2 SAMUELA 14
14
Yoab Absalom Dam: Lo: Nae" Yoab Khyo Nyhang" Byid' Ra" Khyo
1Davi Absalom re gyai myid: ra" khyo re Yoab ba: ra". 2Aimung: yao wa Tekoa mae na: ra" nhag' lam: suzo: du" ra" myiqe: dayaug re khai nhao: ke' ra". Yao: joe" lo lao" Yoab wa yao: re- nao kaug' ngug geim kad' wa,- ni" kaug' ngug: ra" mai bau: re ve, wa,- au: dakyo' wa,- gyai myao" sho' kaug' ngug: lo: ra" myiqe: dayaug ru: kad' wa,- 3Aimung: kho:kham pho" jhao" vao ye: yang: ngo nao re ta" kyo" dao: kho:kham re ta" wa,- ga: ta" ra". Ailao" Yoab wa khoru: yeta" nae" dao: re yao: re ta" ra".
4Myiqe: myhi" wa kho:kham pho" jhao" ye: mung: phug' myao" ru we' myid gaung khyo ye goe; gyo" yang:- Asang kho:kham pho" we"- ngore bao" yu la,- ga: ta" ra".
5Yao: wa nao pe" o: i? ga: myid' ra". Ai: myiqe: wa- ngo wa gyai myaung sho" ra" cug' mo" myhi" ngad:- nga" yham sang pho" wa shid: byaug va". 6Ngo wa yauggai zo: shid' yaug qo" ra". Daba mae yao: shid' tao wa yo mae jho" byo; ako". Ai mae myo, byo, kao: byu mana mung: yao: shid' tao mae" dayaug wa gatau dayaug re se' pye' ra". 7Asang kho:kham we"- ana" nga" amyu" ba nam qe alhab' wa ngore gye kad' yang: yao: bam wa yao: nhaung: re se' pye' ru mathao mae yao: re se' pye' nae" qhid' mae" nga" yauggai zo: re yao: bam lo, mae ke' byid: nae" khyo mho' na: ako". Yao: bam airu: kad' ko" re wa ngo wa yauggai zo: dayaug re: maqo" lo nae". Yao: bam wa nga" nho: lo" thao" myid: lao" khyo re zai" qheim" pye' mung: nga" yham sang pho" wa yao" yham khaung mang vin nae" yauggai zo: adaui dayaug re: matang" co' lo nae" myao:- ga: ta" ra".
8Kho:kham pho" wa- yham khyo phao: lo" wa,- ai: khyo re ngo nyang" kad' byid: nae"- ga: tau" ra".
9Myiqe: myhi" wa Asang kho:kham pho" we"- nao pe" kad' kad' ngo we' nga" yham khaung byu qe qobo vin nae". Kho:kham pho" yham khaung wa qobo maqo" ngad: ra"- ga: ta" ra".
10Kho:kham pho" wa- nao re dayaug yaug kyaug' nhin" re wa- aiyaug re ngojhao" jhui" li" ri:- ailao" yao: wa nao re maqo" khinjang lo nae"- ga: tau" ra".
11Myiqe: myhi" wa- Asang kho:kham pho" we"- nga" yauggai zo" mathao mae lage, phaug' nae" qo qo" ko" ra" nga" amyu" ba nam qe wa nga" yauggai zo: re se' ko" ra" khyo" je: xo: ra" yug: mau" mashad' lhoe" genae" qhid' mae" jeju khyo" ni" Mao"So Asang re akyu" mho' byid: la,- ga: ta" ra". Davi wa ni" yauggai zo: wa dae dajhid' re: made, nae" khyo re daui: na: ra" Asang re lao: yang: ngo dao:so: byid' ra" ga: phaug' tau" ra".
12Ai: myiqe: wa- Asang kho:kham pho" we" jeju khyo" daja: ta" nhao shi la,- ga: ta" ra".
Kho:kham pho" wa gai va"- ga: tau" ra".
13Myiqe: myhi" wa yao: re Asang: byumyu" re nao pe"mung: airu" ra" shad' ra" lo,mau" re kad' va" i? Su: mang: mae ye phao: na: ra" ni" yauggai zo: re nao madam: tug' lo nhao ngad: ra". Aimung: azhao za: nao ta" va" ra" dao" yang naoyao" gaung re dao: phyid' yu: ava". 14Ngonhaung" alhab' shid zai ngad:- ngonhaung" wa myid gaung khyo sheim: gyo" jo; ra" qid re magai: gaug: zhang: yu ru we' dakhyo: ngad: ra". Mao"So wa shid yaug re madam: daui nhao: sho' ngadqere: kho:kham pho" wa- nang" thao" su: mang: mae ye phao: na: ra" byu re jhui" yu nae" khyo wa qo" qho: ra". 15Ana" Asang kho:kham pho" we"- ngo nao jhao" dao: li" jhau nae" joe" li" ra" khyo wa amyu" byu qe ngore kyaug' nhin" na: ra" khyo ngad: ra". Aimung: ngo mho' na: ra" khyo re nao kad' byid: nae" ein: ru myid: lao" yang: nao re ngo dao: jhau nae" khyo re ngo wa ngoyao" myid mae ta" va". 16Nao wa ngore tae" gyo: byid: mung: nga" yauggai zo: re we' ngore se' pye' seim" na: ra" yaug: lo, mae" we' Mao"So: yang yao" byumyu" re byid' to" ra" mung"dan: mae" ngonhaung" re yu: pye' nae" rumae" ngore khyad' yu: li" nae" ein: ngo myid ra". 17Asang kho:kham pho" we"- ni" dao: so wa ngore gug: gam byid: nae" ein: ngo myid: ra". Pe"mung:ga"re kho:kham pho" wa Mao"So: mug: lagyo: we' dakhyo: ngad mung: gai: ru we' makhyang" rure qo" kho' ra" ein: ngoyao" myid mae ta" ra". Ni" Mao"So Asang wa nao we' daga" na vashao: wo"- ga: ta" ra".
