1SAMUELA 14
14
Yonathan Nho: Mazag Mavae: Lo, Mau"
1Daba mae Yonathan wa yao" shae lhae ci byid' ra" zolau pho" re- Philisti jamu khyo lai: phyid' ye: lang:- ga: ta" ra". 2Ngadqere: Gibea mae" mataung" va" ra" Migron mae" Khaung: shi: gae qao: mae jamu kad' na: ra" yao: pho" Sholu re mata" kyo: ngad: ra". Yao: wa yao: we' daga" byu khyaug' yo ko daga" ngad: ako". 3(Khinjaung bau: lo,kao: ci: ra" khinjaung pho" wa Shilo mae" Asang: khinjaung Eli nho: yao: myid:- Phineha nho: yauggai zo: Ahitub nho: yao: nhaung: Ikhabod nho: yauggai zo: Ahiya ngad: ra".) Yonathan to" lo" byaug: rure byu qe maba ngad: ako".
4Yonathan Philisti jamu khyo lai: phyid' ye" ra" bam gyo: mae laug baui ceim shid' lam: jo; ra". Bam gyo: dashad' mae dabaui baui jo; ra". Dabaui re Boze ga: mhang" mung:- gatau dabaui re wa Sene ga: mhang" ako". 5Dabaui wa bam gyo: mug: am: shad' Mikhma shad' khyo myo, khung: qang: jo, mung: gatau dabaui wa mug: thao shad' mae Geba shad' khyo myo, khung: qang: jo; ra".
6Yonathan wa zolau: re- thoe: Mao"So re malam ko" ra" Philisti byu qenho: jamu khyo lai: phyid' ye: lang:- Asang ngonhaung" re bao" re bao" thaug' byid' li" maba- yao: bao" byid' re wa ngonhaung" khonho" malaug ngadqere: ngonhaung" re aung doe; ru byid: nae" rure pe" yang re: maqo" tam" to: ngad: ra"- ga: ta" ra".
7Zolau: pho" wa nao pe" kad' nug: re kad'- ngo wa nao we' daga" ngad: ga" ta" ra".
8Yonathan wa gai va"- nga" shid' yaug lai: phyid' ye: mung: Philisti byu qere yena: qhu" lang:- 9Yao: bam wa nga" shid' yaug jhao" li" nae" yao: bam re lao" gela, ga: nga" shid' yaug re ta" ko" re wa nga" shid' yaug na: ra" jo, qo mae na: jo, nae" ngad: ra". 10Ngadqere: yao: bam jhao" ye: nae" nga" shid' yaug re ta" ko" re wa nga" shid' yaug ye: nae" ngad: ra". Pe"mung:ga"re ai wa Asang: yang yao: bam: dao mae aung doe; pye' ru ngonhaung" re byid: va" khyo aso: ngad: ra"- ga: ta" ra".
11Aimung: yao: shid' yaug wa Philisti byu qere yena: qhu" ako". Ailao" Philisti byu qe wa- qu" ge,- Hebre byu qe daqhae: wa yao: bam vho' na ko" ra" dungkhung: jham mae" thug' li" na: ako"- ga: ta" ako". 12Ai: thao yao: bam wa Yonathan we' zolau pho" re cekhyo li" geri:- ngonhaung" ni" shid' yaug re ta" kyo: nae" daja: qo" ra" ga: khai: ke' ako". Yonathan wa ai: zolau: pho" re nga" thao cao" wa,- Asang wa yao: bam re aung doe; pye' nae" ru Israel byu qere byid' ava"- ga: ta" ra". 13Yonathan wa bam gyo: mae" lo, du: du" thug' lo" ra". Zolau: pho" wa yao" thao cao" ra". Yonathan wa Philisti byu qere gye zin: mung: yao: bam re zin" lhang" pye' ra". Zolau: pho" re: yao: bam re se' pye' ra". 14Yonathan we' zolau: pho" wa sao qhid' se' rumae yo dakhyao: ko za: bo: ra" myid gaung mae" byu shid' xe yaug ko re se' pye' ako". 15Seyo: vogaung: mae na ko" ra" mo, alhab' mo, gyaung: ako". Yelhe: mo, we' jamu mae na ko" ra" gyezo: qe wa ko, ko, gyaug: nin" ako". Myid gaung lap li" mung: aimae qi: sho' gyaug: pye' ako".
