2 SAMUELA 6
6
Yerusalem Khyo Dao: Thang" Ban" Ci Lo: Ra" Khyo
(1 kho:kham mhomyi: 13.1-14; 15.25- 16.6,43)
1Davi wa Israel mung" mae" gai: thao" ra" gyezo: qere dalhang dam: khai: zhang" yu: ra". Alhab' wa sam tug yaug ngad: ako". 2Yao: wa ai bam re- kherubin dao mae zaung: jo; yang: qam: bo: thao" ra" Asang: mang vin ra" Mao"So: Dao: Thang" Ban" re ye dao: yu nae" qhid' mae" Yuda mung" mae" Bala khyo jhui" ye" lo" ra". 3Yao: bam ai rure bug gaung dao mae jo; ra"- Abinadab nho: yham mae" yeyu: yu mung: lhin" asag' mae ke' ako". Abinadab nho: yauggai zo: tao ngad ko" ra" Uzala we' Ahio tao wa ai: lhin" re jhui" su" ako". 4Ahio yaug wa lhin" qhid' khyo su" ra". 5Davi we' Israel byu qe alhab' wa go" nhan" ru we' yao: bam qam: bo: thao" ra" qhi" Asang re nga: yhe' byid' ra" nghaui" caung" ako". Yao: bam wa she tang:- be, tang:- zang- ko' myhang" ja: jhe' cang" jham be; ako".
6Yao: bam Nakon nho: gaug nao: zam jao: mae joe" lo ko" au:- nung: shid' dau: tha" lang: gemung: Uzala wa lo, yheim" ke' yang:- Dao: Thang" Ban" re yezaui" ke' ra". 7Ailao" jao" Asang wa Uzala re nhag' yo: mung: yao" maphug' mamyao: kad' ra" lo, mau" mathao mae yao: re se' pye' ra". Uzala wa Dao: Thang" Ban" yae mae shid: lo" ra". 8Aimung: ai: jo, qo re Pere Uzala ga: mhang" lo: ako". Asang wa Uzala re nhag' yo: mung: qobo dae byid' ruyang Davi nhag' jam: yo" ra".
9Ai: thao Davi wa Asang re gyaug mung: ana" ngo wa Dao: Thang" Ban" re ngo we' daga" khoru: qo" cilo" nae" i? ga: ta" ra". 10Aimung: yao: wa aire yao: we' daga" Yerusalem khyo ma cilo" nae" myid: phyid' ra". Ai: atha" yao: wa khyodang mae" khyothaung" vao mung: aire Gat vobyu Obed Edom yham mae yeto" ra". 11Aiwa ai tau mae lho" sam khye' jo; jo; ra". Asang wa Obed Edom we' yao" yham khaung re shaman" byid' ra".
12Dao: Thang" Ban" mathao mae Obed Edom nho: yham khaung re we' yao: qo" gu: alhab' re Asang shaman" byid' ra" khyo re kho:kham Davi the' gyo" ra". Airumung: yao: wa Dao: Thang" Ban" re Obed nho: yham mae" ye dao: yu yang: poe kad' mung: Yerusalem khyo dao: lo" ra". 13Dao: Thang" Ban" dao: ra" mo, khyaug' bye ko ce: thug' lo" gethao nung: jaung xeim: ngaui"- ngaui" byid' na: au: Davi wa yao: bam re thang nhao: to" ra". 14Davi wa yao" phyid' dam: mae jid: mo" pin: dau za: yang" ci mung: yao: qam: bo: thao" mae" go" nhan" yang: Asang re nga: yhe' byid' ra". 15Aimung: yao: we' Israel byu qe alhab' wa ngaui bau: ngaui lho" hug' mung: labo" mad: myhang" yang: Dao: Thang" Ban" re Yerusalem khyo dao: do, lo" ako".
16Ai: Ban" vomo" khug khyo dao: vao lo" na ko" au: Sholu nho: myiqe: zo: Mikha wa bao: zo: kham khyo" qu" ke' mung: kho:kham Davi wa go" nhan" ru we' gyang" lho" ra" go" nhan" rumae thug' jhu" lhang: qin" rure myao yang: yao: re qu" phoe: pye' ra". 17Ban" re yao: bam dao: lo mung: Davi kad' to: byid' ra" Zaung khug yao" jo, qo mae to" to" ako". Ai: thao yao: wa xeim: ngaui" we' zam" khug: ra" xeim: jham re Asang re ngaui" byid' ra". 18Xeim: bin: ngaui" lao" yao: wa qam: bo: thao" ra" Asang: mang mae yao: bam re shaman" byid' ra". 19Aimung: alhab' mo; re zo:ve gae byid' ra". Yao: wa Israel mung" mae" yauggai myiqe: yaug khao: ngo" re mug dakhai"- kao: to" ra" sho: daje,- sabyi shi: kyaug' dajhid' jhid' byid' ra". Ai: thao yaug khao: ngo" yham phao: lo" ako".
20Ai: thao re Davi wa yao" yham byu qere lo" au" nae" qhid' mae" yham khyo lo" re- Mikha wa yao: re li" tug: yu: ra". Yao: wa ana" ba Israel kho:kham pho" wa yao: yao" qhid' mae" mang qi: kad' yu: ava". Yao: wa yao" zug: qenho: daui daui myiqe: nau" qenho: qhid' kheim: mae ago we' dakhyo: yao: yao" gaung re khyad' qhu" ra"- ga: ta" ra".
21Davi wa- ngo wa yao" byumyu" Israel qenho: au: jhaung kad' nae" qhid' mae" ni" pho" we' yao" yham khaung: atha" ngore khyin: yu ra" yaug Asang re nga: yhe' byid: nae" qhid' mae" ngo go" nhan" na: ru ngad:. Ngo wa Asang re nga: yhe' nae" xo' yang: go" nhan" shinae". 22Aimung: ngoyao" gaung re je: lhao" re: phoe sho' kad' nae". Ngo wa pe" mangad: yaug ngad: ga: nao myid: re myid nae". Ngadqere: ai myiqe: nau" qe wa ngore gyai myhao: khyo" myid: yu: li" genae"- ga: tau" ra".
23Sholu nho: myiqe: zo: Mikha wa khonhae" re: zoshao maqo" lo:ngad: ra".
Currently Selected:
2 SAMUELA 6: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
