2 KHO:KHAM 12
12
Yuda Kho:kham Yoasha
(2 Kho:kham mhomyi: 24.1-16)
1Israel kho:kham Yehu eib: ru nhad' zin ein: zin mae Yoasha wa Yuda kho:kham boe" lo: ra". Yao: wa Yerusalem mae byid xe zin eib: na: ra". Yao: myhi" wa Bersheba vogaung: mae" Zibia ngad: ra". 2Yao: wa yao" pyad jao: sho' Asang o ngaui: ra" mau" re kad' ra". Pe"mung:ga"re yao: re- khinjaung pho" Yehoiada mho" shid' yang: ngad: ra". 3Ngadqere: tarha" taung bug so re caung:pa" ra" jo, qo jham re maphyo' qheim" pye' mung: mung" byu qe wa aimae xo' yang: ngaui" xeim: we' sheim nae pyo: ja: re phad' ngaui" byid' ako".
4Yoasha wa khinjaung qere khai: yu mung: Caung:pa" Yham mae ngaui" xeim: ngaui" byid' ru we' xo' taui" ra" ngaui- abang mabyid qhaug' byid' ra" ngaui" xeim: qhid' mae" ngaui- kao bau yang: qhaug' byid' ra" alu: ngaui jham re qaung" yu genae" qhid' mae"- amyin" byid' ra". 5Khinjaung yaug khao: ngo" wa yao: caung da" byid' rumae" ngaui re cili nae" qo qo" ako"- qo re qo: khyo" ai: ngaui jham re Caung:pa" Yham nyhang" rumae ci nae" ngad: ra". 6Ngadqere: Yoasha eib: ru shid' xe: sam zin joe" lo ngadqere: khinjaung qe wa Caung:pa" Yham dakhyi" re: ma nyhang" shiko" ngad: ra". 7Amung: yao: wa Yehoiada we' khinjaung qere khai: yu mung: naonhaung" Caung:pa" Yham re pe"mung: ma nyhang" ko" i? Ana" ba mae" thoegu: naonhaung" qo" khae: yu: ra" ngaui re naonhaung" lo, mae magai: zam" ci genae". Nyhang" ra" mau" qo" kad' nae" qhid' mae" aire naonhaung" ab byid: ca" genae"- ga: ta" ra". 8Khinjaung qe wa ceru re myid vang" mung: Caung:pa" Yham re manyhang" nae" rure re: myid vang" ako".
9Ai: thao Yehoiada wa ban" dalam: re yu yang: apyid' mae abung" te' mung: Caung:pa" Yham khyo byu vao li" ra" lo, yo shad' phan nhae mae ai: ban" re to" to" ra". Kham: dung: mae mau" ang: ra" khinjaung qe wa caung:pa" mo; yang byid' ra" ngaui alhab' re ban" khug mae ke' ako". 10Ban" khug mae ngaui laug: li" khao: ngo" kho:kham ngaui zam: we' Khinjaung Yin" shid' yaug li" mung: ngaui jham re phad' yhug' yang: lag: ako". 11-12Bin: tung" xam" yu thao yao: shid' yaug wa ai: ngaui jham re Caung:pa" Yham mae mau" zaui" ra" au: jhaung yaug re ab byid: mung: aire lo, mau" zaui: mo,- yham kad' mo,- zao mo,- laug kho' mo, re aphug' byid: mung:- sag' the: we' nyhang" rumae ci: ra" laug baui jham re vai yang: yhung: ca" gu: alhab' re ci yhung" ako". 13Ngadqere: ai: ngaui re ngaui keim jham- khug' jham- labo" jham- myikaug' zai jham- ngaui we' qhang: yang kad' ra" zai daja: mae re: maci ngad: ako". 14Aijham re mau" zaui: mo, re we' nyhang" rumae ci: ra" zai jham re vai: rumae ci: ako". 15Mau" zaui: mo; au: jhaung qe wa nhag' lam: gyai dangman" mo, ngad: ako". Aimung: alu: ngaui japhin: re mamho' yu ca" ngad: ra". 16Dam: khyug' ra" ngaui xeim: we' qobo ngaui" xeim: ngaui jham re ban" khug khyo make' ngad: ako". Aiwa khinjaung qe: qhid' mae" ngad: ra".
17Ai: ayo, mae Suri kho:kham Hazae wa Gat vogaung: re gyekhe' mung: aire aung: pye' ra". Ailao" yao: wa Yerusalem re khe' zin: nae" myid: phyid' to" ra". 18Yuda kho:kham Yoasha wa yao" qhid' au: mae" mo, ngad ko" ra" Yehoshaphad- Yoram- Ahazia bam Asang re qhaug' byid' to: ko" rumae yao" ngaui" xeim we' Caung:pa" Yham we' kho:kham kho" jo,nho" mae" qhang re ke' laung: yang: jhaung qhu" khyo" kho:kham Hazae re alhab' vhin: ke' ra". Ailao" Hazae wa yao" gyetab re jhui: yang: Yerusalem re lai: to: co' ra".
19Kho:kham Yoasha kad' ra" gatau lo, mau" ja: khao: ngo" re Yuda kho:kham qe: tung" xam: paug' mae tung" xam" to" ako".
20-21Kho:kham Yoasha nho: gyezug: qe wa yao: re gye kad' tau: lhan" ako". Aibam mae" Shimead nho: yauggai zo: Yozakha we' Shome nho: yauggai zo: Yehozabad shid' yaug wa Sila khyo khyodao mae" Yerusalem ba thug' shad' myid ke' pyang" to" ra" myid gaung dao mae kad' to" ra" yham mae yao: re se' pye' ako". Yoasha re Davi nho: vogaung: mae" kho:kham lab mae nyhab' pye' ako". Yao" yauggai zo: Amazia wa yao" khu mae kho:kham xo' kad' ra".
Currently Selected:
2 KHO:KHAM 12: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
