2YOHAN 1
1
1Lau: de, pho" ngo wa ngo dang dang jhid'de; mung:- jhid'de; ra" myiqe: myhi" re we' yao" zo: dau qere mugsug' tung" ke' ra". Nao re ngo dayaug za: jhid'de; ru mangad:- ai: dangman" rure ba: ra" mo, alhab' yang nao re jhid'de; ako". 2Pe"mung:ga"re ai: dangman" ru wa ngonhaung" khug mae bo: jo, mung: ngonhaung" we' khonhae" re: ngad: jo; li" nae" ru ngad: ra".
3Pho" Mao"So we' Pho" nho: yao: Zo: Yesu Khristu wa ai: dangman" ra" khyo re ba mung: yao: cao: jho" jhid'de; ra" nhag' myan" ra" jeju- nhag' khyag' shogu: ru we' ngaui pyo: yaug yo: ra" shaman" jeju byid: vashao: wo".
Dang Man" Ru We' Jhid'de, Myid
4Ni" zo: dau qemae" damyo" wa Pho" Mao"So: yang ngonhaung" re amyin" byid' to" ru we' dakhyo: ai: dangman" rumae kao so' daui: na ko" rure ngo the' myao yang: ngo ngaui bau" ra". 5Airumung: jhid'de; ra" myiqe: myhi" we"- ngo naonhaung" re tung" vhin: ke' ra" amyin" dao: wa asag' mangad:- sao qhid' maqhid mae" ngonhaung" qo" yu: to" ra" amyin" dao: ngad: ra". 6Ngo ta" ra" ce: jhid'de; myid wa Mao"So: amyin" dao: jham re ngonhaung" phug' cao" yang: kao so' daui: ru ga" ru ngad: ra". Sao qhid' maqhid mae" naonhaung" alhab' mo, the' gyo" yu ko" ra" amyin" dao: wa naonhaung" alhab' wa jhid'de; myid mae kao so' daui ca" ga" ru ngad: ra".
7Yesu Khristu wa xao su byu: gaung khyao ve, vin yang: joe" li" ru ngad: ra" khyo re makhae: yu: ra" mo, ngad: ra" mhug' pyag' zo: mo, myo: sho' wa mug: myid geim" khyo thug' ye" lo" byaug: avako". Airu" ra" yaug wa mhug' pyag' zo: yaug ngad mung: Khristu nho: gyevo ngad: ra". 8Airumung: naonhaung" wa lha" yang: na ge,- airu: lao" naonhaung" qhid' mae" ngonhaung" zaui: so: byid' lo: ra" lo, mau" akyu" re aseim" maboe" nhao lo:- ai: aphug' jhaung qhu" re jab byang" sho' naonhaung" qo" khae: yu: li" genae".
9Khristu nho: mho" shid' ra" khyo mae kao so' madaui lo:- ai: mho" shid' khyo re lhoe" yang: kao so' daui: ra" yaug khag' ngadqere: Mao"So maqo" yaug ngad: ra". Ai: mho" shid' khyo mae kao so' daui: ra" yaug khag' ngad qere: Yao: Pho" we' Yao: Zo: re qo" yaug ngad: ra". 10Airumung: ce: mho" shid' khyo re mavin lo:- naonhaung" jhao" dayaug yaug joe" li" ngad: re naonhaung" yham mae yao: re bang" dalham: tug: yu ge,- bang" se" dao: lhao" re: dalham: jhau ge,. 11Pe"mung:ga"re yao: re bang" se" dao: lham: jhau: ra" yaug wa yao: kad' ra" makhyang" ra" mau" zo" re bocao: kad' ra" yaug boe" li" ra".
Dao: Pin"
12Ngo wa naonhaung" re ta" nae" khyo myo: sho' qo" ra". Ngadqere: mugsug' khye' mae tung" cid' mhaug' yang tung" to: nug: ru mangad: Airu: tung" nae" atha"- ngonhaung" jab byang" sho' ngaui bau" ru qo" yu nae" qhid' mae" naonhaung" jhao" joe" li" yang: myo,khung: te' ngonhaung" jho" qo" jhau nae" rure ngo myid: lao" ra".
13Nao jhid'de; ra" ni" nhaung" nho: zo: dau qe wa nao re au" ke' ako".
Currently Selected:
2YOHAN 1: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009