2 KHO:KHAM MHOMYI: 6
6
Sholamon Mo,byu Qere Dao: Ta" Ra" Khyo
(1 Kho:kham 8.12-21)
1Ai: thao kho:kham Sholamon wa akyu" mho' mung:- Asang we"- nao wa na nae" jo, qo re jham thaui: we' mug: cad' ru khyin: yu: ava". 2Ana" ngo wa nao apyad ato na nae" jo, qo dalam: ngad: ra" caung:pa" yham dalam: ni" qhid' mae" ngo kad' va"- ga: ta" ra".
3Israel byu qe alhab' wa aimae ye; jo; ako". Kho:kham wa yao: bam: shad' khyo myo, khung: phaug' lo mung: Mao"So: shaman" jeju yao: bam: dao mae mho' byid' ra". 4Yao: wa Israel nho: Mao"So Asang re caung:khin" ge,. Yao: wa nga" pho" Davi re byid' to" ra" dao:so: re jab byang" nhao: ava". Ai: dao:so: mae Asang ta" ru wa- 5Nga" amyu" byu qere Egutu mung" mae" ngo jhui" thug' lo: ra" ayo, mae" ana" ba joe" sho' Israel mung" mae ngore caung:pa" nae" caung:pa" yham kad' nae" jo, qo khyo" vogaung: dalam: rere: ngo makhyin: to:- amung: nga" byumyu" Israel re au: jhui" she nae" byu dayaug rere: ngo makhyin: to:- 6Ngadqere: ana" ngo wa- ngore caung:pa" nae" jo, qo khyo" Yerusalem re khyin: to: va". Amung: nga" byumyu" re eib nae" Davi nao re khyin: to: va"- ga" ru ngad: ra".
7Sholamon wa nga" pho" Davi wa Israel Mao"So Asang re caung:pa" nae" jo, qo caung:pa" yham dalam: kad' nae" yaung: to" ra". 8Ngadqere: Asang wa yao: re nao nga" qhid' mae" caung:pa" yham kad' nae" rumae kao bau: na: ru wa jo: ra". 9Ngadqere: nao wa aire khonhae" re: maqo" kad' nae"- nga" caung:pa" yham re kad' nae" yaug wa ni" yauggai zo:- naoyao" yauggai zo: ngad: li" nae"- ga: ta" ra".
10Ana" Asang wa yao" dao:so: re phug' cao" ava". Ngo wa nga" pho" khu mae Israel kho:kham khyo" qo" xo' kad' va". Ngo wa Israel nho: Mao"So Asang re caung:pa" nae" qhid' mae" caung:pa" yham dalam: re ngo kad' va". 11Ngo wa Caung:pa" Yham khug mae Asang we' Israel byu qe to" ra" Dao: Thang" laug pye: jham bo: ra" Dao: Thang" Ban" re ke' to: va"- ga: ta" ra".
Sholamon Nho: Akyu" Mho' Dao:
(1 Kho:kham 8.22-53)
12Ai: thao amyu" byu qenho: qhid' kheim: mae- Sholamon phan qhid' kheim: mae ye; jo, yang: yao" lo, re tau mung: akyu" mho' ra". 13(Sholamon wa gyid: bo" gin: jao" ginbyae: dalam: kad' mung: aire vang" agaung: mae to" to" ra". Airu wa lu phyao: qhang phyao: ngo" daung" daung" bo mung: myhao phyao: wa sam daung" bo: ra". Yao: wa ai: gin: jao" ginbyae: khyo do, ye: mung: yao: re yaug khao: ngo" yang the' myao: ra" jo, qo mae pad' thaug' thaug' yang: yao" lo, re mug:gaung khyo to' to" ra".) 14Yao: wa Israel nho: Mao"So Asang we"- mug:gaung tho' mae re: myidgaung mae re: nao we' dau: ra" so mana nao wa ni" byumyu" qe we' to" ra" dao: thang" re jhaug' zaug mung: yao: bam: aung khug nhag' lam: alhab' yang nao re mho dao: gyo: mung: yao: bam daui: na gelao"- ni" jhid'de; myid yao: bam re nao qhu" byid' ra". 15Nao wa nga" pho" Davi re to" ra" dao:so: re jhaug' zaug: ava". Ana" ba wa- dao: kheim: khao: ngo" jo; byang" li" ava". 16Ana"- Israel nho: Mao"So Asang we"- nao wa nga" pho" re yao" myid:zo: dayaug wa khonhae" re: Israel kho:kham khyo"- eib: na: li" nae"- ga: dao:so: byid' to" ra" dao:so: gatau rere: jhaug' zaug byid: la, yao: nao re nyang" za: ni" tarha" gyo" lo: ru we' dakhyo: yao: bam rere: nao re mho dao: gyo: genae" qhid' mae" bao" thaug' byid: la,. 17Aimung: ana"- Israel nho: Mao"So Asang we"- ni" daui daui yaug nga" pho" Davi re nao dao:so: byid' to" ra" gu: ja: khao: ngo" re boe" li" nhao la,.
