2 KHO:KHAM MHOMYI: 35
35
Yoshia Lai Co' Poe Kad' Ra" Khyo
(2 Kho:kham 23.21-23)
1Kho:kham Yoshia wa Asang re nga: yhe' byid' ra" khyo" Yerusalem mae Lai co' Poe kad' ra". Lho" sao qhid' khye' daxe: byid ba ein: ba mae yao: bam wa poe qhid' mae" gug'nyhug' jham re se' ako". 2Yao: wa khinjaung qere Caung:pa" Yham mae yao: bam zaui: nae" mau" re jaung byid: mung: ai: mau" jham re nyang" nyang" kad' genae" qhid' mae" yao: bam re qam: byid' ra". 3Yao: wa Levi byu qe- Asang re qhaug' byid' to: ko" ra" Israel byu qenho: mho" pho" qere re:- Davi nho: yauggai zo: kho:kham Sholamon yang kad' to" ra" Caung:pa" Yham mae gyang" lho" ra" Dao: Thang" Ban" re dao: ke' to: ge,. Naonhaung" wa dajo, qo mae" dajo, qo khyo aire madao: lhau ca" loko" ngad: ra". Naonhaung" Mao"So Asang re we' yao" byumyu" Israel re kam" wa caung: da" byid: nae" ngad: ako". 4Davi kho:kham we' yao" yauggai zo: kho:kham Sholamon yang mau" zo" re cao" yang: amyu" kaung dakaung we' dakaung re jaung byid' to" ra" Caung:pa" Yham mae" naonhaung" mau" zo" jham mae jo, qo yu ge,. 5Amung: naonhaung" mae" damyo" wa Israel byu yham khaung khao: ngo" re qo" bao" thaug' byid: sho' naonhaung" yao: jaung: nyhang" yu ge,. 6Naonhaung" wa Lai co' Poe yao nau" jham we' cad' be, jham re se' nae" ngad: ako". Ana" naonhaung" yao" gaung re caung:pa" thung" we' sin: yang: gyang" san nhao mung:- Moshe nhad' khyo" Asang: yang byid' to" ra" mho" shid' dao: re naonhaung" mao:nhaung: Israel byu qe qo" cao" genae" qhid' mae" ngaui" xeim: jham re nyhang" seim" ge,- ga: ta" ra".
7Mung" byu qe Lai co' Poe mae ci nae" kho:kham Yoshia yao" yao kyaung" cad' kyaung" mae" byid' to" ra" gu: wa yao- yao nau"- cad' be, nau" sam tug dau:- nung: jaung lo: sam taung dau: ngad: ra". 8Yao" nho: gyezug: qere: mung" byu qe khinjaung qe- Levi byu qe ci nae" alu: byid' ako". Caung:pa" Yham qu" caung: au: jhaung qe ngad ko" ra" Khinjaung Yin" Hilkia- Zekharia- Yehie khinjaung qere yao nau" we' cad' be, nau" shid' taung: khyaug' yo dau:- poe ayo, gyo: mae ngaui" xeim: ngaui" byid: nae" nung: jaung lo: sam yo dau: re byid' ako". 9Levi au: jhaung qe ngad ko" ra" Konania- Shemaia we' yao:nhaung: Nethane- Hashabia- Yeiela- Yozabad bam wa yao nau" we' cad' be, nau" ngo" taung dau: we' nung: jaung lo: ngo" yo dau: re ngaui" xeim: khyo" ngaui" byid: nae" Levi byu qere alu: byid' ako".
