1 KHO:KHAM 4
4
Sholamon Nho: Zug: Qe
1Sholamon wa Israel mung" geim" nho: kho:kham ngad: ra". 2Aimung: cebam wa yao" aya: myhao: ra" zug: qe ngad: ako".
Khinjaung wa Zadog nho: yauggai zo: Azaria ngad: ra".
3Shisha nho: yauggai zo: tao ngad: ko" ra" Elihoreb we' Ahiya wa jare" ngad: ako".
Tung" xam: au: jhaung wa Ahilu nho: yauggai zo: Yehoshaphad ngad: ra".
4Yehoiada nho: yauggai zo: Benaia wa gyezug: mo"-
Zadog we' Abiatha shid' yaug wa khinjaung-
5Nathan nho: yauggai zo: Azaria wa mung"dan zug: au: jhaung-
Nathan nho: yauggai zo: khinjaung Zabud wa kho:kham kho" pha,jhi" byid: yaug-
6Ahisha wa kho:kham kho" mae" daui daui au: jhaung-
Abda nho: yauggai zo: Adoniram wa mau" zaui: au: jhaung ngad: ako".
7Sholamon wa byu daxe: shid' yaug re Israel mung" mae" mang: zug: qekhyo" san: to" ra". Yao: bam wa kho:kham we' yao" kho:kham kho" qhid' mae" zo:ve re dazin re lho" dakhye' khye' qo yu yang: yao: bam: mang: mae" dai" byid: genae" qhid' mae" san: to" ra". 8Ce: zug: daxe: shid' yaug: mang re yao: bam zug: kad' ra" mung"dan: jham wa o mae tung" to" ru we' dakhyo: ngad: ra".
Ai bam wa- Ephrim bam mug: mae" mang: zug: Benhu.
9Makaza- Shalbin- Bed Sheme- Elon- Bed Hanan vogaung: jham re eib: ra" mang: zug: Bendeke-
10Arubod we' Sokho- vogaung: Hephera mug: alhab' re eib: ra" mung" zug: Benhese
11Do khaung: geim" re eib: ra" mang: zug: Benabinadab- yao: wa Sholamon nho: myiqe: zo: taphad re lo,xo' yu yaug ngad:-
12Tanag- Megido vogaung: jham we' Bed Shan nhae khaung: geim"- Zarethan vogaung: nhae- Yezre vogaung: mug: thao shad'- Abela Mehola we' Yokmeam vogaung: joe" sho' mug: myid re eib: ra" mung" zug: Ahilu nho: yauggai zo: ba na-
13Gilead mung" mae" Ramod vogaung:- Manashe kaung mae" myid:zo: dayaug ngad: ra" Yaira yham khaung qe sang: ra" Gilead mae" seyo: vogaung: jham- Bashan mung" mae" Argob mang: vang we' gyid: kham kyao" de; ra" vogaung: qi: khyaug' xe re eib: ra" mung" zug: Bengebe
14Mahanaim mung" re eib: ra" mung" zug:- Ido nho: yauggai zo: Ahinadab-
15Nabhtali mung" re eib: ra" mung" zug: Ahima yao: wa- Sholamon nho: myiqe: zo: gatau gayaug ngad: ra". Basemad re lo,xo' yu yaug ngad: ra".
16Ashe we' Bealod vogaung: re eib: ra" mung" zug: Hushai nho: yauggai zo: Ba na-
17Isakha mang: re eib: ra" mung" zug: Parua nho: yauggai zo: Yehoshaphad-
18Benyamin mang: re eib: ra" mung" zug: Ele nho: yauggai zo: Shimi.
19Amori kho:kham Sihon we' Bashan kho:kham Oga yang: eib: qu" ra" Gilead khaung: mae" mung" zug: Uri nho: yauggai zo: Gebera ngad: ra".
Ce: daxe shid' yaug tho' mago" mung" geim" re eib: ra" mung" zug: qi: dayaug bo: ra".