18Ngadqere: O"- Mao"So we" nao wa mug:myid dao mae" yauggai we' myiqe: qe: phaung gaung: mae qo" na: i? Myidgaung: mae gaigai: nao qo" na nae" i? Mug: khaung alhab' qhi" ngad: re lhao" re: ni" qhid' mae" maga" ngad: ra". Aire ce: ngo kad' to" ra" Caung:pa" Yham wa khoru: gai: ga" nae" i? 19Nga" Mao"So Asang we"- ngo wa ni" daui daui yaug ngad:- nga" akyu" mho' dao: re tae" gyo: byid: mung: ana" ba ngo mho' rure byid: la,. 20Nao re caung:pa" nae" nao khyin: to" ra". Cejo, qo ce: Caung:pa" Yham re myi" re: na" re: lhaug' qu" na byid: la,- ce: Caung:pa" Yham khyo ngo myo,khung: qang yang: akyu" mho' au: ngore gyo: byid: la,. 21Ni" byumyu" qe ce: jo, qo khyo yao: bam: myo, khung: qang yang: akyu" mho' gelao"- nga" akyu" mho' dao: we' ni" byumyu" Israel qenho: akyu" mho' dao: re gyo: byid: la,- mug: khaungdao mae jo; ra" ni" yham mae" ngonhaung" re gyo: byid: mung: qobo khyad' byid: la,.
22Byu dayaug gatau dayaug re shad' ra" ga: qobo zhaug' ru qhug' mung: yao: qobo maqo" ra" khyo re jham tang: nae" qhid' mae" ce: Caung:pa" Yham khyo jhui" lo qhug' lao". 23O" Asang we"- mug: khaung mae" tae" gyo: byid: mung: ni" daui daui mo, re dao: kho' byid: la, qobo qo" ra" yaug re yao: man: qi" ru we' dakhyo: qobo dae byid: mung: qobo maqo" ra" yaug re wa- lhoe' ke' byid: la,.
24Ni" byumyu" Israel qe yao: bam nao re qobo shad' geyang: yao: bam: gyevo qeyang khe' aung: pye' ru qhug' gelao"- yao: bam nao jhao" phaug' lo mung: ce: Caung:pa" Yham khyo li" yang: qobo khyad' byid: nae" qhid' mae" nhag' lam: nyham: khyo" mung: nao re akyu" mho' gelao"- 25Mug: khaung mae" yao: bam re tae" gyo: byid: wa,- ni" byumyu" qenho: qobo re khyad' pye' byid: mung: nao: yang yao: bam: phug' pho" qere byid' to" ra" mug:myid khyo yao: bam re dam: jhui" thug' lo byid: wa,.
26Ni" byumyu" qe nao re qobo shad' lhoe" geyang: nao: yang mug: qu re tam" pye' lao"- yao: bam myid tha" lo mung: ce: Caung:pa" Yham khyo myo, khung: qang yang: nhag' lam: nyham: khyo" zo" re"- nao re akyu" mho' gelao". 27O" Asang we"- mug: khaung mae" yao: bam re tae" gyo: byid: mung: ni" daui daui mo, Israel byu qenho: qobo jham re khyad' pye' byid: yang: jo: ru kad' genae" qhid' mae" yao: bam re mho" byid: wa,- ailao" O" Asang we"- nao: yang ni" byu qere gang" tang: ra" jo,nho" khyo" byid' to" ra" ce: ni" nho: mug:myid mae mug: qu nhao wa,.