Philisti Byu Qe Gye Seim" Ko" Ra" Khyo
16Benyamin mug: myid mae" Gibea mae lhaug' qu" na ko" ra" Sholu byu qe wa Philisti byu qe atug' akhyug' tao" lhau ko" rure myao: ako". 17Aimung: Sholu wa yao" byu qere gyezo: qere nghe' qu" ge,- khoyaug byaug: jo; rure qho ge,- ga: ta" ra". Yao: bam airu: kad' ako". Yonathan we' yao" shae lhae ci byid' ra" zolau: pho" byaug: jo; rure myao: ako". 18Sholu wa khinjaung pho" Ahiya re ai: khinjaung bau: lo, kao: cekhyo yu: lo ri:- ga: ta" ra". (Ai: ba mae Ahiya wa aire Israel byu qe: qhid' au: mae vo; ci: ra".) 19Sholu khinjaung Pho" re dao: jhau: na: au: Philisti byu qe: jamu mae mo,thaui: mo,yaug mung: ru je: xo: li" ra". Aimung: Sholu wa Ahiya re Asang we' jho" qham nae" ayo, maqo" lhe"- ga: ta" ra". 20Ai: thao yao: we' yao" byu qe wa mo, thaui: mo, yaug boe" mung: yao: cao: jho" zin" na ko" ra" Philisti byu qere gyekhe' nae" qhid' mae" gyekhe' poe khyo ye" lo" ako". 21Philisti shad' mae bobo mung: yao: bam we' jamu khyo daga" yena va" mo, Hebre byu daqhae: wa dam: phaug' lo mung: Sholu we' Yonathan shad' khyo bode; lo: ako". 22Ephrim bam mug: mae vho' na: jo, ko" ra" mo, gatau qe wa Philisti byu qe tao" phao: lo" na ko" ra" khyo re the' gyo" ako". Ailao" yao: bam re: ye bobo mung: Philisti byu qere- 23Bedaven lai sho' khyo thao" qang" ye khe' zin" ako". Asang wa ai: ba mae Israel byu qere khyad' yu: ra".
Gye Khe' Poe Bin Thao Boe" Ra" Khyo Jham
24Israel byu qe wa ai ba mae vae: moe; yang pyaung" pyaung" mung: ako". Pe"mung:ga"re- Sholu wa- nga" gyevo qere ngo lage, mabin: phaug' shire zo:ve daja: ja: zo" ra" yaug: dao mae nhang: kheim: zao" vashao: ga: dao:so: to: mung: amyin" byid' to" ra". Airumung: daba geim" khag' re: pe" mazo: ngad: ako". 25-26Yao: bam alhab' mo; sag' gae yaug: ra" jo, qo khyo joe" lo mung: khyi" khao: ngo" mae byoyhid jo; rure lomyao: ako". Sag gae jham mae byoyhid cin cin ngad: ra". Ngadqere: khag' re: aire dajhid' re: mazo: ko" ngad: ra". Pe"mung:ga"re yao: bam alhab' mo, Sholu nho: nhang: kheim: re gyaug: ako". 27Ngadqere: Yonathan wa yao: pho" yang amyu" byu qere nhang: kheim: ke' yang: kyaug' nhin" ra" khyo re mathe' gyo: ngad: ra". Aimung: yao: wa yao: ci: ra" vose: yheim" ke' mung: byoyhid kye' re thug' jam: yu mung: byoyhid dajhid' re zo" ra". 28Yao: bam mae" byu dayaug wa ngonhaung" alhab' wa vae: moe; yang: pyaung" pyaung" mung: na: bam:- ngadqere: ni" pho" wa ngonhaung" re kyaug' nhin" mung:- ana" ba zo:ve daja: ja: zo" ra" yaug khag' ngadqere: nhang: kheim: zao" vashao: ga: ta" ra"- ga: ta" ra".
