1SAMUELA 31
31
Sholu We' Yao" Yauggai Zo: Qe Shid Ko" Ra" Khyo
(1 Kho:kham mhomyi: 10.1-12)
1Philisti byu qe wa Gelboa bam dao mae gye jho" khe' ako". Aimae Israel byu qe myo: sho' se' pye' qhug' ako". Sholu kho:kham we' yao" yauggai zo: bobo yang: dang: ra" gu: wa phao: lo" ako". 2Ngadqere: Philisti byu qe wa yao: bam re cao" myhi mung: Sholu nho: yauggai zo: qe ngad ko" ra" Yonathan- Abinadab- Malkhishua bam re se' pye' ako". 3Gyekhe' poe wa Sholu lhang" gam: mae gyai thin: ra". Gyevo qe: myo: wa yao: re zao" mung: xo sho' dae de; ra". 4Yao: wa yao" shae lhae ci byid' ra" zolau: pho" re ce: Mao"So re malam" ra" Philisti byu qe ngore qu" zhaug' to: yang ngore mali" se' pye' genae" qhid' mae" ni" shae phoe' yu yang: ngore se' pye' la,- ga: ta" ra". Ngadqere: ai zolau pho" wa airu: kad' nae" gyai gyaug: ra". Ailao" Sholu wa yao" shae pyang: phoe' yu yang aimae yao: yao" gaung re thug' kyao" shid: ra". Ai: zolau: pho" wa Sholu shid va" rure myao: ra". 5Ailao" yao: re yao" shae pyang mae yao: yao: thug' kyo" yu yang: Sholu we' daga" shid: jo; ra". 6Airu wa Sholu- yao" yauggai zo: sam yaug- zolau pho" bam khoru: shid lo" ra" khyo ngad: ra". Sholu nho: byu alhab' ai ba mae shid: ako". 7Yezre lao: khaung: gatau thoete' mae na ko" ra" Israel byu qe we' Yodan gyaung: ba thug' shad' mae na ko" ra" Israel byu qe wa Israel gyezo: qe phao: lo" byaug mung: Sholu we' yao" yauggai zo: qe se' pye' qhug' vako" ra" khyo re the' gyo: gelao"- yao: bam: vogaung: jham re to: co' yang phao byaug: ako". Ai: thao Philisti byu qe joe" li" mung: ai: vogaung: jham re li" sang: pye' ako".
8Philisti byu qe wa gye poe thao: ba mae mao gaung jham mae" lanyab yeyu nae" ye" lo" ako". Yao: bam wa Sholu nho: mao gaung we' yao" yauggai zo: sam yaug: nho: mao gaung jham Gilboa bam dao mae lang" jo; rure yemyao: ako". 9Yao: bam wa Sholu nho: au: re qam" phyid' mung: yao" gyebau: re khyad' yu yang:- yao: bam: so alho jham re we' yao: bam byu qere lau dao: gai ta" kyo: nae" qhid' mae" aijham re Philisti mung" geim" khyo jao: sho' lagyo: jham we' daga" nhao: ke' ako". 10Ai: thao yao: bam wa yao" shae lhae jham re so myhi" Astared phan yham mae ke' to: mung: yao" mao gaung re wa Bed Shan vomo" mae" vang mae jin" te' to" ako".
11Gilead mung" mae" Yabe vobyu qe wa Philisti byu qe Sholu re khoru: kad' ko" ra" khyo re the' gyo: gelao"- 12Lhe" thao" byu qe to" mung: Bed Shan khyo myikhyeim su" ye" lo" ako". Yao: wa Sholu we' yao" yauggai zo: qe: mao gaung jham re vang khinqae mae" khyo" yu mung:- aijham re Yabe khyo dao: lo yang: aimae longha" pye' ako". 13Ai: thao yao: bam wa shoqug: jham re yu: yu yang: vogaung: khug mae" zai gae qao: mae nyhab' pye' ako". Nhad' ba lam: lam: zo:ve jao" ako".
Currently Selected:
1SAMUELA 31: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
