1SAMUELA 9
9
Sholu Samuela We' Yeqhug' Ra" Khyo
1Benyamin amyu" kaung mae" jo,nho" qo" ru we' kheim: so' qo" ra" Kisha ga: mang: ra" byu dayaug na: ra". Yao: wa Zero nho: yao: myid:- Abie nho: yauggai zo: ngad mung: Aphia nho: kaung mae bo: ra" Becorad nho: yham khaung mae" ngad: ra". 2Yao: wa Sholu ga: mang mung: gyai yaung" ra" pho" qae yauggai zo: dayaug qo" ra". Sholu wa Israel yauggai gaje qe tho' au: ze sho' je: qhang: ru we' je: yaung" yaug ngad: ra".
3Kisha wa loze qo" yaug ngad mung: daqhae: byaug: lo" byaug: ra". Ailao" yao: wa Sholu re- daui daui mo, mae" dayaug re nao we' daga" khai: jhui: mung: ai: loze jham re yeqho ge,- ga: ta" ra". 4Yao: bam wa Ephrim bam mug: we' Shalisha mug: khaung: mae jao: sho' qho: ye" ako". Ngadqere: yao: bam aijham re maqhug' ko" ngad: ra". Aimung: yao: shid' yaug wa Shalim mug: khyo re: jao: sho' yeqho: ako". Ngadqere: loze jham re yao: bam maqhug' ko" ngad: ra". Ai: thao yao: shid' yaug wa Benyamin mug: myid khyo lai: phyid' ye" ako". Ngadqere: yao: bam aijham re maqhug' ngad: ako". 5Yao: shid' yaug wa Zupha mug: khyo joe" lo gemung: Sholu wa yao" daui daui yaug re- yham khyo dam: tug' phao: lo" lang:- mangad: re- nga" pho" wa loze jham: qhid' mae" myid: gaung: yug: rure thang: pye' mung: nga" shid' yaug re gaung yug yug nae"- ga: ta" ra".
6Daui daui yaug wa dahin wa,- ce: vogaung: mae yao: ta" ru ja: khao: ngo" dang yang: gyang" lho" ru we' su: yang gyai phug' ra" byu dayaug na: ra". Yao: jhao" ye: lang:- nga" shid' yaug loze jham re khai mae yeqho: qhug' nae" rure yao: nga" shid' yaug re ta" re qo" ta" kyo: maba -ga: ta" ra".
7Sholu wa nga" shid' yaug yao: jhao" ye" re- yao: re pe" qo" byid: nae" i? Nga" shid' yaug: thaung mae zo:ve re: madang lo:- yao: re byid: nae" pe" re: maqo" lo:- nga" shid' yaug pe" qo" i? ga: myid' ra".
8Ai: daui daui yaug wa ngo ngaui dakye' qo"- yao: re ngo ai qo" byid' ra". Yao: wa nga" shid' yaug re ai: jham re khai: mae yeqho: qhug' nae" rure ta" kyo" li" nae" ga: tau" ra".
9-11Sholu wa gai: ra"- sa" ye: lang: ga: phaug' tau" ra". Aimung: yao: shid' yaug wa ai: gyang" lho" yaug na: ra" vogaung: khyo ye" lo" ako". Yao: shid' yaug ai: vogaung: khyo bug gaung mae ye" lo" na ko" au:- yao: shid' yaug wa qid khae nae" thug' li" ko" ra" myiqe: nau" damyo" we' jho" qhug' ako". Yao: shid' yaug wa ai: myiqe: nau" qere- vogaung: mae myo, myao yaug na: ra" i? ga: myid' ako".
(Ai: apyad mae lapa re myo, myao myao yaug ga: mhang" ako". Aimung: byu dayaug yaug Mao"So re dao: myid: daja: myid: nug lao"- yao: wa myo, myao myao yaug jhao" ye gelang:- ga: lhaung" ta" ra".)
12-13Myiqe: nau" qe wa ngad:- yao: na: ra". Yao: wa naonhaung" qhid' au: mae ngad: ra". Ni" shid' yaug hin hin ye" lo" ko" re ni" shid' yaug yao: re myhi: li" genae". Ni" shid' yaug vogaung: khyo joe" we' yao: re yeqhug' li" genae". Vobyu qe wa bug gaung mae" phan mae xeim: ngaui" byid: genae" ngad yang: yao: wa ana" ba vogaung: khyo joe" li" ra" yao: re khai ko" ra" vobyu qe wa yao: aikhyo majoe" ye: ye: wa zo:ve mazo" qhid genae". Pe"mung:ga"re yao: wa ai: xeim: ngaui" re sao qhid' shaman" byid: ca" yang: ngad: ra". Ni" shid' yaug ana" ye" lo" ko" re yao: zo:ve zo: nae" bug gaung khyo mado, ye: shire yao: re yeqhug' li" genae" ga: tau" ako". 14Airumung: Sholu we' yao" daui daui yaug wa vogaung: khyo xo' ye" lo" ako". Yao: shid' yaug vao ye" lo" na ko" au: yao shid' yaug wa yao: shid' yaug shad' khyo qang yang: caung:pa" jo, qo khyo yao" gyaung: khyo mae thug' li" na: rure myao: ako".