29Yonathan wa nga" pho" wa ngonhaung" byumyu" qe: dao mae qu" gyaug qu" lhaung sho' ra" mau" kad' vanhaung- ngo ce: byoyhid dajhid' re zo: yang: khoqhi" sho' je: qam: qo" rure qu" ge,. 30Ngonhaung" amyu" byu qe wa yao: bam: gyevo qere aung: pye' au:- yao: bam qo" yu: ra" zo:ve re zo: geyang: ngad: re- ana" ba khoqhi" sho' je: qam: qo" genae" i? Yao: bam Philisti byu qere khonho" je: myo: sho' qo" se' pye' genae" rure myid: qu" ge,- ga: ta" ra".
31Ai: ba mae Israel byu qe wa Philisti byu qere aung: pye' ako". Mikhma mae" Aiyalon joe" ra" khyo thao" qang" khe' zin" ako". Ce: ayo, mae Israel byu qe wa vae: moe; yang: pyaung" pyaung" mung: ako". 32Aimung: gyevo mae" yao: bam qo" taung" yu: ra" yao- nung: jham khyo tao" ye: mung:- aimae yao: aijham re se' mung: sa: bo: jo, shi" au: ai: sho: jham re zo" ako". 33Qu" wa,- amyu" byu qe wa sa: bo: jo; shi" au: sho: re zo" ko" ra" khyo" Asang re qobo shad' lhoe" na: ako" ga: Sholu re lota" kyo" ako". Sholu wa- naonhaung" wa dao:so: mazaung mo, ngad: ako". Laug zang qi dazang cekhyo ngojhao" deim" lhang" lo geri:- ga: zag: hug' ra". 34Aimung: yao: wa- amyu" byu qe: phaung khyo ye: mung: yao: bam: nung: jham- yao jham re cekhyo alhab' she: li" ge, ein: yao: bam re yeta" ge,. Yao: bam wa aijham re se' mung: cemae zo: genae" ngad: ra". Yao: bam wa sa: bo: jo, shi" au: sho: jham re zo" ra" khyo" Asang re qobo magai: shad' lhoe" ngad: ako" ga: amyin" gatau dalam: re byid' ke' ra". Aimung: ai: myi mae- yao: bam: nung: jham alhab' re yao: bam she: li" mung: aijham re aimae se' ako". 35Sholu wa Asang: qhid' mae" phan dalam: re kad' ra". Aiwa yao: kad' ra" phan sao qhid' ein: lam: ngad: ra".
36Sholu wa yao" byu qere gyo" ye: mung: Philisti byu qere myi" re yezin: mung: mug: bo" qid joe" sho' ye phyo' yang: yao: bam alhab' re yese' pye' gelang:- ga: ta" ra".
Yao: bam wa nao gai thao" khyo" pe" myid myid kad' wa,- ga: tau" ako".
Ngadqere: khinjaung pho" wa Mao"So we' shi" sao qhid' jho" qham gelang:- ga: ta" ra".
37Aimung: Sholu wa Mao"So re- ngo Philisti byu qere mang: yezin: nae" i? Nao ngonhaung" re aung doe; nhao nae" i? ga: myid' ra". Ngadqere: Mao"So wa ai ba mae dao: phyid matau: byid: ngad: ra". 38Ailao" Sholu wa amyu" byu au: jhaung qere cekhyo li" mung: ana" ba pe" qobo shad' lhoe" rure li" qho: qu" ge,. 39Qobo qo" yaug wa se' pye' ru qhug' nae"- yao: wa nga" yauggai zo: Yonathan ngad: re- lhao" re se' pye' qhug' byid: mung: kao so' daui: na: ra" Asang: mang re lao: yang: ngo dao:so: to" ra"- ga: ta" ra". Ngadqere: khag' re: pe" mata" ngad: ako". 40Ailao" Sholu wa yao: bam re naonhaung" alhab' thoe tau mae ye; jo, ge,- Yonathan we' ngo wa cemae ye; jo, nae"- ga: ta" ra".
