1 KHO:KHAM 6

Sholamon Caung:pa" Yham Kad' Ra" Khyo

1Israel byu qe Egutu mung" mae" phao: thug' lo" gethao byid yo: she' xe zin myao" thao- Israel mung" mae Sholamon eib: ru byid zin ein: zin lho" shid' khye' ein: khye' ngad: ra" Ziva lho" khye' gyo: mae Sholamon wa Caung:pa" Yham re kad' qhid: ra". 2Aiwa qhang phyao: khyaug' xe daung"- lu phyao: shid' xe daung"- Myhao phyao:- sam xe daung" bo: ra". 3Jao: kheim: qe, wa daxe daung" myhao mung: lu phyao: ai: yham qhi" yao: shid' xe daung" bo: ra". 4Caung:pa" Yham khinqae abung" te' to" ako". Aiwa taung gaung shad' wa akhug shad' tho' je: jhe' ra". 5Caung:pa" Yham: nho: taung gaung shad' khinqae tau" te'- ayae shad' nhaung thao" shad' mae dapyae re ngo" daung" daung" myhao: ra" qe, pyae kad' to" ra". 6Nyam: thao" ra" qe, pyae jham wa lu phyao: ngo" daung" bo: ra". Agaung: mae" qe, pyae wa lu phyao: khyaug' daung" bo: mung:- myhao: thao" ra" qe, pyae wa lu phyao: nhad' daung" bo: ra". Dangbad jham mabo lo: qe, jham khinqae mae qo" kai" to: nae" qhid' mae" Caung:pa" Yham khinqae wa o: kai tho' tho' kai re je: po: yang: kad' ra".

7Caung:pa" Yham kad' na: ra" au:- dau be, thoe- vozaung: thoe- gatau jo,to' zai pe" ja" yang re: thoe mazai" thug' nae" qhid' mae Caung:pa" Yham kad' ra" laug bam jham re phyid' kho' to" ra".

8Nyam: thao" qe, khyo vao ye" ra" kham: dung: wa Caung:pa" Yham nho: mug: thao shad' mae ngad mung: shid' pyae ein: pyae we' sam pyae: ein: pyae khyo do, ye" ra" zam thao de; ra". 9Airu:- kho:kham Sholamon wa Caung:pa" Yham re kad' pin" ra". Yao: wa au: tho' akyo re shaug' the" yang dang bad we' atho' qe, kyo re kad' to" ra". 10Ai: qe, sam pyae wa dapyae ngo" daung" daung" myhao mung:- aire Caung:pa" Yham taung gaung shad' mae" khinqae jham re ngha yang: kad' to" ra". Shaug' dang bad jham: yang aijham re xo' to" ra".

11 Asang wa Sholamon re- 12Nao nga" tarha" we' nga" amyin" dao: jham alhab' re phug' cao" ngad: re- ni" pho" Davi re ngo dao:so: byid' to" rure ngo kad' nae". 13Ngo wa nao kad' to" ra" ce" Caung:pa" Yham mae- nga" byumyu" Israel byumyu" qe: phaung gaung: mae ngo na: jo, nae". Ngo wa yao: bam re khonhae" re: mashapye' nae"- ga: ta" ra".

14Airu:- Sholamon wa Caung:pa" Yham re kad' pin" ra".

Caung:pa" Yham Akhug Shad' Re Nyhang" Shaung: Ra" Khyo

(2 kho:kham mhomyi: 3.8-14)

15Akhug shad' khinqae re phyao: gaung mae" au: tho' akyo joe" sho' shaug' the" yang thab' nghoe' to: mung: myid myhung: wa qhoje; sag' the: ngad: ra". 16Gyang" lho" thao" qe, ga: mhang" ra" qe, akhug shad' mae" qe, re Caung:pa" Yham- yham thaung: shad' khyo kad' to" ra". Aiwa qhang phyao: shid' xe daung" bo mung: shaug' the" yang phyao: gaung mae" myo, kyo joe" sho' akyo qae: to" ra". 17Gyang" lho" thao" ra" qe; nho: qhid' au: mae wa qhang phyao: byid xe daung" bo: ra". 18Shaug' the: jham re am baung: lho we' bin: lho jham re kyaung" tung" mung: lamyhung shaung: te' to" ako". Khinqae laug baui jham mathe' myao nae" qhid' mae" akhug shad' alhab' re shaug' the" yang thab' to" ra".

