2 KHO:KHAM MHOMYI: 21
21
1Yehoshaphad wa shid: lo" mung: Davi nho: vogaung: mae" kho:kham lab mae nyhab' pye' ako". Yao" yauggai zo: Yehoram wa yao" khu mae kho:kham xo' kad' ra".
Yuda Kho:kham Yehoram
(2 Kho:kham 8.17-24)
2Yuda kho:kham Yehoram nho: yauggai zo: Yehoshaphad wa Azaria- Yehie- Zekharia- Azariahu- Mikhae -Shephatia ga" ra" yao:nhaung: khyaug' yaug qo" ra". 3Yao: bam: yao pho" wa yao: bam re qhang- ngaui we' gatau phug' de; ra" jo,nho" myo: sho' re byid: mung: Yuda mung" mae" gyetab vogaung: dayaug re davo vo mae zug: kad' nhao: ra". Ngadqere: Yehoram wa zoqhid' ngad: ruyang Yehoshaphad wa yao: re yao" khu mae kho:kham xo' kad' nhao: ra". 4Yehoram wa mung"dan: re tang sho' bin: qo" zam" ci lao"- yao:nhaung: qe alhab' re we' Israel zug: qe daqhae: rere: se' pye' ra".
5Yehoram wa apyad sam xe: shid' zin re kho:kham boe" lo mung: Yerusalem mae she' zin eib: na: ra". 6Yao: wa kho:kham Ahab we' Israel kho:kham gatau qenho: makhyang" ra" ave, re cao" ra". Pe"mung:ga"re yao: wa Ahab nho: myiqe: zo: dayaug re lo, xo' yu: ra". Yao: wa Asang re qobo shad' lhoe" ra". 7Ngadqere: Asang wa Davi nho: kho:kham kaung re manug: phyo' pye' ngad: ra". Pe"mung:ga"re yao: wa Davi we' dao: thang" kad' to: mung: yao" myid:zo: qe wa khonhae" re: xo' yang eib: li" genae" ga: dao:so: byid' to: yang: ngad: ra".
8Yehoram eib: ra" ayo, gyo: mae Edom wa Yuda re geim lau to" mung: loe; beim: ra" mung"dan: boe" lo: ra". 9Airumung: Yehoram we' yao" gyezug: qe wa gyekhe' myao: lhin" jham we' daga" Edom khyo jhin" vao ye" lo" ako". Aimae Edom gyetab wa yao: bam re vang" ci: ako". Ngadqere: myi" re yao: bam phao: loe; lai: thug' lo" nae" khyo qo" kad' yu: ako". 10Ai: ayo, mae" Edom wa Yuda nho: loe; beim: ra" mung"dan: ngad: lo: ra" ce: ayo, mae yao: Libna vogaung: re: tau: lhan" ra". Pe"mung:ga"re Yehoram wa- yao" phug' pho" qenho: Mao"So Asang re shapye' pye' va" ruyang ngad: ra". 11Yao: wa Yuda bam mug: khaung: mae taung bug so re caung:pa" ra" jo, qo jham lhao" re: kad' mung: Yuda we' Yerusalem byu qere Asang re qobo shad' lhoe" nae" au: jhui" she: ra".
12Lapa Elia wa Yehoram re ceru: ga: vhin tung" dakhye' vhin: ke' ra". Aiwa ni" nho: phug' pho" Davi nho: Mao"So Asang wa nao re dao: phyid' ava". Pe"mung:ga"re nao wa ni" pho" kho:kham Yehoshaphad we' ni" phug' kho:kham Asa nho: ave, rere: macao" kad' yang: ngad: ra". 13Ai: atha"- nao wa Israel kho:kham qenho: ave, re cao" mung: Yuda we' Yerusalem byu qere alhab' we' yao" khu mae xo' kad' mo; yang Israel byu qere jhaug' mazaug: ru jhui" kad' ko" ru we' dakhyo: Mao"So re jhaug' mazaug kad' nhao: na: ako". Nao wa nao tho' je: gai mo, ngad ko" ra" ni" mao:nhaung qere lhao" re: se' pye' ra". 14Ai: mathao mae- Asang wa ni" byu qere ni" zo: dau qere- ni" yham sang myhi" qere- gyai thin sho' qobo dae byid: mung: ni" jo,nho" jham re phyo' pye' li" nae". 15Nao yao: re: daba we' daba je: xo: li" nae" ngad: ra" vae: dug: khai" no: rure kham zo" li" nae" ga" ru ngad: ra".
16Qid yae cao" yang: te" na: jo, ko" ra" Kusha byu qe: nhae mae Philisti we' Arab byu qe daqhae: na: jo; ako". Asang wa Yehoram re gye yezin: genae" qhid' mae" aibam re jhan" ke' ra". 17Yao: bam wa Yuda mung" khyo jhin" vao ye: mung: kho:kham kho" re ye lhad' yu yang: kho:kham pho" nho: zothao" yauggai zo: Ahazia mae" je yang: kho:kham myhi" qe- yauggai zo: alhab' re kyam: byu qekhyo" jhui" lo" byaug: ako".
18Ceru: boe" thao re Asang wa kho:kham pho" re vae: dug: khai" nho: ra" no boe" li" nhao: ra". 19Kho:kham pho" wa shid' zin ko- ai: no wa zo" zo" mae" je: xo: li" mung: dayin dayo: kham zo: mung: lo" thao" mae shid: lo" ra". Yao" phug' pho" qere kad' ru we' dakhyo:- yao: re kaug' ngug: rumae khyeim" mo" myi: mamad byid: ngad: ako".
20Yehoram wa apyad sam xe: shid' zin re kho:kham boe" lo mung: Yerusalem mae she' zin eib: na: ra". Yao: shid: au: khag' re: makaug' ngad: ako". Yao: bam wa yao: re Davi nho: vogaung: mae nyhab pye' ako". Ngadqere: kho:kham lab mae mangad: ngad: ra".
Currently Selected:
2 KHO:KHAM MHOMYI: 21: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