10Lai co' Poe qhid' mae" ja: khao: ngo" re bin: seim" gelao"- khinjaung qe we' Levi byu qe wa kho:kham yang amyin" byid' to" ru we' dakhyo: yao: bam: mau" mae jo, qo yu: ako". 11Yao nau" we' cad' be, nau" jham re bin: se' gethao re Levi byu qe wa aijham re shoqid qhid' ako". Khinjaung qe wa phan re sa: pyi" sheim" ako". 12Ai: thao yao: bam wa Moshe nho: tarha" mae mho" shid' to" rure cao" yang: ai: gug'nyhug' jham re yao: bam ngaui" xeim: qo" ngaui" byid: genae" qhid' mae" yham khaung khyo" ai: gug'nyhug' jham re yao: bam re kho' byid' ako". 13Levi byu qe wa thung" li jham re cao" yang: ngaui" xeim: jham re myi: mae kao mung: gyang" lho" ra" xeim: jham re ug' jham- nin dam jham- ug' the" jham mae jho' mung: sho: jham re mo, byu qere phyad za: gae byid' ako". 14Ceru: bin thao re Levi byu qe wa yao: bam yao" qhid' mae" we' Arun nho: myid:zo: qemae" khinjaung qe: qhid' mae" sho: jham re nyhang" jaung: yu: ako". Pe"mung:ga"re khinjaung qe wa gug'nyhug' jham re dau: geim" phad' ngaui" ru we' xau jham re phad' ngaui" ra" mau" kad' yang: myi" joe" sho' mau" laug: na: ako". 15She mad be, nghaui" jhao mo, Levi byu Asab nho: kaung mae" mo, wa kho:kham Davi yang mho" ra" khyo" yao: bam: jo, qo mae jaung byid' to: qhug' ako". Ai bam wa Asab- Heman- kho:kham nho: lapa Yeduthun bam ngad: ako". Caung:pa" Yham kham: gug:gam mo, wa yao: bam: mau" re mato: co' qo ngad: ako". Pe"mung:ga"re Levi byu gaje qe wa yao: bam qhid' mae" Lai co' Poe re nyhang" seim" byid' ako". 16Airu: kho:kham Yoshia yang amyin" byid' to" ru we' dakhyo: Asang re caung:pa" ru Lai co' Poe kad' ru- phan dao mae ngaui" xeim: phad' ngaui" byid' rure ai: ba mae kad' ako". 17Israel byu alhab' mo, wa Lai co' Poe we' Man" Make' Mug Poe re nhad' ba lam: lam: kad' ako". 18-19Samuela pyad mae" ana" joe" sho' Lai co' Poe re ceru: khonhae" re: makad' qu" ngad: ako". Yoshia eib: ru daxe: she' zin ein: zin mae kho:kham Yoshia- khinjaung qe- Levi byu qe- Yuda- Israel mung" byu qe we' Yerusalem vobyu qeyang jhui" kad' ra". Ceru" ra" Lai co' Poe dapoe rere: qhid' phyao: mae" kho:kham qe khag' re: makad' qu" ngad: ako".
Yoshia Eib: Ra" Ayo, Thao" Lo" Ra" Khyo
(2 Kho:kham 23.28-30)
20Kho:kham Yoshia wa Caung:pa" Yham re cegu: alhab' bin: kad' thao re Egutu kho:kham Nekho wa Uphrad gyaung: yae mae jo; ra" Khakhemi re gyekhe' nae" gyetab datab re jhui" ye" lo" ra". Yoshia wa yao: re tam" pye' nae" seim" ra". 21Ngadqere: Nekho wa Yoshia re ce: mungdao: vhin: ke' ra". Aiwa Yuda kho:kham we"- ngo khe' ra" ce: gye poe wa nao we' pe" masin:- ngo wa nao re khe' nae" joe" li" ru mangad:- nga" gyevo qere khe' nae" angad:- Mao"So wa ngore hin hin kad' nae" ta" ava". Mao"So wa nga" shad' mae ngad:- amung: ngore gye dakad' la,- ai mangad: re- yao: wa nao re se' pye' li" nae" ga" ru ngad: ra". 22Ngadqere: Yoshia wa gyekhe' nae" myid: phyid' to" ra". Yao: wa kho:kham Nekho nho: nhad' khyo" Mao"So ta" na: rure matae" gyo: ha: pye' ra". Aimung: yao: wa yao" gaung re geim kad' mung: Megido jao: gyu" mae" gyekhe' poe khyo ye" lo" ra".
23Gye khe' poe ayo, gyo: mae Egutu byu qenho: myo: jham: yang Yoshia re lozao" ra". Yao: wa yao" daui daui mo, re ngore jhui" phao: lo" la,- ngo dae xo sho' de; va"- ga: ta" ra". 24Yao: bam wa yao: re yao" gyekhe' myao: lhin" mae" dao: thug' yu mung: yao: jhui" ra" ai gyekhe' myao lhin" shid' lam" lam: mae dao: ke' yang: Yerusalem khyo jhui" lo ako". Yao: wa aimae shid: lo" mung:- Kho:kham lab mae yao: re nyhab' pye' ako". Yuda we' Yerusalem mung" byu qe alhab' wa yao: shid yang: kaug' ngug: ako".
25Lapa Yeremia wa Yoshia mathao mae kaug' ngug: rure ngag: thaug' ra". Israel mung" mae nghaui"caung: mo; qhid' mae" thung" li dalam: boe" lo: ra". Myiqe:- yauggai qe wa yao" mathao mae yao: bam kaug' ngug gelao" ce: nghaui" caung: re ci nae" ngad: ako". Ai: nghaui" caung: re ngug ji: jham re zhang: to" ra" nghaui" caung: paug' mae bo: ra".
26Yoshia kad' ra" mau" jham ngad: ra" yao: Asang re kao bau: ru- tarha" re phug' cao" ru jham ja: khao: ngo" we'- 27Yao" mhomyi: aqhid mae" athao" joe" sho' alhab' re Israel kho:kham qe we' Yuda kho:kham qe: mhomyi: paug' mae tung" xam" to" ako".
Currently Selected:
2 KHO:KHAM MHOMYI: 35: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