28Mung"dan: khug mae bao" khug' khug' ru qam" gyo" ru- la laung: yang- khyag' phaung" jham: yang qhovo: jham re zai" qheim" pye' qhug' lao"- ni" byumyu" qe yao: bam: gyevo qeyang khe' zin" ru qhug' lao"- yao: bam: phaung mae nobug: phyobug:- no phyo: qhug' lao" yao: bam: akyu" mho' dao: re tae" gyo: byid: wa,. 29Ni" byu Israel qemae" dayaug yaug nhag' lam: gyug: sho' kaug' mung: akyu" mho' yang: yao: bam: lo, re ce: Caung:pa" Yham shad' khyo yheim" ke' ko" ngad: re- 30Yao: bam: akyu" mho' dao: re tae" gyo: byid: wa,- mug: khaung mae jo; ra" ni" yham mae" yao: bam re tae" gyo: byid: mung: yao: bam re qobo khyad' byid: wa,. Nao dayaug za: byu xao su: nhag' lam: mae myid seim" na: rure ba: ra" yaug khao: ngo" re yao: man: qi" ru we' dakhyo: kad' byid: wa,- va: mae na: ra" taung bug byu dayaug ni" nho: qi" qhang: ru we'- 31Ailao"- ni" byumyu" qe nao re gyaug mung: nao: yang ngonhaung" phug' pho" qere byid: to" ra" mung" mae yao: bam na: ra" ayo, alhab' mae ni" byumyu" qe nao re gyaug mung: mho dao: gyo: geshao:-
32Va: mae na: ra" taung bug byu dayaug ni" nho: lahau: qi" ru we' ni" byumyu" qe: qhid' mae" qi" qhang: ra" mau" kad' va" ra" khyo re the' gyo: mung: nao re caung:pa" nae" we'- ce: Caung:pa" Yham mae akyu" mho' nae" qhid' mae" joe" li" lao"- 33Yao: bam: akyu" mho' dao: re tae" gyo: byid: wa,- mug:myid byu qe alhab' wa ni" amyu" Israel byu qe we' dakhyo: nao re ba mung: nao re mho dao: gyo: genae" qhid' mae" nao na: ra" mug:gaung dao mae" yao: bam re tae" gyo: byid: mung:- yao: bam nao re mho' ra" ja: re kad' byid: wa, ailao"- ce: ngo kad' to" ra" Caung:pa" Yham wa nao re caung:pa" nae" qhid' mae" kad' to" ra" jo, qo ngad: rure yao: bam ba: li" genae".
34Ni" byumyu" qe yao: bam: gyevo qere gyekhe' nae" nao amyin" byid: mung: yao: bam khai: mae na na- nao: yang khyin: yu: to" ra" ce: Caung:pa" Yham khyo myo, khung: qang yang: yao: bam nao re akyu" mho' gelao"- 35Yao: bam: akyu" mho' dao: re tae" gyo: byid: wa,- mug: khaung mae" yao: bam re gyo: byid: mung: yao: bam re aung doe; ru byid: wa,-
36Ni" byu qe nao re qobo shad' ru we' (qobo mashad' ru dayaug re: mana) ni" nhag' yo" ruyang yao: bam re yao: bam: gyevo qeyang: nao khe' aung: pye' nhao: ru we' yao: bam re gatau: mung"dan: khyo kyam: byu qekhyo" taung" yu: lo" gelao"- ai: mung"dan: wa gyai va: sho' ngadqere:- 37Ni" byu qe: akyu" mho' dao: re tae" gyo: byid: wa,- ai: mung"dan: mae yao: bam myid tha" mung: nao re akyu" mho' yang: khonho" qobo shad' ru we' yao: bam khoqhi" nhag' lam: kaui: lo ko" rure qobo lhang: yu ko" ngad: re- O" Asang we"- yao: bam: akyu" mho' dao: re gyo: byid: wa,. 38Aimung"dan: mae yao: bam dangman" ru we' nhag' lam: din: din: za: myid tha" pye' yang: ngonhaung" phug' pho" qere nao: yang byid' to" ra" ce: mung" nao khyin: to" ra" ce: vogaung:- ni" qhid' mae" ngo kad' to" ra" ce: Caung:pa" Yham khyo yao: bam myo, khung: qang ko" au:- 39Yao: bam: akyu" mho' dao: re tae" gyo: byid: wa,- mug: khaungdao mae jo; ra" ni" yham mae" yao: bam re gyo: byid: mung: yao: bam re nhag' khyag' byid' ru we' yao: bam: qobo alhab' re khyad' pye' byid: wa,.
40Ana" O"- nga" Mao"So we"- ngonhaung" re qu" mung: ce: jo, qo mae akyu" mho' ra" dao: re tae" gyo: byid: la,- 41Mao"So Asang we"- ana" to" wa,-ni" qam: so' nho: aso: ngad: ra" Dao: Thang" Ban" we' daga" Caung:pa" Yham khyo vao ye: mung: cemae apyad ato na: jo, wa,- ni" khinjaung qere yao: bam kad' ra" mau" alhab' mae shaman" byid: mung:- nao yao: bam: dao mae gai shab: ruyang ni" amyu" byu qe alhab' ngaui bau: vageshao:- 42Mao"So Asang we"- nao khyin: to" ra" kho:kham re dangag: pye' wa,- ni" daui daui yaug Davi dao mae nao jhid'de; ra" jhid'de; myid re myid: beim: wa,- ga: akyu" mho' ra".
Currently Selected:
2 KHO:KHAM MHOMYI: 6: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
