2 SAMUELA 20
20
Sheba Tau: Lhan" Ra" Khyo
1Ailao" Benyamin kaung mae" Bikhri nho: yauggai zo: Sheba ga: mang: ra" byugao: dayaug wa Gilgala mae na: ra". Yao: wa labo" mad: ke' mung: Davi gyo" seim" vashao:- yao: we' daga" ngonhaung" macao nae"- Israel byu qe we"- yham khyo lo" gelang: ga: yao: ke' ra". 2Airumung: Israel byu qe wa Davi re to: co' yang: Sheba we' daga" cao" ako". Ngadqere: Yuda byu qe wa jhaug' zaug mung: Davi thao khyo Yodan gyaung: mae" Yerusalem khyo daga" cao: lo" ako".
3Davi Yerusalem mae" yao" kho:kham kho" khyo joe" lo" lao"- kho:kham kho" re qu" caung nae" yao: nha: to: co' ra" yao" myingai daxe yaug re jhui" yu mung: zaung" mo, we' nha: to" ra". Yao: wa yao: bam qo ca" gu: alhab' re byid' ra". Ngadqere: yao: bam we' gaung sho: majho" zam" ngad: ra". Yao: bam wa cug' mo" we' dakhyo: dang: ra" yao: bam: pyad gu: mae nha: to: qhug' ako".
4Kho:kham pho" wa Amasa re Yuda byu qere lo" khai: zhang" yu mung: yao: bam we' daga" sao pho" ba cekhyo tug' lo ri:- ga: ta" ra". 5Amasa wa ai bam re khai nae" ye" lo" ngadqere: yao: wa kho:kham pho" dang: to" ra" ba na mae madam: joe" lo ngad: ra". 6Aimung: kho:kham pho" wa Abishai re- Sheba wa ngonhaung" re Absalom tho' qug: khai: je: byid' li" nae". Nga" byu qere jhui: yang: yao" thao cao" ye: wa, mangad: re wa yao: wa gyetab vogaung: daqhae: re sang: yu yang: ngonhaung" mae" phao: loe; lo" li" nae"- ga: ta" ra". 7Aimung: Yoab nho: byu qe- kho:kham kao zaung" mo, we' gyezo: gatau alhab' wa Abishai we' daga" Sheba thao cao" khe' nae" Yerusalem mae" to" lo" ako". 8Yao: bam Gibeon mae" laung: mo" baui khyo joe" ye: gelao"- Amasa wa yao: bam re li" tug: yu: ra". Yoab wa gyemai gyebau: ve; ci mung: shae pyang: byao wa yao" phyid' cui: mae te' ci ra". Yao: qhid' au: khyo ce" ye" lo" au: shae pyang: gyo" lo" ra". 9Yoab wa Amasa re nga" ba nam pho" we"- qao" na: i? ga: ta" mung: yao: re bobaug baug nae" qhid' mae" lo,yo lo; yang yao" nhad' maui: mae zaui" ra". 10Amasa wa Yoab lo, gatau dashad' mae zab' ci: ra" shae pyang: re malha" ngad: ra". Yoab wa yao" vae: dug: mae thug' zhaug' ke' mung: yao" au jham wa myid gaung khyo thug' lo: ako". Yao: wa ai jao" shid: lo" mung: Yoab wa dae madam: laung: ca" lo:ngad: ra". Ai: thao- Yoab we' yao: nhaung: Abishai wa Sheba thao cao" khe' ako". 11Yoab byu qemae" dayaug wa Amasa nho: maogaung nhae mae ye; jo, yang: Yoab we' Davi thao de, mo, yaug khao: ngo" Yoab thao cao" ge,- ga: yao: ra". 12Sa: we' abe, alham: mung: jo; ra" Amasa nho: mao gaung wa khyogaung: mae lang" jo; ra". Yaug khao: ngo" thang ko" rure Yoab nho: byu myao mung: yao: wa mao gaung re khyodang mae" pa: din" khyo shae: khyad' yu yang: ai: dao mae mai pho' dakhye' pye' nghoe' ke' ra". 13Mao gaung re khyodang mae" bin: yu: pye' thao re yaug khao: ngo" wa Sheba re cao" khe' rumae Yoab jhao" cao" ako".