18Kho:kham pho" wa- ngo nao re dao: myid: daja: myid: nae"- nao wa ngore dangman" ru ta" ca" ra"- ga: tau" ra". Myiqe: myhi" wa- Asang kho:kham pho" we" pe" ja: ngad ngad myid: la,- ga: tau" ra".
19Davi wa ceru re nao re Yoab kad' nhao: mangad: i? ga: yao: re myid' ra". Myiqe: myhi" wa Asang kho:kham we"- ni" dao: myid: re jao" pye' yang: dao: phyid byid: nae" khyo majo; ra" khyo gyang" lho" ja: alhab' re lao: yang: ngo jham tang" ra". Ngo pe" kad' nae" we' pe" ta" nae" ngore ta" ra" yaug wa gaigai: yao: ni" gyezug: pho" Yoab yao: ngad: ra". 20Ngadqere: yao: wa ce: mau" re jao" pye' nae" qhid' mae" ceru re kad' lo: ru ngad: ra". Asang kho:kham pho" nao wa Mao"So: mug: lagyo: qhi" pha,jhi" bo yaug ngad mung: boe" ru ja: khao: ngo" re ba: ra"- ga: ta" ra".
21Thao lao" wa kho:kham pho" wa Yoab re- nao o: ru kad' nae" ngo myid: phyid' to: va". Ye: mung: zolau: pho" Absalom re ngojhao" ye jhui" lo ri:- ga: ta" ra".
22Yoab wa phug' myao" ru we' Davi qhid' kheim: mae myid gaung khyo yao" gaung re pye' lhang" ke' mung:- Asang kho:kham we"- Mao"So nao re shaman" byid: vashao: wo"- nao ngore o ngaui: ra" khyo re ana" ngo ba va". Pe"mung:ga"re nao wa ngo mho' rure byid' ava"- ga: ta" ra". 23Ailao" yao: wa to" mung: Geshu khyo ye: mung: Absalom re Yerusalem khyo ye: mung: jhui" tug' lo: ra". 24Ngadqere: kho:kham pho" wa Absalom kho:kham kho" mae mana nae" khyo re amyin" khyo" ra". Kho:kham pho" wa ngo yao: re manug: myao- ga: ta" ra". Airumung: Absalom wa yao" yham mae na mung: kho:kham pho" qhid' kheim: khyo mathug' ye: ngad: ra".
Absalom We' Davi Dam: Jho" Nyang Ko" Ra" Khyo
25Israel mung" mae Absalom qhi" yaung" ga: lahau: qi" ru khag' mana ngad: ra". Yao: wa au: mae" khyid joe" sho' pe" qo mabo ngad: ra". 26Yao" xae wa gyai thau: ra". Saung" qhang mung: saung" la: lao" za: dazin re dalhang ko' pye' ra". Aiwa kho:kham kho" mae ci: ra" jao mae shekela shid' yo nho" ko la" ra". 27Absalom wa yauggai zo: sam yaug we' gyai yaung" ra" myiqe: zo: Tama ga: mang: ru dayaug qo" ra".
28Absalom wa kho:kham re mamyao lo: Yerusalem mae shid' zin na: jo; ra". 29Ailao" yao: wa Yoab jhao" byu nhao: ke' mung: yao" qhid' mae" kho:kham pho" jhao" ye: byid: nae" mho' ke' ra". Ngadqere: Yoab wa manug li" ngad: ra". Absalom wa dalhang dam: khai nhao: ke' ra". Yoab wa dam: ha: pye' ra". 30Aimung: Absalom wa yao" daui daui mo, re- qu" ge,- Yoab nho: yo wa nga" yo nhae mae ngad: ra". Ai mae bale yaug: jo; ra". Aire myi: yengha" pye' ge,- ga: ta" ra". Ailao" yao: bam ye: mung: yo re myi: ye ngha" ke' ako".
31Yoab wa Absalom yham khyo ye: mung: ni" daui daui mo, nga" yo re pe"mung: myi: ngha" ko" ra" i? ga: yeta" ra".
32Absalom wa nao re ngo khai nhao: ke' au: nao mali" yang: ngad: ra". Ngo wa nao re kho:kham pho" jhao" ye mung: nga" qhid' mae" yemho' byid: nhao nug: lo: ra". Ngo pe"mung: Geshu mae" to" yang: cekhyo lo: i? Nga" qhid' mae" wa aimae na: jo; re je: gai: ra"- ga: ta" ra". Absalom wa xo' yang: ngo wa nao re ngo kho:kham re yeqhug' nae" khyo re nyhang" byid: nhao nug: ra". Ngo wa qobo qo" yang: ngad lao" re: yao: ngore se' pye' vashao:- ga: ta" ra".
33Airumung: Yoab wa kho:kham Davi jhao" ye: yang: Absalom ta" ra" khyo yao: re yeta" shid' ra". Kho:kham pho" wa Absalom re khai nhao: ke' ra". Yao: wa kho:kham pho" jhao" li" mung: yao" qhid' kheim: mae myid gaung mae li" goe; gyo" ra". Kho:kham pho" wa yao: re bobaug baug yang: lham: tug: yu: ra".
Currently Selected:
2 SAMUELA 14: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