19 Asang: Dao: Thang" Ban" to: nae" qhid' mae" Caung:pa" Yham- yham thaung: shad' mae yham khug shad' khyo qe, daqe, kad' ra". 20Ce: akhug qe, wa qhang phyao: shid' xe daung"- lu phyao: shid' xe daung"- myhao phyao: shid' xe daung" bo mung:- alhab' re qhang gyang" yang thab' to" ra". Phan re wa shaug' the" yang thab' ra". 21Caung:pa" Yham akhug shad' re qhang: yang thab' to: mung: akhug qe, mae" kham: re qhang jao jham taui" khao" to" ra". Ai rere: qhang: yang lham" to" ra". 22Caung:pa" Yham akhug shad' alhab' re we' Gyang" Lho" thao" jo, qo mae jo; ra" phan rere: qhang: yang lham" to" ra".

23Kherubin shid' dau: re zhanlun sag' yang kad' mung: gyang" lho" thao" ra" jo, qo mae to" to" ra". Dadau re daxe daung" myhao: ra". 24-26Shid' dau" geim" daqi" za:- akhyao daja: za: ngad: ako". Dau: khao: ngo" daung shid' daung de, mung: daung dashad' athao mae" gatau dashad' athao joe" sho' daxe daung"- bo nae" qhid' mae" daung lam: khao: ngo" ngo" daung" daung" qhang: ako". 27Qe, agaung: mae dau: khao: ngo" nho: daung dashad' shad' jho" tin: mung: gatau dashad' shad' wa khinqae mae tin" to: nae" qhid' mae" ai shid' dau: re gyang" lho" thao" jo, qo mae dashad' mae dadau: dau: to" to" ako". 28Ai: kherubin shid' dau" geim" re qhang: yang lham" to" ra".

29Qe, mo" qe, we' akhug qe, khinqae jham mae kherubin lho jham- laso' gae lho jham bin: lho jham kyaung" tung" te' mung: lamyhung shaung: te' to" ra". 30Phyao: gaung re lhao" re: qhang: yang lham" to" ra".

31Gyang" lho" thao" ra" jo, qo kham: dung: mae zhanlun the" yang kad' ra" kham: zam" te' to" ra". Au: tho' kham: baung wa akhung" mung: ru ngad: ra". 32Kham: jham re kherubin lho- laso' gae lho- bin: lho jham kyaung" tung" te' mung: lamyhung shaung: te' to" ra" kham: jham kherubin lho jham- laso' gae lho jham- bin: lho jham re qhang: yang lham" to" ra". 33Qe, mo" qe; kham: qhid' mae" zhanlun the" yang: kad' ra" byid khyug vang" kham: baung kad' ra". 34Qhoje; the" yang shid' kan gai: kan: ra" kham: kad' mung:- 35Aire kherubin lho- laso' gae lho- bin: lho jham kyaung" tung" te' mung: lamyhung shaung: te' to" ra". Aijham re qhang: yang jhad' jhad' mung: thab' to" ra".

36Akhug vang" re Caung:pa" Yham: qhid' au: mae kad' to: mung: laug baui sam zhao" dao mae shaug' dang bad dakhe' khe' ke' mung: khinqae mae kad' nghoe' to" ra".

37Caung:pa" Yham apan aqao: re Sholamon eib: ru byid zin ein: zin- lho" shid' khye' ein: khye' ngad: ra" Ziva lho" khye' mae zhaug' qhid: ra". 38Sholamon eib: ru daxe: dazin ein: zin- lho" she' khye' ein: khye' ngad: ra" Bu lho" khye' mae yaung: to" ru we' dakhyo:- tab za: Caung:pa" Yham re bin: kad' pye' ra". Sholamon wa aire nhad' zin kad' ra".

Currently Selected:

1 KHO:KHAM 6: LHCL

Highlight

Copy

Compare