15Sholu majoe" li" shire daba kyo yang: Asang wa Samuela re- 16Ne, mo" ba ce: ayo, mae Benyamin amyu" kaung mae" byu dayaug re ngo nao jhao" nhao: ke' nae". Nga" byumyu" re eib: ra" yaug khyo" yao: re xau gyad byid: wa,- yao: wa yao: bam re Philisti byu qe: lo, mae" khyad' yu: li" nae". Ngo wa nga" byumyu" qe dayin: dayo: kham zo" na: rure ngo the' myao va". Amung: bao" thaug' yu nae" qhid' mae" mho' yao: ra" yao: bam: thoe rere: ngo the' gyo: va"- ga: ta" ra". 17Samuela wa Sholu re the' myao lao"- Asang wa yao: re ngo nao re ta" ra" yaug wa ceyaug ngad: va". Yao: wa nga" byumyu" re eib: li" nae"- ga: ta" ra". 18Ai: thao Sholu wa kham: dung: nhae mae na: ra" Samuela jhao" ye" lo" mung:- myo, myao myao yaug khai: mae na: rure ngore ta" kyo: la,- ga: myid' ra".
19Samuela wa myo, myao myao yaug wa ngo ngad va"- caung:pa" ra" jo, qo khyo nga" qhid' au: mae ye" lo" ge,- ni" shid' yaug geim" ana" ba ngo we' daga" zo: shaug' zai ngad:- ne, kao ngo wa ni" shid' yaug: nho: dao: myid: jham alhab' re ngo phyid: kyo: nae". Amung: dam: nhao: ke' nae". 20Sam ba byaug: byaug vako" ra" loze jham: qhid' mae" pe" gaung yug dayug ge,- aijham re qho: qhug' gau va". Ngadqere: Israel amyu" byu qe gyai o: ko" ra" yaug khag' ngad: ra" i? aiyaug wa nao ngad: ra"- nao we' ni" pho" nho: yham khaung ngad: ra"- ga: tau" ra".
21Sholu wa ngo wa Israel amyu" kaung mae ngai: thao" ra" kaung ngad: ra" Benyamin kaung mae" ngad mung: nga" yham khaung wa amyu" kaung mae pe" maboe" thao" ra" yham khaung ngad:- aire nao ngore ceru: pe"mung: ta" i? ga: tau" ra".
22Ai: thao Samuela wa Sholu we' yao" daui daui yaug re qe, mo" qe, khyo jhui" vao: lo" mung: bang" vo qe sam xe yaug zaung: jo, ko" ra" Saboe" au: mae yao: shid' yaug re jo, qo byid' ra". 23Samuela wa vae: yhaung" yaug re nao re ngo gatau kho' to: nae" ta" to" ra" ngo byid' ra" ai: sho: dakhai" re cilo ri:- ga: ta" ra".
24Aimung: vae: yhaung" yaug wa gai: thao" ra" paung sho: khai" re cilo mung:- aire Sholu qhid' kheim: mae lo to: byid' ra". Samuela wa qu" wa, ni" qhid' mae" jaung: to" ra" sho: khai" ce ngad: ra". Zo: wa,- ce: ayo, mae ngo khai: to" ra" mo, we' daga" zo: nae" qhid' mae" ai: re ni" qhid' mae" ngo jaung: to: va"- ga: ta" ra". Aimung: Sholu wa ai ba mae Samuela we' daga" zo: shaug' ra".
25Yao: bam ai: caung:pa" ra" jo, qo mae" vogaung: khyo joe" gyo" lo" gelao"- yao: bam wa khaung dao mae Sholu qhid' mae" yab jaung: dalam: kad' byid: gemung:- yao: wa aimae yab: ra".
Kho:kham Khyo" Samuela Sholu Re Xau Gyad Byid' Ra" Khyo
26Mug: bo" qid re khaung dao mae Sholu re to" wa,- ngo nao re nhao: ke' naeva"- ga: yao: ra". Sholu to" mung: yao: we' Samuela wa hau" mo" khyo khyo daga" thug' ye" lo" ako". 27Yao: bam wa vogaung: athao khyo joe" ye: gelao"- Samuela wa Sholu re daui daui yaug re nga" shid' yaug: qhid' khyo ye" lo" nae" ta" wa,- ga: ta" ra". Daui daui yaug ye" lo" byaug lao"- Samuela wa xo' mung: cemae dazab na shi: wa,- Mao"So ta" to" rure ngo nao re ta" kyo: li"- ga: ta" ra".
Currently Selected:
1SAMUELA 9: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