14Sheba wa Israel amyu" kaung qe alhab' mo; mug: myid jao: sho' khyo lai: phyid' ye: mung: Abela Beth Makha vogaung: khyo joe" lo mung: Bikhri kaung mae" mo, alhab' ham phaung mung: vomo" khyo yao" thao cao" ye" lo" ako". 15Sheba aimae na: ra" khyo re Yoab nho: byu qe the' gyo: gemung: ai: vogaung: re yao: bam ye vang" ako". Yao: bam wa vang taung gaung shad' myid gaung dau" shoe' khyo" mung: vang gyang: lo" nae" qhid' mae" vang athai: mae re: dau" ako". 16Ai: vogaung: mae" pha,jhi" bo: ra" myiqe: dayaug wa vang mae"- tae" gyo: shige,- tae" gyo: shige,- Yoab re cekhyo li" nae" ta" ge,- ngo yao: we' dao: jhau nug: ra"- ga: yao: ra". 17Yoab ye" lo" lao"- yao: wa nao Yoab ngad: i? ga: myid' ra". Yao: wa ngad:- ngo ngad va"- ga: tau" ra". Ai: myiqe: wa nhag' bo: we"- tae" gyo: wa,- ga: ta" ra". Yoab wa ngo tae" gyo" na: ga: tau" ra".
18Ganhae" yao: bam wa Abela vogaung: mae" dao: phyid re ye myid' yu ge,- ga: lhaung" ta" ako". Yao: bam wa ai we' dakhyo: yao: kad' ako". 19Ngonhaung" vomo" wa qi" qhang: ru we' Israel mung" mae ngaui pyo: yaug yo: thao" ru we' jhaug' zaug: thao" ra" vogaung: ngad: ra". Nao pe"mung: aire phyo' pye' nae" seim" na: i? Asang: yang sang: ra" vogaung: re nao phyo' qheim" pye' nug: i? ga: myid' ra".
20Yoab wa khonhae" re: maphyo' pye' nae" ngo wa naonhaung" vomo" re khonhae" re: maphyo' qheim" pye' nae". 21Airu wa ngonhaung" yaung: to" ru mangad:- Ephrim bam mug: mae" Bikhri nho: yauggai zo: Sheba ga: mang yaug wa kho:kham Davi re tau lhan" qhid: li" ra". Byu ceyaug re nga" lo, mae ke' byid: gela,. Ailao" ngo ce: vomo" mae" phao: lo" nae"- ga: ta" ra".
Ai: myiqe wa- yao" au: lam: re vang dao khyo" ngonhaung" pye' khyo" ke' byid: nae"- ga: ta" ra". 22Ai: thao ai myiqe: wa yao" myid: yaung: to" ru we' vogaung: byu qejhao" ye" ra". Yao: bam wa Sheba nho: au: re qam" phyid' mung: aire vang dao khyo" Yoab wa re pye' khyo" byid' ako". Yoab wa yao" byu qe vomo" mae" to" lo" nae" aso: khyo" labo" mad: ke' ra". Amung: yao: bam wa yham khyo tug' phao: lo" ako". Amung: Yoab wa Yerusalem khyo kho:kham pho" jhao" tug' phao: lo: ra".
Davi Nho: Zug: Qe
23Yoab wa Israel gyetab mae" zug: mo" ngad: ra". Yehoiada nho: yauggai zo: Benaia wa Davi nho: kao zaung" gug: gam ru mae au: jhaung ngad: ra". 24Adoniram wa mau" jam: zaui: mo; au: jhaung ngad: ra". Ahilu nho: yauggai zo: Yehoshaphad wa tung"xam: au: jhaung ngad: ra". 25Sheva wa kho:kham kho" mau" sang ngad: ra". Zadog we' Abiatha wa khinjaung qe ngad: ako". 26Amung: Yaira vogaung: mae" Ira re: Davi nho: khinjaung qe mae" dayaug ngad: ra".
Currently Selected:
2 SAMUELA 20: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
