyai thin: ra" khyo" hug' na: ra". Airumung: lo" thao" re ngonhaung" wa kao so' loe; beim nae" khyo majo, lo: ein: myid qam: shan: pye' bam va".
21Qid sang pho zaung: ra" mo, wa zo:ve mazo: lo: ba na myo: sho' na gethao re Polu wa yao: bam: qhid' kheim: mae to" ye, mung:- Lau: de, zokho' qe we"- naonhaung" nga" dao: re tae" gyo: mung: Krete gagyo: kao" mae" magau" lo ngad: re wa ngonhaung" wa ceru: seim" ru we' byo; qeim: ru qhug' bam nae" mangad:- ngad: ra". 22Ngadqere: nhag' dangai ge,- naonhaung" khag' dayaug re: kao so' majeim: genae"- qid sang pho za: seim" byaug: li" nae". 23Pe"mung:ga"re nga" Asang ngo caung:pa" na: ra" Mao"So: mug: lagyo: dayaug wa amyi ngojhao" joe" li" mung:- 24Polu we"- dagyaug wa,- nao wa khosin" pho" qhid' kheim: mae qo" ye; jo; li" nae". Mao"So wa nao re nhag' khyag' gai kad' mung: nao we' daga" qid sang pho zaung: lo ko" ra" mo, re kao so' loe; beim nhao: li" nae"- ga: ta" ra". 25Airumung: lau: de, zokho' qe we"- Nhag' dangai ge,- pe"mung:ga"re ngo re li" ta" to: va" ru we' dakhyo: boe" lo: li" nae"- ein: ngo wa Mao"So re lam khug: na:. 26Ngadqere: ngonhaung" nho: qid sang pho wa gagyo: kao" dalam: mae lo" hug' kai" to" ru qhug' li" nae"- ga: ta" ra".
27Daxe: byid myi ein: myi re ngonhaung" qid sang pho wa panglai: tham: mo" mae" la qam" yang deim" ra" shad' khyo bocao: myung: qin" ra". Myi" gae gaung: myi: ko re ngonhaung" wa qid yae dajo, qo khyo te' na: kyi: ga: qid sang pho khang" mo, myid: ako". 28Airumung: yao: bam wa qid ka" qu" ako". Shid' xe ye, no; rure myao: to" ako". Thao dazab kyo thao re dam: ka" qu" ko" re daxe: ngo" ye, za: no; rure myao: ako". 29Yao: bam wa laug zang we' qid sang pho lo" thaung: nae" rure ci" gemung: qid sang pho dao mae" jo, to' nghoe: byid lam: khyo" ke' mung:- mug: phyad bo" li" sho' ga: akyu" mho' ako". 30Ai: thao re sang pho kau: mo, wa qid sang pho qhid' au: mae" lha ngai re she: khyo" ke' yang: qid sang pho qhid' au: mae" jo, to' nghoe: jham daqhae: re khyo" ke' geim kad' mung: yao: bam wa qid sang pho mae" phao: loe; lo" nae" seim" ako". 31Ngadqere: Polu wa gyezug: pho" we' gyezo: qere ai: qid sang pho kau: mo, wa ce: qid sang pho dao mae mana: jo, lo: gelao" wa- naonhaung" kao so' loe; beim nae" myid: lao" khyo majo, lo:nae"- ga: ta" ra". 32Ai mung: gyezo: qe wa lha ngai re taui" ra" taui: jham re zhe' phyid' pye' mung: lha re myhung: ke' ako".
33Mug: bo" zo" re Polu wa yao: bam alhab' mo, re zo:ve zo: genae" qhid' mae" poe mung:- Naonhaung" wa khoru: boe" nae" laug- ga: zo:ve pe" re: mazo: lo: lao" na ko" ru wa ana" daxe: byid ba lam: lam: ngad: ava". 34Airumung: naonhaung" kao so' qo" daui: na genae" qhid' mae" zo:ve daja: ja: zo: ge,- naonhaung" au: dao mae" xae dakhe' lhao" re: mabyaug nae"- ga: ta" ra". 35Ce: dao: bin: ta" thao re Polu wa mug daqhae: re yu: yu mung: yao: bam alhab' mo; qhid' kheim: mae Mao"So: jeju re caung: byid: yang: khyoe' phai" mung: zo" ra". 36Alao"- yao: bam alhab' mo, re: qam: qo" li" mung:- yao: bam yaug khao: ngo" re: zo:ve zo" ako". 37Qid sang pho dao mae ngonhaung" wa byu alhab' shid' yo: nhad' xe: khyaug' yaug ngad:- 38Yao: bam yaug khao: ngo" bin: zo" gyi: thao re- qid sang pho seim: nae" qhid' mae" yao: bam wa jung: cin alhab' re panglai: khyo vo; khyo" pye' ako".
Qid Sang Pho Byo; Qeim: Lo" Ru
39Mug: bo" lao"- qid sang pho kau: mo, wa yao: bam kho:tau joe" na ko" rure maxam: ngad: ako". Ngadqere: yao: bam wa gyagao: yo khyo sang pho ye:gau" de, nae" myid: phyid' ako". 40Airumung: yao: bam wa jo, to' nghoe: jham re panglai: khug khyo zhe' phyid' zaui: ke' mung:- ai: au: yao: je, khao: jham mae" taui: jham rere: pheim: pye' ako". Ai: thao re yao: bam wa sang pho qhid' au: shad' mae" pin: lung: jham re to' ke' mung: gyagao: yo khyo khang" lo: ako". 41Ngadqere: sang pho wa ma dam: mae lothaung: mung: loqe" jo; ra". Qid sang pho au: maqo" lab: ru we' sang pho thao shad' khyo wa qid bang: lhung" jham: yang lobe, ko" ruyang adau dau byo; sin" lo" na: ra".
42Alao"- gyezo: qe wa- thaung: byu qe qid qhe' qhe' yang: phao: loe; lo" genae" rure sang: kho: gemung:- thaung: byu qe alhab' re se' pye' nae" seim" ako". 43Ngadqere: gyezug: pho" wa- Polu re khyad' yu nug yang:- yao: wa gyezo: qere airu: makad' genae" qhid' mae" tam" pye' ra". Airumung: gyezug: pho" wa qid qhe' ba: qhe' ko" ra" mo, re shi" sao qhid sang pho dao mae" byae: gyo" nhao mung: gyagao: yo khyo qhe' de; lo" nhao: ra". 44Amung: dang: ra" mo, damyo" re sag' pye: re we' damyo" re wa sang pho byo, mae" adau jham re zaui: mung: qhe' de; ye: genae" qhid' mae" amyin" byid' ke' ra". Ngonhaung" alhab' wa airu: gyagao: khyo pe" maqo lo: joe" de; ye" bam va".
Currently Selected:
LAGYO: 27: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009