Yao: bam wa nao gai: thao" khyo" myid myid kad' wa,- ga: tau" ako".
41Sholu wa Asang re- Israel nho: Mao"So Asang- Asang we"- nao ana" ba pe"mung: ngore dao: phyid matau: byid: i? Israel nho: Mao"So Asang we" gyang" lho" ra" laug baui jham khyo" ngore dao: phyid tau: byid: la,- qobo wa Yonathan nho: mangad: lao" nga" qobo ngad: re wa Urim khyo" dao: phyid tau: byid: la,-ngadqere: ai: qobo wa Israel byu qenho: ngad: re wa Thummim khyo" dao: phyid tau: byid: la,- Dao: phyid wa Yonathan we' Sholu re ceim" shid' to" ra". Amyu" byu qe wa sho' sho' za: ngad: ako". 42-43Ailao" Sholu wa- ngo we' nga" zo" agyo: mae dao: kho' byid: la,- ga: ta" ra". Aiwa Yonathan re ceim" shid' ra". Aimung: Sholu wa Yonathan re nao pe" kad' va" i? ga: myid' ra". Yonathan wa ngo ci: ra" vose: mae de; ra" byoyhid dajhid' re zo: va"- ngo cemae na:- ngo wa shid nae" jin" jin" ngad:- ga: tau" ra".
44Sholu wa yao: re nao se' pye' maqhug' re wa Mao"So wa ngore se' pye' vashao:- ga: ta" ra".
45Ngadqere: amyu" byu qe wa Sholu re- Israel byu qe: qhid' mae" ce: qi" qhang: ra" aung doe; rure boe" nhao: ra" yaug Yonathan wa se' pye' ru qhug' zai i? mangad:- yao" au: mae" xae dakhe' lhao" re: mabyaug nae" ein: kao so' daui: na: ra" Asang: mang re lao: yang: ngonhaung" dao:so: to" ra". Ana" ba yao: kad' ru wa Mao"So: yang bao" thaug' byid: yang: kad' ru ngad: ra"- ga: ta" ako". Aimung: amyu" byu qe wa Yonathan re se' pye' qhug' nae" rumae" khyad' yu: ako".
46Ai: thao Sholu wa Philisti byu qere cao" khe' zin" rure thang: pye' mung: yao: bam wa yao: yao" mug: myid khyo phao: lo" ako".
Sholu Eib: Ru We' Yao" Yham Khaung
47Sholu Israel kho:kham boe" thao khyi" khao: ngo" mae" yao" gyevo qe alhab' re mang: zin" ra". Aibam wa- Moba byu- Amon byu- Edom byu- Zoba kho:kham- Philisti byu qe ngad: ako". Yao: mang: khoru: zin: zin: aung: ra". 48Yao: wa gyai lhe: yang: mang: zin" ra" Amaleg byu qere lhao" re: aung: pye' ra". Yao: wa Israel byu qere gyekhe' ru alhab' mae" khyad' yu: ra".
49Sholu nho: yauggai zo: qe wa Yonathan- Ishvi we' Malkhishua bam ngad: ako". Yao" zoqhid' myiqe: zo: wa Merab ngad mung: angai yaug wa Mikha ngad: ra". 50Yao" yham sang myhi" wa Ahima nho: myiqe: zo: Ahinoam ngad: ra". Yao" gyezug: pho" wa yao" yao: gan Nera nho: yauggai zo: Abne ngad: ra". 51Sholu nho: yao: pho" Kisha we' Abne nho: yao: pho" Nera wa Abie nho: yauggai zo: tao ngad: ako".
52Yao: daui: na: ra" myhao"- Sholu wa Philisti byu qere gyai thin: ra" khyo" mang: zin" ra". Airumung: qam: bo: ru we' vae" ra" yaug re yao: myao: khao: ngo" yao: re yao" gyetab mae mang ke' yu: ra".
Currently Selected:
1SAMUELA 14: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