Sholamon Nho: Dai Kham Jo, Nho" bo: Mung" Eib: Ra" Khyo
20Yuda we' Israel byu qe wa panglai: qid yae mae" ma coe je, nho" myo" laug: ako". Yao: bam wa zo: shaug' mung: gyai pyo" ako". 21Sholamon nho: kho:kham mung"dan: wa Uphrad gyaung: mae" Philisti joe" sho' mae" mung"dan: alhab' we' Egutu mung" mug: kyo: joe" sho' mae" mung"dan: jham bobo: ako". Yao: bam wa yao: re khang: ke' mung: yao" apyad geim" yao" qao: mae na: ako".
22Sholamon kho:kham ba khao: ngo" qo ca" ra" zokho wa- cin man" phaui: anhug gug xe tang anhug mangad' ru dayo: she' xe tang- 23Nung: jham mae" myhaug' to" ra" nung: daxe dau:- Mhin: gyo, jao: mae khau: to" ra" nung: shid' xe dau:- yao dayo dau:- aitho' mago"- shocid'- xe'- yo:- qo, myo: sho' ngad: ra".
24Sholamon wa Uphrad gyaung: ba vao shad' mug: myid alhab' re eib: ra". Aiwa Uphrad gyaung: yae mae jo; ra" Tiphsa mae" Gaza vomo" joe" sho' mae" mug: myid ngad: ra". Uphrad gyaung ba vao shad' mae" kho:kham qe alhab' wa yao" qao: mae na gemung:- yao: wa yham kyo: cao: mung"dan: jham alhab' we' ngaui pyo: yaug yo za: na: ra". 25Yao: daui: na ra" myhao"- Yuda we' Israel mung" geim" mae na ko" ra" amyu" byu qe wa gug: gam za:- yham khaung khao: ngo" yao: yao" sabyi khyae jham we' pho' ham" shi: khyae jham we' na: ako".
26Sholamon wa yao" gyekhe' myao: lhin" she: ra" myao: jham qhid' mae" myao: yham byid tug- jui: myao: datug: shid' taung dau: qo" ra". 27Yao" mung" zug: daxe: shid' yaug re dayaug lho" dakhye' khye' Sholamon kho:kham yao: yao: we' kho:kham kho" mae zo" na: ko" mo; qhid' mae" qo ca" ra" zokho dai" byid: nae" san: to" ra". Yao: bam wa qo ca" gu: alhab' re dai" byid' ako". 28Mung" zug: yaug khao: ngo" gyekhe' myao: lhin" she: ra" myao: jham we' qo vin: ra" gug'nyhug' jham: qhid' mae" yao: yao: vin vo; ang: ra" bale gaug we' khovho jham rere: dai" byid: ca" ako".
29Mao"So wa Sholamon re gakai lai pha,jhi" we' suzo: du" ru- laba lajhao matho' ka" losho' byid' to" ra". 30Sholamon wa ba thug' shad' mae" pha,jhi" bo mo, tho'- Egutu mung" mae" pha,jhi" bo mo, tho' je: pha,jhi" bo: ra". 31Yao: wa byu alhab' tho' pha,jhi" je: bo: ra" Ezrahid byu Ethan- Maho nho: yauggai zo: qe ngad: ra" Heman- Khako- Darda bam tho' pha,jhi" je: bo: ra". Yao" lahau: wa yham kyo: cao: mung"dan: jham alhab' khyo hau" nhao" lo" ra". 32Yao: wa dao: zham" sam taung we' nghaui" caung: dataung je sho' re tung" to: yaug ngad: ra". 33Yao: wa sag' gae jham- agae jham- Lebanon bam mae yaug ra" shaug' gae mae" vang mae yaug: ra" Husub joe" sho' ra" khyo jham re ta" to" ra". Yao: wa- gug'nyhug' jham- ngho' jham- yoe" lhau ja:- ngo: jham: khyo re ta" ra". 34Mug: myid geim" mae" kho:kham qe wa yao" pha,jhi" bo: ra" khyo re the' gyo: gemung: yao" dao: re tae" gyo: nae" qhid' mae" byu qere yao: jhao" nhao: ke' ako".
Currently Selected:
1 KHO:KHAM 4: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
