1SAMUELA 27
27
Davi Philisti Byu Qe: Phaung Mae Na: Ru
1Davi wa yao: yao: za:- daba ba mae wa Sholu ngore li" se' li" nae"- nga" qhid' mae" gai: thao" ru wa Philisti mung" khyo phao: loe; ye: nae" ru ngad: ra". Ailao" Sholu wa Israel mung" mae ngore qho: ra" khyo re thang: pye' nae". Ailao" ngo wa gug: gam: li" nae"- ga: myid: na: ra". 2Airumung: Davi we' yao" byu khyaug' yo yaug wa Gat kho:kham Maokha nho: yauggai zo: Akhisha jhao" dalhang dam: de; ye" ra". 3Davi we' yao" byu qe wa Gat vogaung: mae yao: bam: yham khaung we' daga" ye joe" na: ako". Davi wa Yezre mae" Ahinoam Khame mae" Naba nho: cug' mo" Abigai yao" yham sang myhi" shid' yaug we' daga" yena: ra". 4Davi Gat khyo phao: lo" byaug: rure Sholu gyo: lao"- yao: re qho: ru thang: pye' ra".
5Davi wa Akhisha re nao nga" ba nam ngad: re wa ngo na nae" vogaung: ngai dalam: byid: la,- kho:kham pho" we"- vomo" khug mae nao we' daga" na nae" nga" qhid' mae" maca"- ga: ta" ra". 6Aimung: Akhisha wa yao: re Ziglag vogaung: byid' ra". Ce: mathao mae aimae" Ziglag vogaung: wa Yuda kho:kham qe sang: ako". 7Davi wa Philisti mug: mae dazin: lho" byid khye' yena: ra".
8Ai: ayo, gyo: mae Davi we' yao" byu qe wa Geshu- Girazi- Amaleg byu qere gye lhaung" ye khe' ako". Aibam wa ai: mang: mae gyai myao" mae" na: jo, mo, ngad: ako". Yao: wa Shura joe" sho'- Egutu khyo ye" ra" khyo cao" yang: ai bam: mung" re lhaung" ye khe' zin" ako". 9Yauggai myiqe: alhab' re se' pye' mung:- yao- nung:- loze- gola:u jham re we' mai bau: jham re lhao" re: lhad' yu: ako". Ai: thao yao: wa Akhisha jhao" lhaung" tug' lo: ra". 10Akhisha wa- ana" lhang nao khai mae yekhe' zin" i? ga: lhaung" myid: mung:- Davi wa Yuda mung" mug: thao shad' khyo mangad: lhao"- Yerahme amyu" kaung qe: mug: myid mangad: lhao"- Kenid byu qe na ko" ra" mug myid shad' khyo yekhe' ga: yao: re lhaung" ta" ra". 11Yao: we' yao" byu qe gaigai: yao: kad' va" khyo re Gat khyo dayaug re: maqo" lo" ta" kyo: gesho'- Davi wa- myiqe: yauggai kho: ngo" re lhaung" se' pye' ra". Ceru wa Philisti mung" mae na: ra" ayo, geim" mae Davi kad' ra" khyo ngad: ra". 12Ngadqere: Akhisha wa Davi re lam mung:- yao: yao: za:- yao: wa yao: yao" byumyu" Israel qeyang gyai nghang" pye' ru qhug' ra"- yao: wa ngore yao" apyad geim" caung da" byid: ca" nae"- ga: yao" myid mae ta" na: ra".
Currently Selected:
1SAMUELA 27: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
